148
Ĩmi ịcụ́ rụ́ Úpí drị̂ ꞌi
1 Ĩmi ịcụ́ Úpí ꞌi!
Ĩmi ịcụ́ Úpí ꞌi ꞌbụ̃ gâlé,
ĩmi ịcụ́ ĩꞌdi ãngũ ụrụ gâlé rĩ kí agá!
2 Ĩmi mãlãyíkã ĩꞌdidrị́ ꞌdĩ, ĩmi pírí ꞌbã ịcụ́ kí ĩꞌdi,
ĩmi ịcụ́ ĩꞌdi ĩmi ãsĩkárĩ ĩꞌdidrị́ ꞌbụ̃gá ꞌdĩ!
3 Ị̃tụ́ ꞌbã ịcụ́ kí ĩꞌdi ĩmbá be,
ĩmi lẽlẽgó pírí dị̃lépi ꞌdĩ, ĩmi ịcụ́ ĩꞌdi!
4 Ĩmi ụ̃rụ́ꞌbụ̃ ụrụgá ãndânĩ ꞌdĩ, ĩmi ịcụ́ ĩꞌdi,
ĩmi ị̃yị́ ụ̃rụ́ꞌbụ̃ kí drị̃lẹ́ gâlé ꞌdĩ, ĩmi ịcụ́ ĩꞌdi!
5 Lẽ ãko ũꞌbãlé ũꞌbã-ũꞌbã ꞌdĩ ꞌbã ịcụ́ kí Úpí ꞌi,
ãꞌdusĩku Úpí ũꞌbã kí ãzị́táŋá ĩꞌdi ꞌbã fẽlé rĩ sĩ rá.
6 Fẽ ĩꞌbaní pá tulé ãngũ ĩꞌbaní sĩ adrujó rĩ gá jãꞌdâ,
fẽ ãzị́táŋá ãzíla icó ukólé ku.
7 Ĩmi ịcụ́ Úpí ꞌi angájó vũ gâlé,
ĩmi ãnãkpá ãmbogo ãmbogo ị̃yị́ agá ãzíla mĩrĩ kị́rị́ rĩ agá ꞌdĩ,
8 ãvi kí sí be, ũfú, ụ̃rụ́ꞌbụ̃,
ãlụ́kụ́kụ̃ kí abe pírí ãzị́táŋá ĩꞌdidrị̂ kí vú ũbĩ.
9 ꞌBé kí túpũ kí abe,
ife ãka nalé nãnã rĩ kí ife ãka nalé ku rĩ kí abe,
10 ãnãkpá ásé agá rĩ kí lị́cọ́ gá rĩ kí abe,
ãnãkpá ru selépi kụ̃bụ̃drị̃ sĩ rĩ kí ãriŋa kí abe,
11 ũpi ụ̃nọ́kụ́ drị̃ gá ri kí ꞌbá pírí kí abe,
drị̃lẹ́ka kí ꞌbá ị́jọ́ lịlépi rĩ kí abe,
12 kãrị́lẹ̃ kí izonzị kí abe,
ĩdranigo kí anzị nírí kí abe
13 ꞌbã ịcụ́ kí pírí Úpî rụ́,
ãꞌdusĩku rụ́ ĩꞌdidrị̂ ndẽ ãmbõgõ sĩ rụ́ pírí kí rá,
dị̃zã ĩꞌdidrị̂ alị vũ kí drị̃lẹ́ gâsĩ ꞌbụ̃ be cákáꞌdá.
14 Fẽ ꞌbá ĩꞌdidrị̂ ꞌbaní acájó ũkpó ru,
ị́jọ́ ꞌdĩ sĩ ꞌbá ĩꞌdi lẽlépi rá rĩ ịsụ́ kí dó sĩ ãrútáŋá,
ꞌDĩ kí ꞌbá Ịsịrayị́lị̃ drị́ ĩꞌdi ꞌbã lẽlé ambamba rĩ kî.
Ĩmi ịcụ́ Úpí ꞌi!