16
Ãdróŋá zịjó sĩ ásị́ ũkpõ ịsụ́jó
1 Ímba áma tã fô Ãdróŋá,
mání áma ásị́ ꞌbãjó tãmbaŋá mídrị̂ drị̃ gá rĩ sĩ.
2 Ájọ Úpí ní, “Mi úpí mádrị̂ ꞌi;
Mî kóru ãko ãzí ídri mádrị̂ agá mání icólé idélé múké rá la yụ.”
3 ꞌBá ãlá ãngũ drị̃ gá ꞌdĩ kí, kí kẹ́jẹ́ŋị́ mádrị́ mgbã rĩ kî,
ãyĩkõ fụma kî sĩ rá.
4 Ũcõgõ ꞌbá ụ̃cẹ̃lépi ãdroŋa ãzí kí vú gâsĩ rĩ ꞌbadrị̂
la tụ drị̃ gá drị̃ gá.
Má icó ídétáŋá idélé sĩ ãrí asujó rĩ idélé ĩꞌba abe ãngũ ãlu gá ku,
Má icó ãdroŋa ĩꞌbadrị̂ kí ị̃nzị̃lé áma tị sĩ ku.
5 Úpí, ãwítã mádrị̂ lú mi ꞌi, ãzíla mi ãko pírí mání lẽlé rĩ kí fẽ rá,
Ị́jọ́ mádrị́ drị̃lẹ́ gâlé rĩ kí pírí ími drị́ alé gá.
6 Ãwítã míní fẽlé mání rĩ ĩꞌdi ãlá la,
ãndá ãndá ru, ãwítã mádrị̂ ĩꞌdi ãlá ru!
7 Ma Úpî ịcụ́, ĩꞌdiní áma imbájó rĩ sĩ;
átã ị́nị́ sĩ áma ásị́ la vâ áma imbá.
8 Áꞌbã Úpí ꞌi ụ́ꞌdụ́ pírí sĩ áma drị̃lẹ́ gá;
Ĩꞌdiní adrujó áma drị́ ãndá gá rĩ sĩ,
ị́jọ́ ãzí icó dó sĩ áma ayalé ku.
9 Ị́jọ́ ꞌdĩ sĩ, áma ásị́ dó sĩ ãyĩkõ sĩ, áma úríndí vâ ãyĩkõ sĩ ĩndĩ,
ãzíla má amá ị́jọ́ ãzí ũnzí la ku,
10 ãꞌdusĩku mí icó áma ídri aꞌbelé mụlé ãngũ ꞌbá drãlépi rá rĩ ꞌba drị̂ agá ku;
jõku mí icó ꞌbá mí ani ãlá rĩ aꞌbelé ŋmalé ꞌbụ́ agá ku.
11 Mi mání gẹ̃rị̃ sĩ mụjó ídri gá rĩ iꞌda mi ꞌi;
míní adrujó áma andre gá rĩ la fẽ ãyĩkõ la ga áma ꞌa gá tré
ími drị́ ãndá rĩ gá ãyĩkõ jãꞌdâ rĩ cí.