17
ꞌBá ị́jọ́ kọ́lị rĩ ní Ãdróŋá zịjó
1 Úpí mí are drị̃ mãmálá mání ꞌbãlé ị́jọ́ mgbã sĩ ꞌdĩ ꞌi,
mí are áma áwáŋá mání sĩ ãzãkoma aꞌị́jó rĩ!
Mí iga bị́lẹ́ ị́jọ́ mání zịlé
angálépi tị ĩnzõ jọlépi ku rĩ gá rĩ.
2 Mi áma ị́jọ́ lị pịrị rá rĩ gá mí ꞌi,
ími mịfị́ la ị́jọ́ mgbãrĩ ndre nĩ.
3 Ínị̃ áma ásị́ cé, ídrĩ táni amụ́ ị́nị́ sĩ sĩ áma ụ̃ꞌbị̃jó
Mí ụ̃ꞌbị̃ má pírí ꞌbo,
ãzíla mí ịsụ́ ị́jọ́ ãzí ũnzí la áma tị gá ku.
4 Ájọ ị́jọ́ ũnzí ꞌbá ãzí rĩ ꞌbã kí jọlé rĩ áni ku
Ámba ãzị́táŋá mídrị̂ kí tã rá
ámba áma tã rá
ãzíla má ũbĩ gẹ̃rị̃ ꞌbá ãgọ̃bị̃ amba mba rĩ ꞌbadrị̂ kí vú ku.
5 Ma ụ́ꞌdụ́ pírí sĩ ací gẹ̃rị̃ mídrị̂ agâ sĩ
má uja drĩ ma ala ga ꞌdâ bụ́lụ́ gá ku.
6 Ázị mi Ãdróŋá, ãꞌdusĩku ánị̃ rá mi mâ zịtáŋá umvi rá,
mí ajá ími bị́lẹ́ má rú ꞌdõlé ãzíla mí are zịtáŋá mání zịlé rĩ.
7 Mí iꞌda lẽtáŋá mídrị́ ụ̃sụ̃táŋá ru rĩ
mi ꞌbá ꞌbá kí palépi ũkpõ mídrị̂ sĩ
ãzíla mi ꞌbá ꞌbá kí sĩ ru zị̃jó mẹ́rọ́ꞌbá kí sĩ rĩ.
8 Ímba áma tã cécé míní ími mịfị́ ífí tã mbajó rĩ áni;
ízị̃ ma cécé ãꞌụ́ ꞌbã ĩꞌdi ꞌbã mvaka kí zị̃jó ĩꞌdi ꞌbã ụ́pụ́pị́ agá rĩ áni,
9 Ímba áma tã ꞌbá ũnzí ãꞌdị́ ꞌdịlépi má be ꞌdĩ kí sĩ,
mẹ́rọ́ꞌbá ũnzí la ꞌbã kí áma cejó trộkị́lịrị rĩ sĩ.
10 ꞌBá ꞌdĩ kí drị̃ ũnzí,
kí ị́jọ́ jọ ãfó sĩ.
11 Ũbĩ kí áma vú kpere ĩꞌbã kí áma ce agá trộkị́lịrị,
kí mịfị́ mgbọ sĩ gẹ̃rị̃ ndrụ̃jó sĩ áma ꞌbejó vụ̃rụ́.
12 Kí cécé kẹ̃mị̃ ãbị́rị́ sĩ ĩzá ndrụ̃lépi rĩ áni,
cécé kẹ̃mị̃ ãnãkpá mbãlépi rĩ áni.
13 Mí ángá Úpí sĩ kí drị̃ arụ́jó, índẽ mání kí rá fô!
Ípa ma ménéŋá mídrị̂ sĩ ꞌbá ũnzí ꞌdĩ kí drị́ gá.
14 Úpí ípa ma drị́ ũkpõ mídrị̂ sĩ ꞌbá ꞌdĩ kí drị́ gá,
ꞌbá ụ̃nọ́kụ́ ꞌdĩ ꞌbã mũkẽ lẽlépi rĩ kí drị́ gá.
Ífẽ ãbị́rị́ ꞌbá míní lẽlé rĩ ꞌbadrị̂ ꞌbã tu pá cí;
ãkónã ꞌbã cá anzị ĩꞌbadrị̂ ꞌbaní rá,
ꞌbã mba kí málĩ tã anzị ĩꞌbadrị̂ ꞌbanî.
15 Wó ma ími mẹ́lẹ́tị ndre rá la mání ị́jọ́ mgbã rĩ idéjó rĩ sĩ,
ádrĩ angá rá, ma uꞌá ãyĩkõ sĩ míní adrujó áma andre gá rĩ sĩ.