20
Ãdróŋá zịjó sĩ ãꞌdị́ ndẽjó
1 Úpí ꞌbã umvi mi sáwã ị́jọ́ ní ími ịsụ́jó rĩ sĩ!
Lẽ Ãdróŋá Yãkóꞌbõ drị̂ ꞌbã mba ímitã!
2 Lẽ ꞌbã fẽ míní ãzãkoma angájó jó ĩꞌdidrị̂ agâlé
ãzíla ꞌbã fẽ míní ũkpó angájó ꞌbé Zị̃yọ́nị̃ gâlé
3 Lẽ ꞌbã ãꞌị̃ ídétáŋá mídrị̂ kí rá
ãzíla ꞌba uꞌá ãyĩkõ sĩ ídétáŋá mídrị̂ kí sĩ.
4 Lẽ ꞌbã fẽ míní ị́jọ́ ími ásị́ ꞌbã lẽlé rĩ rá
ãzíla ꞌbã fẽ ị́jọ́ pírí míní ụ̃tị̃lé rĩ ꞌbã idé kí ru rá.
5 ꞌDã ꞌbã ũngúkú gá, ãma dó uzá ãyĩkõ sĩ úpí míní ãꞌdị́ ndẽjó rĩ sĩ;
ãzíla ãma dó ãyĩkõ idé rụ́ Ãdróŋá ãmadrị̂ drị̂ sĩ.
Lẽ Úpí ꞌba fẽ ị́jọ́ pírí míní aꞌị́lé rĩ kí rá.
6 Úꞌdîꞌda ánị̃ dó rá Úpí la ꞌbá ĩꞌdi ꞌbã sĩ ãdu ũsũjó drị̃ la gá rá rĩ pa nĩ.
Ĩꞌdi ĩꞌdi umvi angájó ꞌbụ̃ ĩꞌdidrị́ ãlá ꞌdã gâlé
ãzíla ĩꞌdi ĩꞌdi pa ũkpõ ĩꞌdidrị́ ãmbógó rĩ sĩ nĩ.
7 ꞌBá ãzí tị̃ kí ásị́ gárĩ ĩꞌbadrị́ ãꞌdị́drị̂ kí drị̃ gá;
ãzí rĩ tị̃ kí ásị́ fãrásĩ kí drị̃ gá,
wó ãtị̃ ásị́ rụ́ Úpí Ãdróŋá ãmadrị̂ drị̂ drị̃ gá.
8 ꞌBá ꞌdĩ áni rĩ kí ru pá ụ̃sị̃ ãzíla kí uꞌde vũ gá,
wó ãma angá ụrụgá ãzíla pá tu ũkpó ru.
9 ꞌBárĩ Úpí Ãdróŋá ípa úpî rá fô!
Ãdrĩ ími umve, mí umvi ãma rá fô.