21
Ãwãꞌdĩfô fẽjó Úpí ní ãꞌdị́ ndẽŋá sĩ
1 Úpí, úpí la ãyĩkõ idé ũkpõ mídrị̂ sĩ,
Ĩꞌdi uzá ãyĩkõ sĩ míní ĩꞌdi fẽjó ãꞌdị́ ndẽjó rĩ sĩ!
2 Ífẽ ĩꞌdiní ị́jọ́ ĩꞌdi ꞌbã ásí ꞌbã lẽlé rĩ rá;
ãzíla ị́jọ́ ãzí ĩꞌdiní zịlé ími tị gá míní ugalé úmgbé la ꞌdáyụ.
3 Mí aꞌị́ ĩꞌdi, íwi ĩꞌdiní sụ̃sụ́ ãmbógó la
ãzíla ísụ̃ ĩꞌdiní kõfíyã idélé gólũdĩ mgbã sĩ rĩ ĩꞌdi drị̃ gá.
4 Zị mídrị́ ídri, wó ífẽ ĩꞌdiní rá,
ídri sĩ uꞌájó ụ́ꞌdụ́ ãzo rú jãꞌdâ rĩ ꞌi.
5 Úpí ịsụ́ dị̃zã ãmbógó la ãzãkoma mídrị̂ sĩ;
ífẽ ĩꞌdiní rụ́ kụma ãzíla ũkpõ.
6 Ífẽ ĩꞌdiní drị̃lẹ́ba jãꞌdâ rĩ ꞌi,
ãyĩkõ ga dó ásị́ la gá tré míní adrujó ĩꞌdi andre gá rĩ sĩ.
7 Úpí ꞌbã ásị́ ꞌbãjó Úpí Ãdróŋá drị̃ gá rĩ sĩ;
lẽtáŋá ukólépi ku Úpí Ũkpó ꞌdị́pị drị̂ sĩ,
ãko ãzí icó ĩꞌdi ayalé ku.
8 Úpí la mụ mẹ́rọ́ꞌbá ĩꞌdidrị̂ kí ndẽlé pírí,
ĩꞌdi mụ ꞌbá pírí ĩꞌdi ngụ̃lépi ũnzí ꞌdĩ kí ndẽlé rá.
9 Sáwã Úpí míní ími iꞌdajó rĩ sĩ,
mi kí ị̃lị̃kị̃ ãcí kalépi cécé úká gá rĩ áni rĩ sĩ.
Ũmbã mídrị̂ sĩ mi mụ kí ụꞌdị́lé rá,
ãcí mídrị̂ sĩ mi kí ivé rá.
10 Anzị ĩꞌbadrị́ drị̃lẹ́ gâlé rĩ kí mi kí ị̃lị̃kị̃ rá,
ũri ĩꞌbadrị̂ kí mụ ị̃lị̃kị̃lé ụ̃nọ́kụ́ drị̃ gá ꞌdâ pírí rá.
11 Drĩ kí táni ị́jọ́ ũnzí itú agá ími ụrụꞌbá gá rá tí,
wó icó kí drị̃lẹ́ba ịsụ́lé ku.
12 Úpí la ꞌé ĩꞌdidrị̂ kí gbẹ ĩꞌba rụ̂lé,
kí dó sĩ ũngúkú uja sĩ apájó.
13 Úpí ãma ími ị̃nzị̃ ũkpõ mídrị́ ãmbógó rĩ sĩ!
Ãma úngó ngo sĩ ũkpõ mídrị̂ ịcụ́jó.