28
Ãzãkoma aꞌị́jó Úpí drị́
1 Úpí mi ꞌbé mání sĩ áma zị̃jó rĩ ꞌi, ma ími umve,
mí ãzụ̃ jõ ími bị́lẹ́ mání cí ku.
Ídrĩ áma tị ãꞌị̃ ku,
ma mụ drãlé rá.
2 Mí are áwáŋá mání sĩ ásị́ ị̃gbẹ̃ zịjó ꞌdĩ ꞌi,
mání ãzãkoma aꞌị́ agá mídrị́,
mání drị́ ãꞌbã agá mírụ́
jó mídrị́ ãlá rĩ gâlé ru.
3 Ílị ị́jọ́ áma drị̃ gá ꞌbá ị́jọ́ ũnzí idélépi rĩ kí abe ku,
ꞌbá ũnzí rĩ kí abe ku,
kí ị́jọ́ jọ jĩránĩ kí abe tị gá ꞌdâ múké,
wó kí ásị́ ga tré ꞌbá ngụ̃ŋá sĩ.
4 Ífẽ ĩꞌbaní drị̃rịma ũnzĩkãnã ĩꞌbaní ngalé
ãzíla ãzị́ ũnzí ĩꞌbaní idélé rĩ kí vú sĩ;
ífẽ ĩꞌbaní drị̃rịma ị́jọ́ ũnzí pírí ĩꞌbã kí idélé rĩ kí vú sĩ;
ãzíla ũnzĩkãnã ĩꞌbã kí adrujó ala gá rĩ kí vú sĩ,
5 ãꞌdusĩku vã kí ị́jọ́ Úpí ꞌbã ngalé rĩ kí ku
jõku ị́jọ́ ĩꞌdi ꞌbã idélé rĩ kí drị̃ gá ku;
ị́jọ́ ꞌdĩ sĩ ĩꞌdi ĩꞌbaní drị̃rịma fẽ
ãzíla ĩꞌdi kí ị̃lị̃kị̃ rá.
6 Ma Úpî rụ́ ịcụ́,
ãꞌdusĩku are áma áwáŋá rá.
7 Úpí ĩꞌdi ũkpó ãzíla gọ́bẹ́rẹ́ mádrị̂ ꞌi;
áꞌbã áma ásị́ ĩꞌdi drị̃ gá ãzíla ko áma ãzã rá.
Áma ásị́ uꞌá ãyĩkõ sĩ,
ãzíla ma ãwãꞌdĩfô fẽ ĩꞌdiní úngó ngoŋá sĩ.
8 Úpí ĩꞌdi ũkpó ꞌbá ĩꞌdidrị̂ ꞌbadrị̂ ꞌi,
ĩꞌdi bõrõ ũkpó ꞌbá ĩꞌdiní ãdu ũsũjó drị̃ la gá rĩ ꞌbadrị̂ ꞌi.
9 Úpí, ípa ꞌbá mídrị̂ kí, íwi sụ̃sụ́ ꞌbá mídrị́ míní pẽlé ndú rĩ ꞌbaní.
Mí adru ꞌbá kí tãmbalépi rĩ ãzíla mí ují kí ími drị́ sĩ jãꞌdâ.