27
Ãdróŋá zịlé sĩ Úpí ịcụ́jó rĩ
1 Úpí ĩꞌdi dị̃zã mádrị̂ ꞌi ãzíla ꞌbá áma palépi rĩ ꞌi;
má idé dó sĩ ꞌbá ãzí sĩ ụ̃rị̃ sĩ ku.
Úpí ĩꞌdi ãngũ ũkpó mání sĩ áma zị̃jó ala gá rĩ; má icó idélé ụ̃rị̃ sĩ ku.
2 Sáwã ꞌbá ị́jọ́ ũnzí idélépi rĩ ꞌbã kí angájó ámã drị̃ gá trụ,
ĩꞌbã kí lẽjó áma ꞌdịjó rá rĩ sĩ,
sáwã mẹ́rọ́ꞌbá mádrị̂ ꞌbã kí ãꞌdị́ ꞌdịjó má be rĩ sĩ,
kí ru pá sị ãzíla kí uꞌde vũ gá.
3 Ãsĩkárĩ ũꞌbí drĩ kí táni áma ce trộkị́lịrị rá tí;
má icó idélé ụ̃rị̃ sĩ ku;
mẹ́rọ́ꞌbá drĩ kí táni amụ́ márụ́ ãꞌdị́gá rá tí,
áma ásị́ la mba ũkpó ru.
4 Ị́jọ́ mání zịlé Úpí tị gá rĩ ãlu,
ị́jọ́ mání ndrụ̃lé rĩ ãlu,
sĩ adrujó jó Úpí drị̂ agá jãꞌdâ ụ́ꞌdụ́ mání adrujó ídri rĩ kí agá pírí,
sĩ ũnĩ Úpí drị̂ ndrejó,
ãzíla ma dó sĩ ĩꞌdi zị jó ĩꞌdidrị̂ agá ꞌdãá.
5 Ụ́ꞌdụ́ ị́jọ́ ꞌbã áma ịsụ́jó rĩ sĩ,
Úpí la áma tãmba ị́jọ́ ũnzí kóru jó ĩꞌdidrị̂ agá
ãzíla ĩꞌdi áma tãmba ꞌbé drị̃ gá ụrụgá ꞌdãá.
6 Ị́jọ́ ꞌdĩ sĩ ma dó mẹ́rọ́ꞌbá áma andre celépi rĩ kí ndẽ rá;
jó Ãdróŋá drị́ ꞌdĩ agá ma ídétáŋá idé ãyĩkõ sĩ;
ma úngó sĩ Úpî rụ́ ịcụ́jó rĩ ngo.
7 Úpí mí are ma mání ími umve agâ;
mí adru mání ásị́ ị̃gbẹ̃ sĩ ãzíla mí umvi ma!
8 Áma ásị́ jọ, “Índrụ̃ Úpí ꞌbã mẹ́lẹ́tị ndrelé,”
áma ásị́ umvi, “Ma mụ rá.”
9 Ízị̃ ími mẹ́lẹ́tị mâ sĩ ku,
ígã ãtíꞌbó mídrị̂ ũmbã sĩ ku;
mí ábị́ adrulé ꞌbá áma ãzãkolépi rĩ ꞌi.
Ígã jõ ma ku jõku mí aꞌbe ma ku,
Ãdróŋá mi ꞌbá áma palépi rĩ.
10 Má átẹ́pị drĩ kí táni áma aꞌbe mâ ãndrẽ be rá tí,
Úpí la áma tãmba rá.
11 Úpí mí imbá ma ị́jọ́ míní lẽlé ánga kí rĩ kî sĩ;
íꞌde áma drị̃ gẹ̃rị̃ pịrị rĩ gâsĩ,
ãꞌdusĩku mẹ́rọ́ꞌbá mádrị̂ kí ũꞌbí-ũꞌbí.
12 Ífẽ má aꞌdé mẹ́rọ́ꞌbá mádrị̂ kí drị́ gá ku;
ãꞌdusĩku kí áma tõ ị́jọ́ ãzí mání ngalé ku la kí sĩ,
kí áma ĩgbõrõkõ ãgọ̃bị̃ sĩ.
13 Ánị̃ rá ma adru ídri;
ma mũkẽ Úpí drị̂ ndre rá
ãngũ ꞌbá ídri rĩ ꞌbã kí sĩ uꞌájó rĩ gá.
14 Ítẽ Úpí ꞌi;
mí adru ũkpó ru ãzíla ími ásị́ ꞌbã mba-mbã;
ítẽ Úpí ꞌi ásị́ jã sĩ.