32
ꞌBá sĩ ị́jọ́ ũnzĩ ĩꞌdidrị̂ kí trũjó rá rĩ ĩꞌdi drị̃lẹ́ba rú
1 ꞌBá ꞌbání sĩ ị́jọ́ ũnzí ĩꞌdidrị̂ kí trũjó rá,
sĩ ị́jọ́ ũnzí ĩꞌdidrị̂ kí drị̃ akujó cí rĩ ĩꞌdi drị̃lẹ́ba rú.
2 ꞌBá Úpí ní sĩ ị́jọ́ ũnzí ĩꞌdidrị̂ kí lãjó ĩꞌdi drị̃ gá ku
ãzíla úríndí ĩꞌdidrị̂ agá ị́jọ́ pịrị rĩ ngalépi rĩ ĩꞌdi drị̃lẹ́ba rú.
3 Mání ándrá ị́jọ́ ũnzí mádrị̂ kí iꞌdajó ku rĩ gá,
má acá ándrá ũkpó kóru
mání awájó ị̃tụ̂rụ̃ rĩ sĩ,
4 ãꞌdusĩku ị̃tụ́ kí ị́nị́ be
íri áma colé ímbátáŋá ru;
áma ũkpó de dó sĩ ru rá
cécé ị̃yị́ nzụlépi ílí sĩ rĩ áni.
5 ꞌDã ꞌbã ũngúkú gá, má iꞌda dó ị́jọ́ ũnzí mádrị̂ kí Úpí ní rá,
ãzíla má ụ̃zị̃ kí ími drị̃lẹ́ gá ku;
ájọ, “Ma dó ị́jọ́ ũnzĩ mádrị̂ kí iꞌda
Úpí ní rá,”
ãzíla mí uja dó ị́jọ́ ũnzí mádrị̂ kí trũlé rá.
6 Ị́jọ́ ꞌdĩ sĩ ꞌbá Ãdróŋá ị̃nzị̃lépi rĩ kí ãlu ãlu ꞌbã zị kí mi,
sáwã ꞌbã drĩ adru agá cí ꞌdĩ gá ꞌdĩ,
ị́jọ́ ꞌdĩ sĩ ụ́lị rú sĩ ị́jọ́ kí drị̃ gá ị́jọ́ ũꞌbí amụ́lépi ị̃yị́ galépi tré rĩ áni rĩ sĩ ku.
7 Mi ãngũ mání sĩ áma zị̃jó ala gá rĩ ꞌi,
mi áma tãmba ị́jọ́ cãndí ru rĩ kí agá,
mi áma andre ce ꞌbá úngó ngolépi patáŋá míní áma pajó rĩ sĩ rĩ kî sĩ.
8 Úpí jọ, “Ma ími imbá ãzíla gẹ̃rị̃ míní sĩ mụjó rĩ iꞌda,
ma ími imbá ãzíla áma mịfị́ la adru ími drị̃ gá.
9 Mí adru jõ cécé fãrásĩ jõku kãyĩnõ
ị́jọ́ vãlépi ku rĩ kí áni ku,
ála kí tị gá aya su sĩ kí umbéjó íníríkó sĩ cí ká,
kí amụ́ mí rụ́ ãni rú ĩndõ.
10 Ũcõgõ ꞌbá ị́jọ́ ũnzí ngalépi rĩ ꞌbadrị̂ kí adru wẽwẽ rú,
wó lẽtáŋá Úpí drị́ ukólépi ku rĩ
la ꞌbá ásị́ tị̃lépi ĩꞌdi drị̃ gá ri kí tãmba nĩ.”
11 Ĩmi uꞌá ãyĩkõ sĩ Úpî agá ãzíla ĩmi ũnũ ĩmi ĩꞌdĩ sĩ,
ĩmi ꞌbá ĩꞌdi vú ũbĩlépi ꞌdĩ; ĩngo úngó ãyĩkõ sĩ ĩmi ꞌbá ásị́ mgbã trũ ꞌdĩ!