33
Lẽtáŋá Úpí drị́ ukólépi ku rĩ
1 Ĩmi ꞌbá pírí ãlá ꞌdĩ, ĩmi uzá ãyĩkõ sĩ ị́jọ́ Úpí ꞌbã idélé rĩ sĩ;
icó rá ꞌbá ị́jọ́ mgbã trũ rĩ ꞌbaní ĩꞌdi ịcụ́jó.
2 Ĩfẽ ãwãꞌdĩfô Úpí ní ụ̃ꞌdị́ sĩ,
ĩngo ĩꞌdiní úngó ụ̃ꞌdị́ ĩbáká trũ ífí mụdrị́ rĩ sĩ.
3 Ĩngo ĩꞌdiní úngó úꞌdí la,
ĩco ụ̃ꞌdị́ ãlị̃gọ̃ sĩ ãzíla ĩmi uzá ụ́ꞌdụ́kọ́ ụrụgá sĩ,
4 ãꞌdusĩku ị́jọ́ Úpí drị̂ ĩꞌdi ị́jọ́ pịrị ãzíla mgbã rĩ ꞌi.
Ị́jọ́ ĩꞌdi ꞌbã ngalé rĩ kí pírí pịrị.
5 Úpí lẽ ị́jọ́ múké rĩ kí ị́jọ́ lịlé pịrị rĩ be;
ụ̃nọ́kụ̂ ga tré lẽtáŋá ĩꞌdidrị́ ukólépi ku rĩ sĩ.
6 Ị́jọ́ Úpí ꞌbã jọlé rĩ sĩ ꞌbụ̃ ꞌbã ru rá,
ị̃tụ̂ kí, ĩmbá trũ ãzíla lẽlẽgó kí abe ũꞌbã kí ru ị́jọ́ ãfũlépi ĩꞌdi tị gá rĩ sĩ.
7 Atrá ị̃yị́ mĩrĩ drị̂ kí ãngũ ãlu gá ngúlú ru,
mba ị̃yị́ kị́rị́ rĩ kí tã ãngũ sĩ ị̃yị́ tã mbajó rĩ agá.
8 Lẽ ãko pírí ụ̃nọ́kụ́ drị̃ gá ꞌdĩ ꞌbã ị̃nzị̃ kí Úpí ꞌi;
lẽ ꞌbá pírí ụ̃nọ́kụ́ drị̃ gá ꞌdĩ ꞌbã fẽ kí ĩꞌdiní ãrútáŋá!
9 Ị́jọ́ ĩꞌdiní jọlé rĩ sĩ, ụ̃nọ́kụ̂ ꞌbã ru rá;
ãzị́táŋá ĩꞌdiní fẽ lé rĩ sĩ, ãko pírí tu kí pá ũkpó ru ĩꞌbã ãngũ gá.
10 Úpí la ítútáŋá sụ́rụ́ ꞌbadrị̂ kí ꞌbã acálé ãko ãzí ꞌdáyụ la rú,
ĩꞌdi fẽ ị́jọ́ ĩꞌbã kí itúlé rĩ ꞌba nga kí ru ku la nĩ.
11 Wó ị́jọ́ Úpí ꞌbã itúlé rĩ la pá tu ũkpó ru jãꞌdâ,
ị́jọ́ ĩꞌdiní amálé ĩꞌdĩ ꞌbã ásị́ gâlé rĩ la alị anzị ĩmidrị̂ ꞌbarụ́ pírí.
12 Sụ́rụ́ Ãdróŋá ĩꞌdidrị̂ ꞌbã sĩ adrujó Úpí ꞌi rĩ ĩꞌdi drị̃lẹ́ba rú;
ꞌbá ĩꞌdi ꞌbã pẽlé ĩꞌdi ani la rú rĩ kí abe.
13 Úpí la ãngũ andré angájó ꞌbụ̃ gâlé vụ̃rụ́ ꞌdõlé,
ĩꞌdi ꞌbá kí ndre pírí ce.
14 Angájó ãngũ ĩꞌdiní rijó rĩ gá,
ĩꞌdi ꞌbá pírí uꞌálépi ụ̃nọ́kụ́ drị̃ gá rĩ kí ndre cé.
15 Ũꞌbã ásị́ ꞌbá pírí ꞌbadrị̂ kí nĩ,
ãzíla nị̃ ị́jọ́ pírí ꞌbá ꞌbaní ngalé rĩ kí rá.
16 Úpí ãzí ru palépi ãsĩkárĩ ĩꞌdidrị̂ kí ꞌbã ũꞌbĩkãnã sĩ la ꞌdáyụ;
ãsĩkárĩ ãzí ru palépi ũkpó ĩꞌdidrị́ ambamba rĩ sĩ la ꞌdáyụ.
17 Ítị̃ jõ ásị́ kãyĩnõ sĩ sĩ ru pajó ãꞌdị́ gá ku;
ũkpó ĩꞌdidrị̂ drĩ táni adru ãmbógó ru rá tí, icó ꞌbá palé ku.
18 Índre, Úpí ꞌbã mịfị́ ĩꞌdi ꞌbá ĩꞌdĩ ụ̃rị̃lépi rĩ kí drị̃ gá;
ãzíla ꞌbá ásị́ ꞌbãlépi lẽtáŋá ĩꞌdidrị́ ukólépi ku rĩ drị̃ gá rĩ kí drị̃ gá.
19 Ĩꞌdi kí pa drã agá nĩ;
ĩꞌdi vâ kí fẽ adrulé ídri sáwã rílẽ drị̂ agá nĩ.
20 Ãtị̃ ásị́ Úpî drị̃ gá;
ĩꞌdi bá ãma ãzã kolépi ãzíla ãma tãmbalépi rĩ ꞌi.
21 Ãma ãyĩkõ sĩ ĩꞌdi sĩ;
ãꞌdusĩku ãtị̃ ásị́ rụ́ ĩꞌdidrị́ ãlá rĩ drị̃ gá.
22 Úpí, lẽtáŋá mídrị́ ukólépi ku rĩ ꞌbã ri ãma drị̃ gá;
ãmaní ásị́ tị̃jó ími drị̃ gá ꞌdĩgá ꞌdâ.