35
Úpí ĩꞌdi ãmbógó ru
1 Úpí, íꞌdị ãꞌdị́ ꞌbá ãꞌdị́ ꞌdịlépi má be rĩ kí abe
ãzíla íco ãcóŋá ꞌbá ãcóŋá colépi má abe rĩ kí abe fô!
2 Íꞌdụ gọ́bẹ́rẹ́ ãzíla ãko mídrị́ ãꞌdị́ drị̂ kí;
mí angá dó sĩ áma ãzãkojó!
3 Mí anzé ãjụ́ mídrị́ ãmbógó rĩ kí ãjụ́ pị̃rị̃ŋá rĩ be
sĩ mụjó ãꞌdị́gá ꞌbá áma vú adrolépi rĩ ꞌbarụ́.
Ị́jọ ídri mádrị̂ ní,
“Ma patáŋá mídrị̂ ꞌi!”
4 ꞌBá áma ndrụ̃lépi ꞌdịlépi rĩ
lẽ ꞌba ịsụ́ kí drị̃nzá ãzíla rụ́ izama.
ꞌBá ị́jọ́ itúlépi sĩ lẽjó áma ꞌdịjó ꞌdĩ kí
ꞌba gõ kí vúlé ãzíla drị̃ la ꞌbã ꞌbe kí ru rá.
5 Lẽ ꞌbã adru kí cécé ãná drẹ̃jị́kọ̃ ãlụ́kụ́kụ̃ ꞌbã vulé rĩ áni;
mãlãyíkã Úpí drị̂ ꞌbã dro kí rá!
6 Ífẽ gẹ̃rị̃ ĩꞌbadrị̂ ꞌba adru ịnị rú ãzíla ꞌbã nzõnzõ;
mãlãyíkã Úpí drị̂ ꞌbã dro kí vú!
7 ꞌBe kí mání ímbá ị́jọ́ kóru;
ga kí ꞌbụ́ sĩ áma rụjó ị́jọ́ kóru.
8 Ífẽ ꞌbã ị̃lị̃kị̃ kí sáwã ĩꞌbaní nị̃lé ku rĩ agá;
ífẽ ꞌbã ꞌde kí ímbá ĩꞌbaní ꞌbelé rĩ ꞌbã vúŋá gá nĩ,
ꞌba aꞌdé kí ꞌbụ́ ĩꞌbaní galé rĩ gá, ꞌbã ị̃lị̃kị̃ kí sĩ be nĩ.
9 ꞌDã ꞌbã ũngúkú gá, ma dó sĩ uꞌá ãyĩkõ sĩ Úpî agá;
ma dó sĩ uꞌá ãyĩkõ sĩ ĩꞌdiní áma pajó rĩ sĩ.
10 Ma dó jọ la áma ásị́ pírí sĩ,
“Úpí, ꞌbá mî áni rĩ dó ãꞌdi ꞌi?”
Mi ꞌbá lẽmẽrí rĩ kí pa ꞌbá kí ndẽlépi ũkpõ sĩ rá rĩ kí drị́gá,
mi ꞌbá lẽmẽrí ãzíla ũkpó kó ru rĩ kí pa ꞌbá kí ralépi rĩ kí drị́gá.
11 Sãdínĩ ásị́ ũnzí rĩ kí angá,
kí áma ụzị ị́jọ́ mání nị̃lé ku la kî sĩ.
12 Kí ị́jọ́ mání idélé múké rĩ tị ũfẽ ị́jọ́ ũnzí sĩ;
fẽ kí mání cãndí ãmbógó la.
13 Wó ĩꞌbaní ándrá adrujó ãyánĩ rú rĩ sĩ;
ásụ̃ ma kõlĩbá sĩ;
ári ĩsãyĩmũ lé;
ála dó mụ Ãdróŋá mání zịlé rĩ umvilé ku ꞌbo,
14 ári dó acị́lé áwáŋá trũ ma ꞌbãrĩ awá mâ wọ̃rị̂ sĩ jõku ãndrẽ sĩ rĩ áni,
má ilú áma drị̃kã vụ̃rụ́ ũcõgõ sĩ
ma ꞌbã rĩ awá mâ ãndrẽ sĩ rĩ áni.
15 Wó sáwã ị́jọ́ ní áma ịsụ́jó rĩ sĩ, kí ándrá pírí ãyĩkõ sĩ,
tra kí ru áma andre gá sĩ áma gụjó,
ꞌbá mání nị̃lé ku la co kí ma ãzíla ri kí áma adịlé aꞌbeŋá kóru.
16 Ide kí ma ũnzí ũnzí cécé ꞌbá Ãdróŋá rulépi ku rĩ kî áni,
kí sị́ na má sĩ.
17 Úpí, mi dó áma ndre mịfị́ sĩ ụ́ꞌdụ́ sị́ yã?
Ípa ídri mádrị̂ ị́jọ́ ĩꞌbã kí itúlé sĩ lẽjó áma ị̃lị̃kị̃jó rĩ gá;
ípa ídri mádrị́ ãjẹ̃ rú rĩ kẹ̃mị̃ ꞌdĩ kí drị́gá.
18 Ị́jọ́ ꞌdĩ sĩ ma dó mụ ãwãꞌdĩfô fẽlé ꞌbá ũꞌbí ru tralé sĩ Ãdróŋá ị̃nzị̃jó rĩ kí drị̃lẹ́ gá;
ma ími rụ́ ịcụ́ ꞌbá pírí kí drị̃lẹ́ gá.
19 Ífẽ mẹ́rọ́ꞌbá mádrị̂ ꞌbã adru kí ãyĩkõ sĩ
ĩꞌbaní áma ndẽjó rĩ sĩ ku,
ífẽ ꞌbá áma ngụ̃lépi ị́jọ́ kó ru ꞌdĩ;
ꞌbã bĩ kí ma mịfị́ sĩ kámị́ ku.
20 Jọ kí ị́jọ́ ásị́ ị̃gbẹ́ sĩ ku,
wó kí ꞌbá tõ ĩnzõ sĩ
ꞌbá ásị́ ị̃gbẹ̃ lẽlépi rĩ kí tị gá.
21 Nzị̃ kí tị mâ sĩ mgbọ rú,
sĩ gụjó, “Ãhá! Ãhá!
Ãndre dó ị́jọ́ ꞌdĩ ãma mịfị́ sĩ rá!”
22 Úpí, índre ị́jọ́ ꞌdĩ rá; mí ĩyãŋã tú ku.
Mí adru má be rá-rá ru ku Úpí.
23 Mí angá, mí angá sĩ ị́jọ́ mádrị̂ arejó;
Ãdróŋá ãzíla Úpí mádrị̂, mí angá sĩ áma ũngúkú ãtị̃jó ị́jọ́ múké mádrị̂ gá.
24 Úpí Ãdróŋá mádrị̂, mí iꞌda ma ị́jọ́ ũnzí kóru rĩ, ũnĩ mídrị̂ sĩ
ífẽ mẹ́rọ́ꞌbá mádrị̂ ꞌbã gụ kí ma ũcõgõ mádrị̂ kí sĩ ku fô!
25 Ífẽ jõ ꞌbã jọ kí, “Ãhá ãma ịsụ́ dó ị́jọ́ ãmaní lẽlé rĩ ꞌbo,
ãti dó sĩ ĩꞌdi ídri rú ꞌbo íni la ku.”
26 Ífẽ ꞌbá gụlépi ũcõgõ mádrị̂ sĩ rĩ
ꞌba ịsụ́ kí drị̃nzá ãzíla drị̃ la ꞌbã ꞌbe kí ru rá;
ꞌbá ru ꞌbãlépi má sĩ cĩkã rĩ
ꞌba ịsụ́ kí drị̃nzá ãrútáŋá ãkõ be.
27 Ífẽ ꞌbá adrulépi ãyĩkõ sĩ ị́jọ́ pịrị mání ngalé rĩ sĩ rĩ
ꞌbã uzá kí ãyĩkõ sĩ ãzíla ꞌbã ũnũ kí dó ru,
ꞌbã jọ kí ụ́ꞌdụ́ pírí sĩ, înga Úpí ꞌbã rụ́ ụrụgá.
Úpí ĩꞌdi ãyĩkõ sĩ drị̃lẹ́ba ãtíꞌbó ĩꞌdidrị̂ ꞌbã ịsụ́lé rĩ sĩ.
28 ꞌDã ꞌbã ũngúkú gá, ma dó mụ ị́jọ́ pịrị mídrị̂ ꞌbã ị́jọ́ ũlũlé
ãzíla ma dó ími rụ́ ícụ́ ị̃tụ̂rụ̃.