36
Ị́jọ́ ũnzĩ ꞌbádrị̂
1 Ị́jọ́ ũnzí la ị́jọ́ jọ
ꞌbá ũnzí rĩ ásị́ gâlé;
gã dó sĩ Ãdróŋá ꞌi úmgbé ãzíla
fẽ ĩꞌdiní ãrútáŋá ku.
2 Ĩꞌdi ị́jọ́ ũrã ĩꞌdi drị̃ gá ãndânĩ,
ĩꞌdi ũrã la Ãdróŋá icó ị́jọ́ ũnzí ĩꞌdidrị̂ kí nị̃lé ku ãzíla icó ị́jọ́ lịlé ĩꞌdi drị̃ gá ku.
3 Ị́jọ́ ãfũlépi ĩꞌdi tị gá rĩ lú ị́jọ́ ũnzí kí ulétáŋá be;
aꞌbe ị́jọ́ ngalé ũndũwã sĩ ãzíla mũkẽ sĩ rĩ kí cã.
4 Ĩꞌdiní ru la agá gbọ́lọ́ sị́gá, ĩꞌdi ị́jọ́ ũnzí itú;
fẽ ru pírí ị́jọ́ ũnzí ngajó;
gã ị́jọ́ ãzí ũnzí la ku.
Mũkẽ Ãdróŋá drị̂
5 Úpí, lẽtáŋá mídrị́ ukólépi ku rĩ ca kpere ꞌbụ̃ gâlé;
mi ị́jọ́ míní azịlé rĩ kí tãmba cajó kpere ụ̃rụ́ꞌbụ̃ kí agâlé.
6 Ị́jọ́ pịrị mídrị̂ ĩꞌdi cécé ꞌbé Ãdróŋá drị̂ áni;
ị́jọ́ lịŋá mídrị̂ kí cécé ị̃yị́ kị́rị́ rĩ áni;
Úpí, mi ꞌbá kí tãmba ãnãkpá kí abe mi ꞌi.
7 Ãdróŋá, lẽtáŋá mídrị́ ukólépi ku rĩ ꞌbã ãjẹ̃ ãmbógó ru ꞌdĩ áni yã!
ꞌBá pírí kí apá ru zị̃lé ími índríkã gá.
8 Kí ru na mgbe-mgbe íná calépi rá mídrị́ jó agá rĩ sĩ;
mi ĩꞌbaní ị̃yị́ fẽ mvụlé angájó ị̃yị́ mídrị́ ãyĩkõ drị̂ agá,
9 ãꞌdusĩku mi kídí ídri drị̂ ꞌi,
dị̃zã mídrị̂ sĩ ãma ãngũ ndre rá.
10 Ímụ lẽtáŋá mídrị́ ukólépi ku rĩ trũ drị̃ gá ꞌbá ími nị̃lépi rá rĩ ꞌbaní;
ãzíla mí idé mũkẽ ꞌbá ásị́ ãlá rĩ ꞌbanî!
11 Ífẽ ꞌbá ãfó trũ rĩ ꞌbã ce kí ma ku;
jõku ꞌbá ũnzí rĩ ꞌbã dro kí ma ãmvé ku.
12 Índre! ꞌBá ị́jọ́ ũnzí idélépi rĩ uꞌde kí ꞌbo!
Uꞌde kí vũ gá ꞌbo ãzíla icó kí angálé ku.