38
Ãdróŋá ꞌbá ũcõgõ gá rĩ ꞌbã zịlé rĩ
1 Úpí, mí uzá jõ mání ámã drị̃ gá umba mídrị̂ sĩ ku fô,
jõku íco ma ímbátáŋá ru adrã mídrị̂ sĩ ku fô,
2 ãꞌdusĩku ꞌé mídrị̂ sõ kí ma ngịrị-ngịrị;
ãzíla drị́ mídrị̂ inzí ma ũkpó ru.
3 Adrã mídrị̂ sĩ, áma ụrụꞌbá la azá pírí azá azâ;
ị́jọ́ ũnzí mádrị̂ sĩ áma ĩfãkã kí dó kõlõ-kõlõ rú.
4 Ị́jọ́ ũnzí mádrị̂ ndẽ kí ma rá;
cécé tẹ́rị́ ãnzị mání icólé ꞌdụlé ku rĩ áni.
5 Aza mádrị̂ sĩ,
ãkõzá ce kí má rụ́ ãzíla kí ngụ̃ ĩŋmá-ĩŋmá.
6 Ị́jọ́ ũnzí mádrị̂ agọ́ kí dó ma vụ̃rụ́, kí áma ni ãzá trũ;
ma dó sĩ awá ị̃tụ̂rụ̃,
7 ãꞌdusĩku áma ugoró ko tị̃rị̃-tị̃rị̃;
ãkõ ãzí áma ụrụꞌbá gá múké la ꞌdáyụ.
8 Má ãndẽ kpírĩ kpírĩ ãzíla má andi fúfú;
ma zu ãzá áma ásị́ gá rĩ sĩ.
9 Úpí, ínị̃ ị́jọ́ pírí mání lẽlé rĩ kí rá;
mi áwáŋá mádrị̂ kí are pírí rá.
10 Áma ásị́ la umvú-umvû, áma ũkpó la ukó-ukô,
ãzíla áma mịfị́ la dó anị́-anị̂.
11 ꞌBá áma lẽlépi rá rĩ kí mâ wọ̃rị́ka kí abe utu kí pá rá-rá ru ãkõzá áma ụrụꞌbá gá rĩ kî sĩ;
ꞌbá mádrị́ lị́cọ́ gá rĩ se kí vâ ru má sĩ rá-rá ru ĩndĩ.
12 ꞌBá lẽlépi áma ꞌdịlépi rĩ ũꞌbã kí mání mãtégõ kí;
ꞌbá lẽlépi má adrá rá rĩ kí ị́jọ́ itú sĩ áma adrájó;
kí ị́jọ́ ĩnzõ rú la kí itú áma drị̃ gá ị̃tụ̂rụ̃.
13 Ma cécé ꞌbá bị́lẹ́ kóru ị́jọ́ arelépi ku rĩ áni,
cécé ĩdra gĩlépi cí, ị́jọ́ jọlépi ku rĩ áni.
14 Má acá cécé ꞌbá ị́jọ́ arelépi ku;
tị la ꞌbãsĩ nị̃jó ị́jọ́ umvi sĩ ku rĩ áni.
15 Úpí mádrị̂, áꞌbã ásị́ ími drị̃ gá,
mi áma umvi rá Úpí Ãdróŋá mádrị̂,
16 ãꞌdusĩku ájọ, “Ífẽ mẹ́rọ́ꞌbá ꞌbã gụ kí ku,
jõku ífẽ ĩꞌbaní ãfó fõjó áma pání ĩtrĩjó rĩ sĩ ku.”
17 Ma ãnirú aꞌdéjó;
ãzíla ma ãzá ta sáwã pírí sĩ.
18 Ma ị́jọ́ ũnzí mádrị̂ kí iꞌda;
ma ũcõgõ sĩ ị́jọ́ ũnzí mádrị̂ kí sĩ.
19 Mẹ́rọ́ꞌbá mádrị́ ũꞌbí ꞌdĩ kí ụrụꞌbá ãlá ru ãzíla kí ũkpó ru;
ꞌbá áma ngụ̃lépi ị́jọ́ ífí kóru sĩ rĩ kí wẽwẽ rú.
20 ꞌBá ị́jọ́ mádrị́ múké rĩ ꞌbã ãrígó tị ũfẽlépi ị́jọ́ ũnzí sĩ rĩ kí
mání ũmbã sĩ ãꞌdusĩku mání ꞌde ị́jọ́ múké rĩ vúgá rĩ sĩ.
21 Mí aꞌbe ma ku fô Úpí;
mí adru mání má rụ́ rĩ sĩ rá-rá ru ku fô Ãdróŋá mádrị̂.
22 Mí amụ́ áma ãzãkolé mbẽlẽ,
Úpí, ꞌbá áma palépi rĩ.