37
Ãdróŋá icó ꞌbá ĩꞌdi ãni ãlá ꞌdĩ kí aꞌbelé ku
1 Mí adru ụ̃rị̃ sĩ ꞌbá ũnzí rĩ kí ị́jọ́ sĩ ku;
mí adru ãjã sĩ ꞌbá ị́jọ́ ũnzí idélépi rĩ kí sĩ ku,
2 ãꞌdusĩku kí mụ ꞌilé mbẽlẽŋá rú cécé ásé ꞌbã kí ꞌijó rĩ áni;
kí mụ ilé mbẽlẽŋá ru cécé ásé ị̃bị rĩ ꞌbã ilé rĩ áni.
3 Ítị̃ ásị́ Úpî drị̃ gá ãzíla ínga ị́jọ́ múké rĩ kí áyụ;
ị́jọ́ ꞌdĩ sĩ mi dó sĩ uꞌá ãngũ drị̃ gá ꞌdâ ị́jọ́ kóru.
4 Índrụ̃ ãyĩkõ mídrị̂ Úpí agá,
ĩꞌdi ị́jọ́ ími ásị́ ꞌbã lẽlé rĩ kí fẽ rá.
5 Ífẽ ị́jọ́ pírí míní idélé rĩ kí Úpí drị́;
íꞌbã ásị́ ĩꞌdi drị̃ gá, ĩꞌdi ími ãzãko rá.
6 Ĩꞌdi mũkẽ mídrị̂ fẽ dị̃lé ị̃tụ́kã ĩjígóŋá sĩ rĩ áni,
ĩꞌdi fẽ la ị́jọ́ pịrị mídrị̂ la iꞌdá cécé dị̃zã ị̃tụ́ íríkírí sĩ rĩ áni.
7 Mí adru dríŋá Úpî drị̃lẹ́ gá ãzíla ítẽ ĩꞌdi jã íni;
mí ũrã mi ꞌbá ũnzí rĩ ꞌbã kí málĩ ịsụ́jó rĩ sĩ ku,
jõku ị́jọ́ ũnzí ĩꞌbã kí itúlé ri kî sĩ ku.
8 Mí aꞌbe ũmbã kí adrã be cã!
Ími ásị́ ꞌbã umvú ku, ãꞌdusĩku ĩꞌdi ími agụ ị́jọ́ ũnzí gá rá,
9 ãꞌdusĩku ála ꞌbá ị́jọ́ ũnzí ngalépi rĩ kí dro ãngũ ĩꞌbaní uꞌájó rĩ agá rĩ sĩ ãmvé,
wó ꞌbá ásị́ ꞌbãlépi Úpîdrị̃ gá rĩ kí ãngũ ꞌdã ꞌdụ ĩꞌbaní ãwítã rú.
10 Sáwã were vúlé gá ꞌbá ũnzí rĩ kí ãvĩ rá,
ídrĩ táni kí ndrụ̃, mí icó kí ịsụ́lé ku.
11 ꞌBá ru irilépi vụ̃rụ́ rĩ kí ãngũ ịsụ́ ãwítã rú,
kí ásị́ ị̃gbẹ̃ ãmbógó la isụ́.
12 ꞌBá ũnzí rĩ la ị́jọ́ ũnzí itú ꞌbá múké rĩ drị̃ gá;
ĩꞌdi ru sị́ na kĩrĩ-kĩrĩ ꞌbá múké rĩ ꞌbã ị́jọ́ sĩ,
13 wó Úpí la ꞌbá ũnzí rĩ kí sĩ gụ gụ̃;
ãꞌdusĩku nị̃ rá ụ́ꞌdụ́ ĩꞌbã kí ị̃lị̃kị̃jó rĩ acá dó ãnirú.
14 ꞌBá ũnzí rĩ kí ménéŋá ĩꞌbãdrị̂ kí anzé
ãzíla kí ụ́sụ ĩꞌbadrị̂ kí nzã
sĩ ꞌbá lẽmẽrí ãzíla ãzãkoma lẽlépi rĩ kí cãjó,
sĩ ꞌbá ị́jọ́ múké rĩ idélépi rĩ kí ụlị́jó.
15 Wó ménéŋá ĩꞌbadrị̂ kí vúŋá la kí ũsõ nĩ;
ụ́sụ ĩꞌbadrị̂ kí anu rá.
16 Ãko ꞌbá ãlá rĩ drị́ wereŋá rĩ
ndẽ málĩ ꞌbá ũnzí wẽwẽ rú rĩ ꞌbadrị̂ kí pírí rá,
17 ãꞌdusĩku ála ũkpõ ꞌbá ũnzí rĩ ꞌbadrị̂ kí anu rá,
wó Úpí la ꞌbá ãlá rĩ kí inga ụrụgá.
18 Úpí la ꞌbá ị́jọ́ kóru rĩ kí tãmba ụ́ꞌdụ́ ãlu ãlu sĩ nĩ,
ãzíla ãwítã fẽlé ĩꞌbaní rĩ la adru jãꞌdâ.
19 Sáwã ị́jọ́ ꞌbã kí acájó ũkpó rĩ gá, icó kí drị̃cịlé ku;
ụ́ꞌdụ́ rílẽ drị̂ sĩ ãkónã la adru ĩꞌbaní wẽwẽ rú.
20 Wó ꞌbá ũnzí rĩ kí ị̃lị̃kị̃ rá;
mẹ́rọ́ꞌbá Úpí drị̂ kí zõ cécé mãwụ́wã ámvụ́ agá rĩ kí áni;
kí ãvĩ cécé ãcíkã áni.
21 ꞌBá ũnzí rĩ kí ãko aꞌị́ rá ũfẽ kí ãrígó la ku;
wó ꞌbá ãlá rĩ kí ãko fẽ ásị́ pírí sĩ.
22 ꞌBá Úpí ꞌbã sĩ ĩꞌbaní sụ̃sụ́ wijó rá rĩ kí ãngũ ịsụ́ ãwítã rú;
wó ála ꞌbá ĩꞌdi ꞌbã wãlé rá rĩ kí dro ãmvé.
23 Úpí la ꞌbá ĩꞌdi lẽlépi rá rĩ kí drị̃ ce gẹ̃rị̃ ĩꞌbadrị̂ gá nĩ;
ãzíla ĩꞌdi ꞌbá ĩꞌdiní sĩ adrujó ãyĩkõ sĩ rĩ kí tãmba rá.
24 Drĩ kí táni aꞌdé vụ̃rụ́ rá tí, icó kí uꞌálé vụ̃rụ̂lé ku,
ãꞌdusĩku Úpí la kí inga ụrụgá drị́ ĩꞌdidrị̂ sĩ nĩ.
25 Ma ándrá kãrị́lẹ̃, wó ma dó úꞌdîꞌda ĩdránígó;
wó ándre drĩ Úpí ní ꞌbá ãlá rĩ gã agâ ku
jõku anzịŋá ĩꞌdidrị̂ ꞌbaní ãkónã aꞌị́ agá ku.
26 Ĩꞌdi sáwã pírí sĩ ĩndrã kọ́lị ãzíla ãko fẽ ị̃sálị;
anzị ĩꞌdidrị́ mụlé tịlé drị̃lẹ́ gâlé rĩ kí adru drị̃lẹ́ba rú.
27 Mí uja ásị́, mí aꞌbe ị́jọ́ ũnzí ãzíla ínga ị́jọ́ múké rĩ áyụ;
ị́jọ́ ꞌdĩ sĩ mí dó sĩ uꞌá ụ̃nọ́kụ́ drị̃ gá ꞌdâ jãꞌdâ,
28 ãꞌdusĩku Úpí lẽ ꞌbá ãlá rĩ;
ãzíla aꞌbe ꞌbá ĩꞌdidrị́ ãꞌĩtáŋá trũ ꞌdĩ kí ku, ĩꞌdi kí tãmba jãꞌdâ,
wó anzịŋá ꞌbá ũnzí rĩ ꞌbadrị̂ kí
ála kí ụlị́ rá.
29 ꞌBá ãlá rĩ kí ụ̃nọ́kụ́ ꞌdụ ĩꞌbã ni la rú nĩ,
ãzíla kí uꞌá ala gá jãꞌdâ nĩ.
30 Ị́jọ́ ãfũlépi ꞌbá ãlá rĩ kí tị gá rĩ ĩꞌdi ũndũwá ru;
ãzíla ĩdra ĩꞌbãdrị̂ la ị́jọ́ lị ãlá ru.
31 Kí ãzị́táŋá Úpí drị̂ kí tãmba kí ásị́ gá;
ãzíla icó kí ĩtrĩlé ala gá ku.
32 ꞌBá ũnzí rĩ kí ru ụ̃zị̃ ꞌbá múké rĩ kí drị̃ ũtẽjó;
kí kí ndrụ̃ sĩ kí ụꞌdị́jó.
33 Wó Úpí icó kí aꞌbelé mẹ́rọ́ꞌbá ĩꞌbãdrị̂ kí drị́ alé gá ku;
jõku icó kí fẽlé sĩ ị́jọ́ lịjó kí drị̃ gá sáwã kí ajíjó kẹ́sị̃ gá rĩ sĩ ku.
34 Íꞌbã ími ásị́ Úpî drị̃ gá ãzíla ímba ãzị́táŋá ĩꞌdidrị̂ tã.
Ĩꞌdi míní ãrútáŋá sĩ ãngũ fẽ ꞌdụlé ãwítã ru,
údrĩ ꞌbá ũnzí rĩ kí ụꞌdị́, mi kí ndre ị̃lị̃kị̃ agâ cé.
35 Ándre ꞌbá ũnzí ãzíla ásị́ ũnzí la rá;
aja ru ꞌbá pírí kí drị̃ gá cécé márígó ꞌbé Lébãnõnĩ gá rĩ ꞌba ru ajajó ife kí drị̃ gá rĩ áni.
36 Wó uja drãlé gbõ rú, ĩꞌdi dó sĩ ꞌdáyụ;
mání ĩꞌdi ndrụ̃ agâ, má ịsụ́ ĩꞌdi ku.
37 Mí amá drĩ ꞌbá múké rĩ ꞌi, índre drĩ ꞌbá mgbã rĩ ꞌi;
ãꞌdusĩku ꞌbá ásị́ ị̃gbẹ̃ iꞌdalé pi rĩ ní drị̃lẹ́ba drị̃lẹ́ gâlé cí,
38 wó ála ꞌbá ũnzí rĩ kí ị̃lị̃kị̃ rá;
ãzíla ꞌbá ũnzí rĩ ꞌbaní drị̃lẹ́ba drị̃lẹ́ gâlé ꞌdáyụ.
39 Patáŋá ꞌbá ãlá rĩ drị̂ la angá Úpí drị́,
ĩꞌdi ãngũ ĩꞌbaní sĩ apájó ru zị̃jó rĩ ꞌi.
40 Úpí la kí ãzãko ãzíla kí unze nĩ;
ĩꞌdi kí anzé ꞌbá ũnzí rĩ kí drị́ alé gá ãzíla ĩꞌdi kí pa nĩ,
ãꞌdusĩku kí apá ru zị̃lé ĩꞌdi agá.