4
Ãdróŋá zịlé ĩndró sĩ rĩ
1 Ãdróŋá mí umvi ị́jọ́ mání zịlé rĩ,
mi ꞌbá áma tãmbalépi rĩ ꞌi.
Ífẽ mání ásị́ ũkpõ ũcõgõ mání ịsụ́lépi rĩ agá;
ími ásị́ ꞌba adru mání ị̃gbẹ́ ru ãzíla mí are ị́jọ́ mání zịlé rĩ.
2 ꞌBá ꞌdĩ ĩmi mání drị̃nzá fẽ sáwã íngõpí?
Ĩmi ị́jọ́ ãzị́ kóru rĩ kí lẽ ãzíla acị́ ị́jọ́ ĩnzõ rú rĩ kí vú gâsĩ sáwã íngõpí?
3 Lẽ ị̃nị̃ rá Úpí pẽ ꞌbá ãlá rĩ ĩꞌdi ãni la rú ꞌbo;
Úpí la áma tị are rá ádrĩ ĩꞌdi umve rĩ gá.
4 Ũmbã mídrị̂ agá mí idé ị́jọ́ ũnzí ku;
míní ími la agá gbọ́lọ́ sị́ gá ꞌdãá, mí ũrã ị́jọ́ ásị́ sĩ ãzíla mí ĩyãŋã tú.
5 Mí idéÚpí ní ídétáŋá mgbã rĩ ꞌi,
ãzíla íꞌbã ími ásị́ ĩꞌdi drị̃ gá.
6 ꞌBá wẽwẽ rú kí Ãdróŋá zị:
“Úpí, ídrĩ tá ãmaní mũkẽ iꞌda rá, ĩꞌdi tá adru múké fô!
Mí andré ãma ízákĩzã fô!”
7 Ãyĩkõ míní fẽlé áma ásị́ gá rĩ
ndẽ ĩꞌbã kí ịsụ́lé ãná kalépi ĩꞌbaní wẽwẽ rú ãzíla zãbíbũ úꞌdí rĩ sĩ rĩ rá.
8 Ádrĩ áma la vũ gá, ma ụ́ꞌdụ́ ko ásị́ ị̃gbẹ̃ sĩ;
Úpí, mi lú áma tãmba múké la mi ꞌi.