3
Ãdróŋá zịlé ụ̃ꞌbụ́tị sĩ ãzãkoma aꞌị́jó rĩ
1 Úpí Ãdróŋá, mẹ́rọ́ꞌbá mádrị̂ kí ũꞌbí ru!
ꞌBá tị itúlépi áma ụrụꞌbá gá rĩ kí ũꞌbí ru.
2 ꞌBá ũꞌbí kí jọ la mání,
“Ãdróŋá icó áma palé ku.”
3 Wó Úpí, mi gọ́bẹ́rẹ́ áma tãmbalépi rĩ ꞌi;
ífẽ mání ãꞌdị́ ndẽlé rá
mí imbá áma ásị́ ũkpó ru.
4 Má umve Úpí ꞌi áma ãzã kolé,
umvi ma angájó ꞌbé ĩꞌdidrị́ ãlá rĩ drị̃ gâlé rá.
5 Ma áma la vũ gá ãzíla ma ụ́ꞌdụ́ ko;
ma ángá ị̃dị́ la ãꞌdusĩku Úpí la áma tãmba nĩ.
6 Má idé ụ̃rị̃ sĩ mẹ́rọ́ꞌbá álĩfũ-álĩfũ
áma andre celépi wókõ pírí gá rĩ kí sĩ ku.
7 Mí amụ́ Úpí! Ípa ma Ãdróŋá mádrị̂!
Ífẽ drị̃rịma mẹ́rọ́ꞌbá mádrị̂ ꞌbaní pírí
ãzíla mí aꞌbe kí ũkpó kó ru.
8 Patáŋá la amụ́ angájó Úpí drị́,
Ásị́ ị̃gbẹ̃ mídrị̂ ꞌba adru ꞌbá mídrị̂ kí drị̃ gá.