41
Ãdróŋá zịjó ãyánĩ sĩ rĩ
1 Drị̃lẹ́ba ꞌbá ị́jọ́ ũrãlépi ꞌbá lẽmẽrí rĩ kí drị̃ gá rá rĩ nî;
Úpí la ĩꞌdi pa sáwã ũcõgõ ꞌbã ĩꞌdi ịsụ́jó rĩ gá rá.
2 Úpí la ĩꞌdi andre tẽ ãzíla ĩꞌdi ídri ĩꞌdidrị̂ tãmba nĩ;
ĩꞌdi ĩꞌdiní sụ̃sụ́ wi ãngũ drị̃ gá ꞌdâ rá
ãzíla ĩꞌdi ĩꞌdi pa mẹ́rọ́ꞌbá ĩꞌdidrị̂ kí drị́gá rá.
3 Úpí la ĩꞌdi ãzãko gbọ́lọ́ ĩꞌdidrị́ ãyánĩ drị̂ drị̃ gá rá
ãzíla ĩꞌdi ĩꞌdi adrí ãlá ru nĩ.
4 Ájọ, “Úpí, mí andré áma ízákĩzã fô,
mí adrí ma ãꞌdusĩku má iza ị́jọ́ mị́rụ́ rá!”
5 Mẹ́rọ́ꞌbá mádrị̂ kí ị́jọ́ jọ márụ́ ásị́ ũnzí sĩ.
Kí jọ la, “Ĩꞌdi dó drã ãꞌdụtụ́ rụ́ la ní sĩ ãvĩjó?”
6 ꞌBá ãzí drĩ amụ́ áma ndrelé ĩꞌdi amụ́ ásị́ ị̃rị̃ sĩ,
ĩꞌdi ị́jọ́ ũnzí la kí tra áma drị̃ gá;
ꞌdã ꞌbã ũngúkú gá ĩꞌdi dó mụ rá ãzíla ĩꞌdi dó ị́jọ́ la kí iré ãngũ pírí ga.
7 Mẹ́rọ́ꞌbá mádrị̂ kí pírí ị́jọ́ jọ
áma drị̃ gá yõkõlé sĩ kí drĩdríŋĩ gá;
kí ị́jọ́ ũnzíkãnã rĩ kí ũrã áma drị̃ gá áyụ,
8 kí jọ la, “Ãyánĩ ĩꞌdidrị̂ dó ũnzí,
icó dó sĩ angálé gbọ́lọ́ sị́ gâlé ku.”
9 Átã mâ wọ̃rị́ mgbã mání sĩ ásị́ tị̃jó drị̃ la gá,
íná nalépi má be ãlu rĩ,
uja ru áma mẹ́lẹ́ mbelé nĩ.
10 Wó Úpí mí andré áma ízákĩzã fô, mí inga ma ụrụgá,
ma dó sĩ áma ãrígọ́tị ũfẽ mẹ́rọ́ꞌbá mádrị̂ kí ụrụꞌbá gá benĩ.
11 Icó kí dó sĩ áma ndẽlé ku,
ma dó sĩ nị̃ la rá mi mání ãyĩkõ sĩ.
12 Mání ị́jọ́ múké rĩ idéjó rĩ sĩ, mi áma ãzãko mi ꞌi,
mi áma tãmba ími andre gá jãꞌdâ.
13 Ị́cụ́ Úpí, Ãdróŋá Ịsịrayị́lị̃ drị̂ ꞌi!
Ị́cụ́ ĩꞌdi jãꞌdâ! Ámĩnã! Ámĩnã!