Bụ́kụ̃ ị̃rị̃ rĩ
42
Ásị́ tị̃ŋá mádrị̂ ĩꞌdi Ãdróŋá drị̃ gá
1 Yéré ꞌbã ị̃yị́ dịlépi ị̃gbẹ́ rĩ vị́ tajó rĩ áni,
ị́jọ́ ꞌdĩ sĩ, áma ídri la Ãdróŋá ími vị́ ta.
2 Ma Ãdróŋá ími vị́ ta, Ãdróŋá ídri rĩ vị́ ta,
ma dó mụ Ãdróŋá drị̃lẹ́ gá sĩ ĩꞌdi ị̃nzị̃jó ãꞌdụtụ́?
3 Ma awá ị̃tụ́ kí ị́nị́ be,
mị́ndrẹ mádrị̂ acá dó mání íná ru;
sáwã pírí sĩ mẹ́rọ́ꞌbá mádrị̂ kí áma zị,
“Ãdróŋá mídrị̂ dó íngõlé yã?”
4 Áma ásị́ la dó nũ-nũ
ádrĩ ị́jọ́ ándrá ídu
mání mụjó ũꞌbí kí abe,
sĩ kí drị̃ ꞌdejó jó Ãdróŋá drị̂ agá
úzáŋá trũ ãyĩkõ sĩ ãzíla ãwãꞌdĩfô fẽŋá trũ
ũꞌbí ꞌbaní ụ̃mụ̃ najó rĩ kí agá rĩ gá.
5 Ma dó uꞌá ũcõgõ sĩ ãꞌdu sĩ?
Ãꞌdu la dó mání ũcõgõ fẽ nĩ?
Ma ásị́ ꞌbã Ãdróŋá drị̃ gá,
ị́jọ́ ꞌdĩ sĩ ma dó ĩꞌdi ịcụ́ rá,
ĩꞌdi ꞌbá áma palépi rĩ ãzíla
6 Ãdróŋá mádrị̂.
Áma ásị́ la dó nũ agá agá ru;
ị́jọ́ ꞌdĩ sĩ ma dó ími ị́jọ́ ũrã áyụ;
ãngũ Yõrĩdánĩ drị̂ agá ãzíla
ꞌbé Hẹ̃rị̃mọ́nị̃ drị̂ ꞌbã drị̃ gâlé
angájó ꞌbé Mízã gá.
7 Ãpẽ ãlụ́kụ́kụ̃ ũcõgõ drị̂ dịlé áma ídri drị̃gâsĩ;
Ị̃yị́ ꞌdelépi kụ̃rụ̃ rĩ ꞌbã ụlé rĩ áni;
ungaŋá la tũlã-tũlã rĩ ãzíla umvúŋá la abe
dị kí áma drị̃gâsĩ.
8 Úpí la lẽtáŋá ĩꞌdidrị́ ukólépi ku rĩ iꞌda ị̃tụ́ sĩ,
ị́nị́ sĩ ma úngó ĩꞌdidrị̂ kí ngo,
ma Ãdróŋá mání ídri fẽlépi rĩ zị.
9 Ázị Ãdróŋá mádrị́ áma tãmbalépi rĩ ꞌi,
“Mí ãvĩ dó ị́jọ́ áma drị̃ gá íni ãꞌdu ị́jọ́ sĩ?”
“Mã dó mụ ũcõgõ ịsụ́ŋá trũ
mẹ́rọ́ꞌbá mádrị̂ ꞌbadrị́ íni ãꞌdu ị́jọ́ sĩ?”
10 Mẹ́rọ́ꞌbá mádrị̂ kí áma uꞌdá,
úꞌdáŋá ĩꞌbadrị̂ ĩꞌdi cécé ménéŋá ꞌbã áma ĩfãkã sõjó rĩ áni,
kí má rụ́ ị́jọ́ jọ ị̃tụ̂rụ̃ sĩ áma zịjó,
“Ãdróŋá la mídrị̂ dó íngõlé?”
11 Ma dó uꞌá ũcõgõ sĩ ãꞌdu sĩ?
Ãꞌdu la mání ũcõgõ fẽ nĩ yã?
Ma dó mụ ásị́ ꞌbãlé Ãdróŋá drị̃ gá,
ma mụ ĩꞌdi ịcụ́lé pâlé ãlu ĩꞌdi,
ĩꞌdi ꞌbá áma palépi rĩ ꞌi ãzíla Ãdróŋá mádrị̂ ꞌi.