44
Ãdróŋá drị́ ãzãkoma aꞌị́jó
1 Ãdróŋá ãma are ị́jọ́ ꞌdĩ ãma bị́lẹ́ sĩ rá;
ãma áyị́pịka nze kí ãmaní ị́jọ́
míní idélé ãmbogo ãmbogo ụ́ꞌdụ́ ĩꞌbadrị̂ agá
ụ́ꞌdụ́ ándrá ídu ꞌdã kí sĩ rĩ kí vú rá.
2 Ídro ándrá sụ́rụ́ kí ãmvé ími drị́ sĩ
ãzíla íꞌbã ãma áyị́pịka kí ãngũ ꞌdã gá;
Mí andi ándrá sụ́rụ́ ꞌdã kí rá,
ífẽ ándrá dó sĩ ãma áyị́pịka ꞌbaní drị̃lẹ́ba,
3 adru ꞌbá mídrị̂ ndẽ kí ꞌbá ꞌdã kí sĩ ãngũ ꞌdã ꞌdụjó ménéŋá sĩ la ku,
adru drị́ ĩꞌbadrị̂ ají ándrá ũkpõ sĩ ãꞌdị́ ndẽjó nĩ la ku,
ĩꞌdi ándrá ũkpó ãzíla ãvẹ̃vị̃ drị́ mídrị́ ãndá rĩ drị̂ ꞌi,
ãzíla dị̃zã ími androko gá rĩ iꞌda ílẽ kí rá.
4 Mi úpí mádrị́ mání ãzị́ ngajó ĩꞌdiní rĩ ꞌi ãzíla mi Ãdróŋá mádrị́ mání ị̃nzị̃lé rĩ ꞌi;
mi ꞌbá Ịsịrayị́lị̃ drị̂ ꞌbaní patáŋá fẽlépi rĩ ꞌi,
5 ãzíla ũkpó mídrị̂ sĩ ãndẽ mẹ́rọ́ꞌbá ãmadrị̂ kí rá.
Ími rụ́ sĩ ãma atu ꞌbá ãma lẽlépi ku rĩ kí pá sĩ.
6 Áꞌbã ásị́ ụ́sụ mádrị̂ drị̃ gá ku;
ménéŋá mádrị̂ pa ma nĩ ku,
7 wó ípa ãma angájó mẹ́rọ́ꞌbá ãmadrị̂ kí drị́gá,
ãzíla índẽ vâ ꞌbá ãma ngụ̃lépi ũnzí rĩ kí rá.
8 Ãma ụ́ꞌdụ́ pírí sĩ Ãdróŋá mîsĩ ãfó sĩ
ãzíla ãma ími rụ́ ịcụ́ jãꞌdâ.
9 Wó úꞌdîꞌda ígã dó ãma úmgbé ãzíla ífẽ úndẽ dó ãma rá;
mí acị́ dó ãsĩkárĩ ãmadrị̂ kí abe ku.
10 Ífẽ ãmaní apálé mẹ́rọ́ꞌbá ãmadrị̂ ꞌbadrị́,
ãzíla mẹ́rọ́ꞌbá ãmadrị̂ ra kí dó ãko ãmadrị̂ kî rá.
11 Ífẽ dó ãma ụlị́lé kãbĩlõ áni,
mí iré dó ãma sụ́rụ́ ãmị́yọ́ŋá ꞌbadrị̂ kí agá.
12 Mí ụzị ꞌbá mídrị́ mgbãrĩ kí ãjẹ̃ wereŋá sĩ
cécé kí ꞌbã rĩ málĩ ãjẹ̃ kọ́lị la rĩ áni.
13 ꞌBá ãmã jĩránĩ rú rĩ ndre kí ị́jọ́ míní idélé ãma ụrụꞌbá gá rĩ kí rá,
kí ãma uꞌdá uꞌdâ ãzíla kí ãma gụgụ̃.
14 Ífẽ ãma acá dó idemará ru sụ́rụ́ kí drĩdríŋĩ gá;
kí drị̃kã yã sĩ ãma idejó.
15 Ụ́ꞌdụ́ pírí sĩ ma ị̃nzị̃táŋá ãkõ isụ́;
drị̃nzá aku áma drị̃ cí,
16 angájó nzụmasụ́ ãzíla úꞌdáŋá mání arelé
mẹ́rọ́ꞌbá ãzíla ꞌbá ãma ngụ̃lépi ũnzí rĩ ꞌbadrị́ rĩ sĩ.
17 Ị́jọ́ ꞌdĩ idé kí ru pírí ãma rụ́,
ãmaní táni ími ị́jọ́ ãvĩjó ku
jõku tị icíma ãmaní icílé mî trũ rĩ nũjó ku rá tí,
18 ãma uja drĩ ãma ásị́ vúlé ku,
ãgã drĩ gẹ̃rị̃ mídrị̂ kí ku.
19 Wó tí mí aꞌbe ãma ãzãkoma kóru ãnãkpá ásé agá rĩ kí agá;
mí aku ãma ãngũ ịnị kị́rị́ drã drị̂ agá.
20 Ãdrĩ tá ị́jọ́ ãvĩ Ãdróŋá ãmadrị̂ ꞌbã rụ́ drị̃ gá rá,
ãdrĩ tá dó sĩ ãdróŋá ãmị́yọ́ŋá ꞌbadrị̂ kí ị̃nzị̃ la,
21 Ãdróŋá mí icó tá ị́jọ́ ꞌdĩ nị̃lé rá,
ãꞌdusĩku ínị̃ ị́jọ́ ru zị̃lépi ãma ásị́ gá rĩ kí ce.
22 Wó ála ãma ụꞌdị́ ími ị́jọ́ sĩ ụ́ꞌdụ́ pírí,
úꞌbã ãma cécé kãbĩlõ ụlị́lé ụlị́ ụlị̂ rĩ kî áni.
23 Úpí mí ángá fô, mi ụ́ꞌdụ́ ko ãꞌdu ị́jọ́ sĩ yã?
Mí inga mi, ígã áma jãꞌdâ ku fô!
24 Mi ími mẹ́lẹ́tị zị̃ ãma sĩ íni ãꞌdu ị́jọ́ sĩ yã?
Mí ãvĩ drị̃cị́rị̃ ãzíla ũcõgõ ãmadrị̂ ku fô!
25 Ãma uꞌde vụ̃rụ́ pụ́trụ́ agá;
ãma kụ̃bụ̃ ĩbĩ ru vũ be cí.
26 Mí amụ́ ãma ãzã kolé!
Ípa ãma lẽtáŋá mídrị́ ukólépi ku rĩ sĩ.