45
Úngó ngolé ũkú ĩgbãŋá úpí drị̂ sĩ rĩ
1 Áma ásị́ ga tré ị́jọ́ mídrị́ ũnĩ-ambamba rĩ kî sĩ,
ángo dó sĩ úngó ꞌdĩ úpí nî;
áma ĩdra ĩꞌdi cécé kãlámũ ꞌbá ãko sĩlépi ãlá ãlị̃gọ̃ sĩ rĩ drị̂ áni.
2 Mi ꞌbá ãgọbị kí agá ndẽlépi ũnĩ sĩ rá rĩ ꞌi;
mi ị́jọ́ jọ tị ãlá sĩ;
ị́jọ́ ꞌdĩ sĩ Ãdróŋá fẽ dó míní drị̃lẹ́ba jãꞌdâ rĩ ꞌi.
3 Ísu ménéŋá mídrị̂ ími ụ́pụ́cẹ́ gá úpí ũkpó ꞌdị́pị,
mi dị̃zã rú ãzíla ãmbógó ru.
4 Ị̃nzị̃táŋá mídrị̂ sĩ ícẹ̃ sĩ mụjó ãꞌdị́ ndẽjó,
mi dó sĩ ị́jọ́ mgbã ãzíla ị́jọ́ lịŋá pịrị rĩ kí tãmba ị́jọ́ ãlá rĩ kí abe!
Lẽ ũkpó mídrị̂ ꞌbã fẽ ụ̃rị̃ mẹ́rọ́ꞌbá mídrị̂ ꞌbaní!
5 ꞌÉ mídrị̂ kí sị́ ãcí ru, kí mẹ́rọ́ꞌbá úpí drị̂ kí ásị́ gbẹ trã;
sụ́rụ́ pírí ꞌbã aꞌdé kí vụ̃rụ́ ími pálé gá.
6 Ãdróŋá, úmvúke mídrị̂ la uꞌá jãꞌdâ,
túré mídrị́ ị́jọ́ lịjó mgbã rĩ la sụ́rụ́ kí tãmba nĩ.
7 Ílẽ ị́jọ́ pịrị rĩ áyụ wó íngụ̃ ị́jọ́ ũnzí rĩ ũnzí;
ị́jọ́ ꞌdĩ bãsĩ Ãdróŋá, Ãdróŋá mídrị̂ ꞌbã sĩ ími pẽjó
sĩ ãdu ãyĩkõ drị̂ ũsũjó ími drị̃ gá ndẽ mî wọ̃rị́ka kí pírí rá ꞌdĩ.
8 Ûyã bõngó mídrị̂ kí pírí ãdu ãjị́ ngụ̃lépi vĩrĩ rĩ sĩ ãzíla lũbánĩ sĩ;
ꞌbá úngó colépi ụ̃ꞌdị́ sĩ rĩ fẽ kí míní ãyĩkõ
jó úpí drị́ uꞌbélé ĩwá sị́ sĩ rĩ gá;
9 ũkú mídrị́ ị̃nzị̃lé ị̃nzị̃ rĩ kí agá, izonzi ũpi ꞌbadrị̂ kí cí
ãzíla úmvúke mídrị̂ ꞌbã drị́ ãndá rĩ gá, ũkú úpí drị̂ tu pá ãzíla sụ̃ ru ãko idélé gólũdĩ sĩ lẽrẽ-lẽrẽ la sĩ.
10 Má ị̃zẹ́pị mí are drĩ ị́jọ́ mání jọlé rĩ;
mí ãvĩ ꞌbá mídrị̂ kí ị́jọ́ kãká kí abe rá.
11 Ũnĩ mídrị̂ fẽ úpí ní ími lẽjó nĩ,
ĩꞌdi ãmbógó mídrị̂ ꞌi, mí are tị lâ ꞌi.
12 ꞌBá Tụ́rọ̃ gá rĩ kí míní fẽtáŋá ajị́,
ꞌbá málĩ trũ rĩ kí lẽ wọ̃rị̃ sịlé mí be.
13 Ĩzóŋá úpí ꞌbã lẽlé ĩgbãlé rĩ ĩꞌdi ũnĩ-ambamba rú ĩꞌdidrị́ jó agâlé;
úcã bõngó ĩꞌdidrị̂ kí gólũdĩ sĩ.
14 Bõngó ĩꞌdidrị́ uꞌbélé ũniyamba rĩ trũ âgụ ĩꞌdi úpí rụ̂lé,
ũtá ĩꞌdidrị́ bíkĩrã rú rĩ ꞌde kí ĩꞌdi vú gâsĩ,
ãzíla ají kí ĩꞌdi úpí rụ́.
15 Úꞌde kí drị̃ ãyĩkõ sĩ ãzíla ũnũŋá trũ;
fi kí dó sĩ úpí drị́ lị́cọ́ gâlé.
16 Úpí mádrị̂, anzị mídrị̂ kí acá úpí ru ĩꞌbã áyị́pịka kí kẹ̃jị́ gá;
mi kí ũꞌbã drị̃lẹ́ ru ãngũ drị̃ gá ꞌdâ pírí.
17 Ma ími ịpị́ ꞌbá mụlé tịlé drị̃lẹ́ gâlé rĩ ꞌbání jãꞌdâ,
ãzíla ꞌbá pírí kí ími ịcụ́ sáwã pírí sĩ.