46
Ãdróŋá ĩꞌdi ãngũ ãmaní sĩ ãma zị̃jó rĩ ꞌi
1 Ãdróŋá ĩꞌdi ꞌbá ãmaní apájó ãma zị̃jó ĩꞌdi rụ́ rĩ ꞌi,
ụ́ꞌdụ́ pírí sĩ ĩꞌdi bábá sĩ ãma ãzã kojó ị́jọ́ ãma ịsụ́lépi rĩ kí agá.
2 Ị́jọ́ ꞌdĩ sĩ ãma icó dó idélé ụ̃rị̃ sĩ ku, ụ̃nọ́kụ̂ drĩ táni ru aya íngoní tí,
ꞌbé drĩ kí táni uꞌde mĩrĩ kị́rị́ rĩ kí agá tí;
3 mĩrĩ drĩ kí táni nu agá nunũ ãzíla kọ̃bụ́tọ̃ drĩ táni ãfũ agá,
ꞌbé drĩ kí táni ru aya agá sáwã ũmbã drị̂ sĩ tí.
4 Ị̃yị́ dịlépi dị̃-dị̃ ãyĩkõ fẽlépi táwụ̃nị̃ ãmbógó Ãdróŋá drị̂ ní rĩ
dị ãngũ ãlápítí Ãdróŋá Ụrụgá Ãndânĩ rĩ ꞌbãsĩ uꞌájó alagá rĩ gá.
5 Ãdróŋá ĩꞌdi táwụ̃nị̃ ãmbógó ꞌdĩ agá cí, ãzíla táwụ̃nị̃ ꞌdĩ icó andilé ku;
ãngũ sãrã sĩ Ãdróŋá la amụ́ sĩ ĩꞌdiní ãzãkoma fẽlé.
6 Ãdróŋá la ị́jọ́ jọ cécé ãvi ꞌbã ụ̃kpẹ̃jó rĩ áni ãzíla ụ̃nọ́kụ̂ la aká ị̃yị́ ru.
Sụ́rụ́ acá kí ụ̃rị̃ sĩ ãzíla ũpi kí yã yã.
7 Úpí Ũkpó ꞌDị́pị ĩꞌdi ãma abe cí;
Ãdróŋá Yãkóꞌbõ drị̂ ĩꞌdi ꞌbá ãmaní apájó ãma zị̃jó ĩꞌdi rụ́ rĩ ꞌi.
8 Ĩmi amụ́ ị́jọ́ Úpí ꞌbã idélé rĩ kí ndrelé.
Ĩndre ị́jọ́ ụ̃sụ̃táŋá ru ĩꞌdi ꞌbã idélé ụ̃nọ́kụ́ drị̃ gá ꞌdĩ kî.
9 Fẽ ãꞌdị́ ụ̃nọ́kụ́ drị̃ gá ꞌdâ rĩ de kí ru pírí;
anu ụ́sụ kí ãjụ́ kí abe rá,
ivé gọ́bẹ́rẹ́ ãꞌdị́ drị̂ kí ãcí sĩ rá.
10 Ĩmi adru dríŋá, ãzíla lẽ ĩnị̃ rá ma Ãdróŋá ꞌi;
ála mụ áma ị̃nzị̃lé sụ́rụ́ kí agâ sĩ,
ála mụ áma rụ́ ingalé ụ̃nọ́kụ́ drị̃ gá ꞌdâ.
11 Úpí Ũkpó ꞌDị́pị ĩꞌdi ãma abe cí;
Ãdróŋá Yãkóꞌbõ drị̂ ĩꞌdi ꞌbá ãmaní apájó ãma zị̃jó ĩꞌdi rụ́ rĩ ꞌi.