48
Zị̃yọ́nị̃ ĩꞌdi táwụ̃nị̃ ãmbógó Ãdróŋá drị̂ ꞌi
1 Úpí ĩꞌdi ãmbógó ru, lẽ ị́cụ́ ĩꞌdi ásị́ pírí sĩ
táwụ̃nị̃ ãmbógó Ãdróŋá ãmadrị̂ drị̂ agá, ꞌbé ĩꞌdidrị́ ãlá rĩ gá.
2 ꞌBé Ãdróŋá drị́ Zị̃yọ́nị̃ ĩꞌdi ũnĩ-ambamba rú ãzíla wị́lị́wị́lị́;
ĩꞌdi táwụ̃nị̃ ãmbógó Úpí ãmbógó rĩ drị̂ ꞌi.
3 Táwụ̃nị̃ ꞌdã agá, Ãdróŋá
iꞌda ru ꞌbá ĩꞌdi tãmbalépi rĩ rú,
4 ãꞌdusĩku ũpi tra kí ãsĩkárĩ ĩꞌbadrị̂ kí ãngũ ãlu gá,
amụ́ kí dó sĩ táwụ̃nị̃ ãmbógó ꞌdã celé.
5 Kí dó mụ ĩꞌdi ndrelé ꞌbo, acá kí dó ụ̃sụ̃táŋá sĩ;
ụ̃rị̃ rụ dó kí ãzíla apá kí dó sĩ rá.
6 ꞌDãá iꞌdó kí dó yãlé yã-yã,
ri kí dó ãzá ĩtrĩkãlé cécé ũkú mụlépi ngọ́tị́ tĩlépi rĩ ꞌbã ĩtrĩkãlé rĩ áni.
7 Mí andi kí cécé mẹ́lị̃ Tãrãsísĩ gá
andilépi ãlụ́kụ́kụ̃ angálépi ị̃tụ̂ ꞌbã ãfũ agâlé ru rĩ sĩ rĩ áni.
8 Cécé ãmaní arelé ꞌbo rĩ áni,
ãndre vâ ãma mịfị́ sĩ rá,
táwụ̃nị̃ Úpí Ũkpó ꞌdị́pị drị̂ gá,
táwụ̃nị̃ ãmbógó Ãdróŋá ãmadrị̂ drị̂ agá,
Ãdróŋá la fẽ la ĩꞌdi pá tu ũkpó ru jãꞌdâ.
9 Ãdróŋá, jó ími ị̃nzị̃jó rĩ agá,
ãma ị́jọ́ ũrã lẽtáŋá mídrị́ ukólépi ku rĩ drị̃ gá.
10 Ãdróŋá, cécé ími rụ́ ꞌbã kụlé rĩ áni,
ꞌbá kí ími ị̃nzị̃ ãngũ drị̃ gá ꞌdâ pírí.
Drị́ mídrị́ ãndá rĩ ga tré ị́jọ́ mídrị́ ãlá rĩ kí sĩ.
Mi ꞌbá kí drị̃ ce ị́jọ́ lịŋá pịrị rĩ sĩ.
11 Ị́jọ́ lịŋá mídrị́ pịrị rĩ sĩ,
lẽ ꞌbá ꞌbé Zị̃yọ́nị̃ gá rĩ ꞌbã uꞌá kí ãyĩkõ sĩ,
lẽ ꞌbá tọ̃rọ́mẹ́ Yụ́dã drị̂ agá rĩ ꞌbã uꞌá kí ãyĩkõ sĩ.
12 Ĩmi ꞌbá Ãdróŋá drị́ ꞌdĩ, ĩmi apí Zị̃yọ́nị̃ ꞌi,
ĩlã gõrófã ala gá rĩ kî,
13 ĩmi amá drĩ bõrõ ĩꞌdidrị́ sịlé mére rú rĩ,
ĩmi acị́ ãzíla ĩmi undré ꞌa la,
ĩmi dó sĩ ị́jọ́ la vú nze anzị ĩmidrị́ drị̃lẹ́ gâlé rĩ ꞌbanî,
14 ãꞌdusĩku Ãdróŋá ꞌdĩ ĩꞌdi Ãdróŋá ãmadrị́ jãꞌdâ rĩ ꞌi,
ĩꞌdi ãma drị̃ ce jãꞌdâ kpere ãmaní ũdrã agâ.