49
Ĩꞌbã ásị́ málĩ drị̃ gá ku
1 Ĩmi are, ĩmi ꞌbá pírí uꞌálépi ãngũ drị̃ gá ꞌdĩ;
ĩmi are, ĩmi ꞌbá pírí ãngũ drị̃ gá ꞌdĩ,
2 ꞌbá ãmbogo rĩ kí ꞌbá nírí kí abe,
ꞌbá kụ́rẹ́nị́ rĩ kí ꞌbá lẽmẽrí rĩ kí abe pírí,
3 ma mụ ị́jọ́ ũndũwã drị̂ kí jọlé;
ũrãtáŋá angálépi áma ásị́ gá rĩ la nị̃táŋá fẽ.
4 Ma mụ áma bị́lẹ́ ꞌbãlé sĩ ị́jọ́ uꞌbélé rĩ arejó;
ma mụ ífí la ujalé ụ̃ꞌdị́ mání colé rĩ sĩ.
5 Má icó idélé ụ̃rị̃ sĩ sáwã ị́jọ́ ũnzí ꞌbã áma ịsụ́jó rĩ sĩ ku,
mẹ́rọ́ꞌbá mádrị̂ drĩ kí táni áma ce ágágá rá tí.
6 Kí ꞌbá ásị́ ꞌbãlépi málĩ ĩꞌbadrị̂ kí drị̃ gá,
ru ũnũlépi málĩ ĩꞌbadrị́ ĩyõ rĩ kî sĩ rĩ kî.
7 ꞌBá ãzí icó ꞌbá ãzí ꞌbã ídri unzelé Ãdróŋá drị́ ku,
jõku icó ídri ĩꞌdidrị̂ ĩgbãlé ãjẹ̃ ídridrị̂ ũfẽŋá sĩ ku,
8 ãꞌdusĩku ídri ꞌbádrị̂ ꞌbã ãjẹ̃ ambamba,
ꞌbá ãzí icó dó sĩ calé ũfẽŋá la gá
9 sĩ adrujó ídri ru jãꞌdâ
drãjó ku la ku.
10 ꞌBá pírí ndre kí ꞌbá ũndũwã trũ rĩ kí ũdrã-ũdrã rĩ gá cé;
ꞌbá azalépi aza-ãzã rĩ kí ꞌbá úŋmĩ kóru rĩ kí abe kí vâ ị̃lị̃kị̃ ãlu ꞌdĩ ꞌbã áni
ãzíla kí málĩ ĩꞌbadrị̂ kí aꞌbe ꞌbá ãzí ndú la ꞌbanî.
11 Ĩnádrị̃ ĩꞌbadrị̂ kí ace jó ĩꞌbadrị̂ kî rú jãꞌdâ,
kí adru ꞌdãá ãsị̃ŋá kóru,
drĩ kí táni adru ĩꞌbã ãngũ kí trũ rá tí.
12 ꞌBá ꞌbã málĩ drĩ táni adru íngõpí tí, icó ꞌbãngá ru palé drã drị́ ku;
ĩꞌdi drã cécé ãnãkpá ꞌbã kí drãlé rĩ áni.
13 ꞌDĩ ị́jọ́ ru idélépi ꞌbá apị́lépi gẹ̃rị̃ ĩꞌbadrị̂ kí sĩ cénĩ-cénĩ rĩ ꞌbarụ́
ꞌbá ị́jọ́ ãfũlépi kí tị gá rĩ kí vú ũbĩlépi rĩ kí abe rĩ ꞌi.
14 Kí mụ ũdrãlé cécé kãbĩlõ áni sĩ fijó ĩnádrị̃ gá,
drã la mụ kí ucélé nĩ
ụ̃ꞌbụ́tị sĩ ꞌbá ãlá Ãdróŋá drị̂ kí mụ kí drị̃ celé nĩ.
Kí ụrụꞌbá la mụ ŋmalé ĩnádrị̃ agá
ãngũ ꞌbá ũdrãlépi rá rĩ ꞌbã kí sĩ adrujó rĩ gá rá-rá ru lị́cọ́ ĩꞌbadrị̂ kí abe.
15 Wó Ãdróŋá la mụ ídri mádrị̂ unzelé ãngũ drãdrị̂ agá rĩ sĩ nĩ;
ãndá ãndá ru ĩꞌdi mụ áma ꞌdụlé ĩꞌdi rụ̂lé nĩ.
16 Mí adru ụ̃rị̃ sĩ ꞌbá ãzí ní acájó kụ́rẹ́nị́ rĩ sĩ ku,
málĩ ĩꞌdidrị̂ drĩ kí táni lị́cọ́ ĩꞌdidrị̂ ní ãrútáŋá ají rá tí;
17 ãꞌdusĩku sáwã ĩꞌdi ꞌbã drãjó rĩ sĩ, icó ãko ãzí ꞌdụlé ĩndĩ ku;
málĩ ĩꞌdidrị̂ icó kí ĩꞌdi vú bĩlé ãrútáŋá be ꞌbụ́ gâlé ĩndĩ ku.
18 Ãyĩkõ drĩ táni ĩꞌdi fụ ĩꞌdiní adrujó drị̃lẹ́ba rú rĩ sĩ rá,
ꞌbá drĩ kí táni ĩꞌdi ịpị́ málĩ ĩꞌdidrị̂ kí sĩ rá tí,
19 ĩꞌdi mụ ĩꞌdi ꞌbã áyị́pịka ꞌbarụ̂lé drã agâ sĩ,
icó dị̃zã ndrelé ị̃dị́ ku.
20 ꞌBá ru ũnũlépi málĩ ĩꞌbadrị̂ kí sĩ rĩ icó kí vãlé la kí mụ drãlé rá rĩ gá ku;
kí mụ drãlé cécé ãnãkpá áni.