54
Ásị́ tị̃jó Ãdróŋâ drị̃ gá ị́jọ́ ꞌbá ịsụ́lépi rĩ sĩ
1 Ãdróŋá, ípa ma ũkpõ mídrị̂ sĩ;
ímba áma tã ũkpõ mídrị́ ãmbógó rĩ sĩ.
2 Ãdróŋá, mí are zịtáŋá mádrị̂ ꞌi;
mí are ị́jọ́ ãfũlépi áma tị gá rĩ.
3 Ãmị́yọ́ŋá kí ãꞌdị́ ꞌdị má be;
ꞌbá asị́ ũnzí rĩ kí áma ndrụ̃ ꞌdịlé;
ꞌdi kí ꞌbá ásị́ ꞌbãlépi Ãdróŋâ drị̃ gá ku rĩ kî.
4 Índre, Ãdróŋá ĩꞌdi ꞌbá áma ãzãkolépi rĩ ꞌi.
Úpí la áma tãmba nĩ.
5 Lẽ ị́jọ́ ũnzí mẹ́rọ́ꞌbá mádrị̂ ꞌbã kí itúlé áma drị̃ gá rĩ ꞌbã uja ru kí drị̃ gá;
Ãdróŋá, mí ị̃lị̃kị̃ kí cécé míní azịlé rĩ áni.
6 Ma ídétáŋá fẽlé cénĩ rĩ idé mínî,
ma ími rụ́ ịcụ́ Úpí,
ãꞌdusĩku mi múké.
7 Ípa ma ũcõgõ mádrị̂ kí agá pírí rá,
ãzíla ándre mẹ́rọ́ꞌbá mádrị̂ kí ndẽ agá rá.