55
Ífẽ ũcõgõ mídrị̂ kí Úpí drị́
1 Ãdróŋá, mí are ị́jọ́ mání zịlé rĩ,
ígã jõ ị́jọ́ mání zịlé ími tị gá rĩ ku fô!
2 Mí are ma ãzíla mí umvi ma;
má ãndẽ ị́jọ́ ũrãlé ũcõgõ sĩ rĩ sĩ rá,
3 ụ́ꞌdụ́kọ́ mẹ́rọ́ꞌbá mádrị̂ ꞌbadrị̂ sĩ,
gụŋá ꞌbá ũnzí rĩ ꞌbã kí áma gụjó rĩ ají mání ũcõgõ,
kí uꞌá mání ũmbã sĩ ãzíla ngụ̃ kí ma ũnzí.
4 Ị́jọ́ la áma ásị́ lị agá agá ru,
ụ̃rị̃ drãdrị̂ rụ dó ma rá.
5 Áma ụrụꞌbá la yã ụ̃rị̃ sĩ yã-yã,
áma ụrụꞌbá yãŋá icó dó pá tulé ku.
6 Ádrĩ tá mání adru agá ụ́pụ́pị́ trũ ãlĩꞌbõ drị̂ áni la tá múké!
Ma tá dó mání nga sĩ avị́jó.
7 Ma tá dó mání nga álị́;
lị́cọ́ mádrị̂ la tá dó sĩ adru kõtórõ agâlé.
8 Ma tá apá ãngũ sĩ uꞌá jó la ịsụ́jó gbõrú
ãlụ́kụ́kụ̃ áma lilépi rĩ rụ́ rĩ sĩ álị́.
9 Úpí, ífẽ mẹ́rọ́ꞌbá mádrị̂ kí drị̃ ꞌbã iza ru rá ãzíla ị́jọ́ ĩꞌbaní ụ̃tị̃lé rĩ ꞌbã nga kí ãzị́ ku;
ãꞌdusĩku ándre ãꞌdị́ kí ꞌbá ꞌbaní ãwãjó rĩ be táwụ̃nị̃ agá ꞌdãá cí.
10 ꞌBá ãngũ andre ũtẽlépi rĩ kí acị́ táwụ̃nị̃ agâsĩ ị̃tụ̂rụ̃ ãzíla ị́nị́ ãrã,
wó ị́jọ́ ũnzí kí ũcõgõ be ga kí táwụ̃nị̃ agá tré.
11 Kí ãko andi ãngũ pírí agá;
kí ꞌbá kí ĩkpã ãzíla ãrámũ na gẹ̃rị̃ agâ sĩ.
12 Drĩ tá adru mẹ́rọ́ꞌbá la áma uꞌdá nĩ la,
ma tá ta la rá;
drĩ tá adru mẹ́rọ́ꞌbá la ru ịpị́ yã áni,
ma tá áma zị̃ agâ ĩꞌdi sĩ rá.
13 Wó ĩꞌdi ꞌbá ãzí cécé mâ áni la,
ĩꞌdi ꞌbá uꞌálépi má be la ãzíla mâ wọ̃rị́ mgbã la.
14 Ãma ándrájõ tị icíma idé ĩꞌdi be,
ãma ándrá Ãdróŋá ị̃nzị̃ ĩꞌdi be jó Ãdróŋá drị̂ agá.
15 Ífẽ mẹ́rọ́ꞌbá mádrị̂ ꞌbã ũdrã kí ĩꞌbaní vúlé gá ĩꞌbaní nị̃ŋá kóru;
ꞌbã fi kí ꞌbụ́ gâlé ídri-ídri rú;
ãꞌdusĩku ị́jọ́ ũnzí la uꞌá ĩꞌbadrị́ lị́cọ́ gá ãzíla kí ásị́ gá.
16 Wó ma Ãdróŋá umve,
ãzíla Úpí la áma pa rá.
17 Ụ̃ꞌbụ́tị sĩ, ị̃tụ́ ágágá ãzíla ĩndró sĩ,
ma awá ũcõgõ sĩ Ãdróŋá rụ́,
ãzíla ĩꞌdi áma ụ́ꞌdụ́kọ́ are rá.
18 Anzé ma ꞌébí kóru ãzíla mba áma tã rá,
angájó ãꞌdị́ mẹ́rọ́ꞌbá ꞌbã kí ꞌdịlé má be rĩ gá,
táni ꞌbá wẽwẽ rú kí ãꞌdị́ ꞌdị má be nĩ tí.
19 Ãdróŋá adrulépi Úpí ru jãꞌdâ rĩ,
ĩꞌdi áma are rá, ĩꞌdi ꞌbá ru ádrízã ujalépi ku,
ãzíla ĩꞌdi rulépi ku
ri kí iri vụ̃rụ́.
20 Mâ wọ̃rị̂ la ãꞌdị́ ꞌdị ĩꞌdi ꞌbã wọ̃rị́ka kí abe;
anu tị icíma ándrá ĩꞌdi bã icílé rĩ rá.
21 Tị la ũréꞌbílí ru ãꞌdu áni;
wó ásị́ la gâlé ngụ̃táŋá cí;
ị́jọ́ ãfũlépi tị la gá rĩ ũréꞌbílí ru ndẽ ãdu rá,
wó kí mgbã rĩ gá ménéŋá sị́ ãcí rĩ áni.
22 Mí aꞌbe tẹ́rị́ mídrị̂ kí Úpí drị́,
ĩꞌdi ími ãzã ko rá;
icó sáwã pírí sĩ ꞌbá ãlá rĩ fẽlé aꞌdélé vũ gá ku.
23 Wó Ãdróŋá la ꞌbá ũnzí rĩ kí ị̃sị̃ vũ gá ꞌbụ́ drãdrị̂ agá,
ꞌbá ꞌbá ãrí asulépi rĩ kí ꞌbá ĩnzõ jọlépi rĩ kí abe,
icó kí calé ílí tá ĩꞌbã kí uꞌájó ídri rú rĩ ꞌbã nụ́sụ̃ gá ku,
Wó mâ rú rĩ, áꞌbã ꞌbãngá ásị́ ími drị̃ gá.