6
Ãzãkoma zịjó Ãdróŋá tị gá sáwã ũcõgõ drị̂ sĩ
1 Úpí, mí uzá jõ áma drị̃ gá ũmbã sĩ ku,
ífẽ mání drị̃rịma ũmbã mídrị̂ sĩ ku!
2 Úpí, ími ásị́ ꞌba adru drĩ mání ị̃gbẹ́ ru ãꞌdusĩku ma ũkpõ kóru,
mí adrí ma Úpí, ãꞌdusĩku ma ũcõgõ agá.
3 Áma ásị́ cãndí ru,
Úpí, mi dó tẽ sáwã íngõpí sĩ áma ãzã kojó?
4 Úpí, mí amụ́ áma palé;
lẽtáŋá mídrị́ ukólépi ku rĩ sĩ ípa ma drã agá rĩ sĩ fô.
5 ꞌBá drãlépi rá rĩ icó ị́jọ́ ũrãlé ími drị̃ gá ku.
Ãꞌdi icó ími ịcụ́lé angájó ĩnádrị̃ agâlé nĩ yã?
6 Awájó ũcõgõ sĩ rĩ fẽ mání ãndẽlé ꞌbo;
ma gbọ́lọ́ mádrị̂ drị̃ ũsũ mị́ndrẹ sĩ ị́nị́-ãrã;
pị́lọ̃ mádrị̂ la ị̃mvụ̃ áma mị́ndrẹ sĩ.
7 Áma mịfị́ kí dó ũkpõ kóru ũcõgõ sĩ;
mẹ́rọ́ꞌbá ꞌbã kí áma fẽjó awájó rĩ sĩ.
8 Ĩmi ꞌbá ị́jọ́ ũnzí ngalépi ꞌdĩ, ĩmi ĩdã ĩmi má rụ́ ꞌdâ rĩ sĩ pírí rá,
ãꞌdusĩku Úpí are áma ụ́ꞌdụ́kọ́ mání sĩ awájó rĩ ꞌbo.
9 Úpí are mãmálá mání ꞌbãlé rĩ ꞌbo,
ãꞌị̃ ị́jọ́ mání zịlé ĩꞌdi tị gá rĩ rá.
10 Drị̃nzá la mẹ́rọ́ꞌbá mádrị̂ kí rụ pírí cãndí ãmbógó la be;
kí drị̃ la ru ꞌbe rá, kí gõ vúlé.