7
Ị́jọ́ lịŋá múké rĩ zịjó Úpî tị gá
1 Úpí Ãdróŋá mádrị̂, mi ãngũ mání sĩ áma zịjó ala gá rĩ ꞌi,
ípa ma ꞌbá áma ị̃ndụ́ ndrụ̃lépi rĩ kí drị́lẹ́ gá; mí anzé ma kí drị́lẹ́ gá,
2 jõ íni ku kí áma uce kẹ̃mị̃ ꞌbã ĩzá ucelé rĩ áni
ãzíla kí áma uce nírí-nírí, ꞌbá ãzí la adru áma palé yụ.
3 Úpí Ãdróŋá mádrị̂, ádrĩ ị́jọ́ ũnzí idé ꞌbá ãzí rụ́,
ádrĩ ꞌbá ãzí mẹ́lẹ́ mbe,
4 ádrĩ ũnzĩkãnã nga mâ wọ̃rị̂ rụ́
jõku ádrĩ mâ mẹ́rọ́ꞌbá ra ị́jọ́ ãzí kóru rá,
5 lẽ mẹ́rọ́ꞌbá mádrị̂ ꞌbã adro ma ãzíla ꞌbã rụ ma rá;
lẽ ꞌbã co ma káyĩ
ãzíla ꞌbã aꞌbe áma ãvũ pụ́trụ́ agá.
6 Úpí, mí angá ũmbã mídrị̂ trũ!
Mí angá ũmbã mídrị̂ trũ mẹ́rọ́ꞌbá mádrị̂ kí ụrụꞌbá gá;
Ãdróŋá mádrị̂, mí angá ãzíla ílị ị́jọ́ pịrị rĩ.
7 Mí atrá ꞌbá pírí kí ími andre gá,
ína ũpĩ kí drị̃lẹ́ gá angájó ꞌbụ̃ gâlé.
8 Úpí Ãdróŋá mi ꞌbá kí ị́jọ́ lị mi ꞌi.
Úpí Ãdróŋá ụrụgá ãndânĩ rĩ,
ma ị́jọ́ kóru, ílị áma ị́jọ́ mání ị́jọ́ pịrị ngajó rĩ sĩ.
9 Mi Ãdróŋá ãlá
ꞌbá ũrãtáŋá kí nị̃lépi ásị́sị́ŋá be cé rĩ,
Mí atrị ũmbã ꞌbá ũnzí rĩ ꞌbadrị̂ kí cí,
ãzíla ímba ꞌbá ãla rĩ kí tã fô!
10 Ãdróŋá ụrụgá ãndânĩ rĩ ĩꞌdi gọ́bẹ́rẹ́ mádrị̂,
ĩꞌdi ꞌbá ásị́ mgbã trũ rĩ kí pa rá.
11 Ãdróŋá ĩꞌdi ꞌbá ị́jọ́ lịlẹ́pi pịrị rĩ ꞌi,
Ĩꞌdi uꞌá ụ́ꞌdụ́ pírí sĩ ũmbã sĩ ꞌbá ị́jọ́ ũnzí idélé rĩ ꞌbaní.
12 Drĩ ásị́ uja ku,
Ãdróŋá la ménéŋá ĩꞌdidrị̂ sị́ jĩ,
ĩꞌdi ụ́sụ ĩꞌdidrị̂ tĩ sĩ kí ụgbẹ́jó rá.
13 Ãdróŋá itú ãko ĩꞌdidrị́ ãꞌdị́drị̂ kí ꞌbo,
itú ꞌé ĩꞌdidrị́ sị́ ãcí ru rĩ kí bábá.
14 ꞌBá ị́jọ́ ũnzí ꞌbã mbajó ala gá rĩ la ũnzĩkãnã tị
ãzíla ũnzĩkãnã la ĩnzõ tị.
15 ꞌBá ꞌbụ́ galépi ꞌbá ãzí ꞌba uꞌde kí rú sĩ ala gá rĩ
kí vúŋá la uꞌde ꞌbụ́ ꞌdã kí agá nĩ.
16 Ị́jọ́ ũnzí ĩꞌdi ꞌbã idélé ꞌbá ãzí ụrụꞌbá gá rĩ la ru uja ĩꞌdi ụrụꞌbá gá;
ãlí ĩꞌdi ꞌbã itúlé ꞌbá ãzí ụrụꞌbá gá rĩ la ru uja ĩꞌdi drị̃ gá.
17 Ma ãwãꞌdĩfô fẽ Úpí ní ãꞌdusĩku ĩꞌdi ị́jọ́ pịrị rĩ nga nĩ,
ma úngó ngo Úpí ụrụgá ãndânĩ rĩ ꞌbã rụ́ ịcụ́jó.