62
Tãmbaŋá ĩꞌdi lú Ãdróŋá agá
1 Úríndí mádrị̂ la lú ávị́ŋá ịsụ́ Ãdróŋá agá;
patáŋá mádrị̂ la angá ĩꞌdidrị́.
2 Ĩꞌdi lú áma tãmba ãzíla áma pa nĩ;
ĩꞌdi bõrõ mádrị́ ũkpó rĩ rú nĩ; ị́jọ́ ãzí icó dó sĩ áma ayalé ku.
3 Lẽ ĩmi pírí ꞌbã aꞌbe kí ãꞌdị́ ꞌdịŋá ꞌbá ãlu ũkpó kó ru,
cécé bõrõ andilépi rá rĩ áni rĩ be rĩ jã.
4 Kí ị́jọ́ itú sĩ lẽjó ĩꞌdi ꞌbejó vũ gá
angájó ãngũ ĩꞌdidrị́ ãrútáŋá drị̂gá;
kí uꞌá ãyĩkõ sĩ la ĩnzõ sĩ.
Tị ĩꞌbadrị̂ sĩ kí sụ̃sụ́ ãla rĩ wi,
wó ásị́ sĩ kí ꞌbá wã.
5 Úríndí mádrị̂, mí avị́ lú Ãdróŋá agá áꞌdụ̂sĩ;
ãꞌdusĩku ásị́ tị̃ŋá mádrị̂ la angá ĩꞌdidrị́.
6 Ĩꞌdi lú áma tãmba ãzíla áma pa nĩ;
ĩꞌdi bõrõ mádrị́ ũkpó rĩ rú nĩ; ị́jọ́ ãzí icó dó sĩ áma ayalé ku.
7 Patáŋá mádrị̂ kí dị̃zã mádrị̂ be tu kí pá Ãdróŋá drị̃ gá;
ĩꞌdi bõrõ mádrị́ ũkpó, mání sĩ áma zị̃jó ala gá rĩ ꞌi.
8 ꞌBá mádrị̂, ĩꞌbã ásị́ Ãdróŋá drị̃ gá sáwã pírí sĩ;
ĩlũ ũcõgõ ĩmidrị̂ kí pírí ĩꞌdinî,
ãꞌdusĩku Ãdróŋá ĩꞌdi ãngũ ãmaní sĩ ãma zị̃jó rĩ ꞌi.
9 ꞌBá kí pírí ãlụ́kụ́kụ̃ áni;
ꞌbá málĩ trũ ãzíla lẽmẽrí rĩ kí ĩnzó ꞌbá,
údrĩ kí ꞌbã kị́lọ̃ drị̃ gá,
ãlụ́kụ́kụ̃ la ãnzị̃ ĩꞌbaní ãndânĩ.
10 Íꞌbã ásị́ ꞌbá raŋá drị̃ gá ku;
mí adru ãfó sĩ ãko ụ̃gụ̃lé ụ̃gụ̃ ụ̃gụ̃ rĩ kí sĩ ku;
málĩ mídrị̂ drị̃ kí táni tụtụ̃ rá tí, íꞌbã ásị́ kí drị̃ gá ku.
11 Má are Ãdróŋá ꞌbã jọ agâ la
pâlé ũꞌbí ru;
ũkpõ pírí kí mâ ãni,
12 ãzíla lẽtáŋá Úpí drị̂ ukó ku,
ãꞌdusĩku mi ꞌbá ãlu ãlu ũfẽ
ị́jọ́ ĩꞌdi ꞌbã ngalé rĩ kí vú sĩ.