63
Ãdróŋá ndrụ̃jó rĩ
1 Ãdróŋá, mi Ãdróŋá mádrị̂ ꞌi;
ma ími ndrụ̃ ásị́ pírí sĩ;
ími vị́ la áma fụ
cécé ị̃yị́ vị́ ꞌbã áma ndẽjó rĩ áni,
ídri mádrị̂ la ími ndrụ̃
cécé ꞌbá ị̃yị́ vị́ ꞌbã ndẽlé rá rĩ ꞌbã ị̃yị́ ndrụ̃jó ãngũ ãꞌí gá rĩ áni.
2 Ándre mi ãngũ mídrị́ ãlá rĩ gâlé;
ãzíla ándre ũkpõ mídrị̂ kí dị̃zã mídrị̂ be.
3 Lẽtáŋá mídrị́ ukólépi ku rĩ ꞌbã ídri ndẽjó rá rĩ sĩ,
ma dó ími ịcụ́ áma tị sĩ.
4 Ị́jọ́ ꞌdĩ sĩ ma dó ími ịcụ́ ụ́ꞌdụ́ mání adrujó ídri rú rĩ kí agá pírí,
Ma áma drị́ kí inga ụrụgá mání ími zị agâ.
5 Mi ídri mádrị̂ fẽ agalé cécé ána ꞌbãrĩ íná ụ̃mụ̃ gá rĩ áni,
ma míní úngó ãyĩkõ drị́ sĩ ími ịcụ́jó ri kí ngo áma tị sĩ.
6 Mání ãma la agá gbọ́lọ́ sị́ gá,
ma ị́jọ́ ũrã ími drị̃ gá ị́nị́ ãrã;
7 ãꞌdusĩku mi ꞌbá áma ãzã kolépi rĩ ꞌi,
ma úngó ngo ụ́pụ́pị́ mídrị́ ꞌbá tãmbalépi rĩ ꞌbã índríléndri gá.
8 Úríndí mádrị̂ la ími ndrụ̃,
ími drị́ ãndá rĩ la áma tãmba nĩ.
9 ꞌBá áma ndrụ̃lépi sĩ lẽjó áma ꞌdịjó rĩ kí
fi mgbi ãngũ ꞌbá drãlépi rá rĩ ꞌbadrị̂ gá.
10 Kí ũdrã ãꞌdị́ gá,
ũbaligo kí kí ãvũ na nĩ.
11 Wó úpí la uꞌá Ãdróŋá agá ãyĩkõ sĩ,
ꞌbá pírí ũyõ nalépi Ãdróŋá ꞌbã rụ́ sĩ rĩ kí ĩꞌdi ịcụ́ rá,
ála tị ꞌbá ĩnzõ alịlépi rĩ ꞌbadrị̂ kí ãzụ̃ cí.