69
Ãdróŋá zịjó sĩ ãzãkoma aꞌị́jó
1 Ãdróŋá, ípa ma,
ãꞌdusĩku má aꞌdé ị̃yị́ kị́rị́ agá.
2 Ma ị̃yị́ kị́rị́ rĩ agá;
ãngũ ãꞌí mání sĩ pá tụjó drị̃ la gá la ꞌdáyụ,
áfi ãngũ ũdrí ru ị̃yị́ kị́rị́ rĩ drị̂ agá,
ãzíla ị̃yị́ tị̃lépi tré rĩ sĩ ma ugólé ịmvụ́lé ịmvụ́ ịmvụ̂.
3 Má awá dó ambamba sĩ ãzãkoma aꞌị́jó,
áma ũkpó ukó dó rá.
Áma mịfị́ ụ̃pị̃ kí dó áwáŋá sĩ ụ̃pị̃-ụ̃pị̃
mání Ãdróŋá mádrị̂ ndrụ̃ agâ.
4 ꞌBá áma ngụ̃lépi ị́jọ́ kóru ri kí
ꞌbã kãlãfe alị drị̃ꞌbị́ áma drị̃ gá ri kí rá.
Mẹ́rọ́ꞌbá mádrị̂ kí ĩnzõ alị́ áma ụrụꞌbá gá;
kí ũkpó ru ãzíla lẽ kí áma ꞌdịlé rá.
Kí áma ũŋmĩ sĩ ãko mání
ụ̃gụ̃lé ma ꞌi ku rĩ kí tị ũfẽjó.
5 Ãdróŋá, ínị̃ má aza íngõpí yã rĩ gá rá;
ị́jọ́ ũnzí mádrị̂ zị̃ kí ru ími mịfị́ gá ku.
6 Lẽ ꞌbá ásị́ tị̃lépi ími drị̃ gá rĩ
ꞌbã isụ́ kí drị̃nzá áma ị́jọ́ sĩ ku,
Ãdróŋá Ũkpó ꞌdị́pị;
lẽ ꞌbá ími ndrụ̃lépi rĩ
ꞌbã ịsụ́ drị̃nzá áma ị́jọ́ sĩ ku,
Ãdróŋá Ịsịrayị́lị̃ drị̂,
7 ãꞌdusĩku ála áma uꞌdá ími ị́jọ́ sĩ,
ãzíla drị̃nzá rụ dó ma cí.
8 Ma cécé ãmị́yọ́ŋá áni má ádrị́pịka ꞌbaní,
ma mâ ãndrẽ ꞌbã anzị kí agá ãmị́yọ́ŋá áni,
9 jó mídrị̂ ꞌbã vị́ ꞌbã áma ndẽjó ambamba rĩ sĩ;
ãzíla úꞌdáŋá sĩ ími uꞌdájó rĩ kí sĩ ála áma uꞌdá.
10 Ádrĩ awá ãzíla ĩsãyĩmũ,
ála áma gụgụ̃,
11 ádrĩ kõlĩbá sụ̃,
ꞌbá kí áma ide idê.
12 ꞌBá rilépi kẹ̃jị́tị táwụ̃nị̃ drị̂ gá rĩ kí ị́jọ́ jọ má rụ́
ãzíla ꞌbá íwá mvụlépi rĩ kí áma ngo úngó sĩ.
13 Wó Úpí ma ími zị,
sáwã míní ãyĩkõ fẽlépi rá rĩ agá;
lẽtáŋá Ãdróŋá mídrị́ ukólépi ku rĩ sĩ,
mí umvi ma patáŋá mídrị́ pịrị rĩ sĩ.
14 Mí anzé ma ũdrí agá rĩ sĩ fô;
ífẽ ma ꞌdelé ũdrí agâlé kị́rị́ ku,
ípa ma ꞌbá áma ngụ̃lépi ũnzí rĩ kí drị́gá,
mí anzé ma angájó ị̃yị́ kị́rị́ rĩ agá.
15 Ífẽ ị̃yị́ galépi rĩ ꞌbã iti ma ku
ífẽ ma ịmvụ́lé ị̃yị́ kị́rị́ rĩ sĩ ku
jõku ífẽ úkụ̃ ámadrị̃ ị̃nádrị̃ agâlé ku.
16 Úpí, mí umvi mání ma, ãꞌdusĩku lẽtáŋá mídrị́ ukólépi ku rĩ ĩꞌdi múké;
ásí ị̃gbẹ́ mídrị́ ãmbógó rĩ sĩ, mí ajá tị má rụ́ ꞌdõlé fô!
17 Ízị̃ ími mẹ́lẹ́tị ãtíꞌbó mídrị̂ ní ku fô;
mí umvi ma gbõrú, ãꞌdusĩku ma cãndí ãmbógó la agá!
18 Mí asé mi márụ́ ꞌdõlé ãzíla mí anzé ma;
ípa ma mẹ́rọ́ꞌbá mádrị̂ kí drị́gá!
19 Ínị̃ ị́jọ́ sĩ áma uꞌdájó, drị̃nzá mání ịsụ́lé ãzíla ãrútáŋá ãkõ mání ịsụ́lé ri kí drị̃ gá rá;
ínị̃ mẹ́rọ́ꞌbá mádrị̂ kí pírí cé.
20 Úꞌdáŋá sĩ áma uꞌdájó rĩ nũ áma ásị́ rá,
má acá dó sĩ ãzị́ kóru;
ári ꞌbá icólépi áma ízákĩzã ndrelépi rá la ndrụ̃lé, wó má ịsụ́ ĩꞌdi ku,
ꞌbá icólépi áma ásị́ ũŋmĩlépi rá la ndrụ̃lé, wó má isụ́ ĩꞌdi ku.
21 Fẽ kí mání íná ụ̃jị́kị́rị́lị́ ru ꞌbị̃lépi ãdrákĩ áni la nalé;
fẽ kí mání ãko ụ̃jị́ la mvụlé ị̃yị́ kẹ̃jị́ gá.
22 Lẽ mí uja méjã ụ̃mụ̃ gá ũꞌbãlé kí drị̃lẹ́ gá rĩ kí ĩꞌbaní ímbá rú;
sáwã ĩꞌbaní adrujó ásị́ ị̃gbẹ̃ agá rĩ sĩ, ꞌbã uja ru ĩꞌbaní mãtégõ rú.
23 Ífẽ mịfị́ la ꞌbã anị́ kí cí ꞌbã ndre kí dó sĩ ãngũ ku,
ãzíla ífẽ ụ̃gụ la ꞌbã lị kí jãꞌdâ.
24 Mí ũsũ adrã mídrị̂ kí drị̃ gá,
ífẽ ũmbã mídrị́ velépi ãcí áni rĩ ꞌbã iti kí rá.
25 Lẽ lị́cọ́ ĩꞌbadrị̂ ꞌbã acá kí ándrú ru;
lẽ ꞌbá ãzí ãlu la ꞌbã uꞌá jó ĩꞌbadrị̂ kí agá ku,
26 ãꞌdusĩku kí ꞌbá míní ĩꞌbaní drị̃rịma fẽjó rĩ kí ĩcõcõŋã;
kí ị́jọ́ jọ ꞌbá míní bị́lẹ́mị ꞌbãjó kí ụrụꞌbá gá rĩ kí ꞌbã ãzá drị̃ gá.
27 Mí ũꞌbã ĩꞌbaní drị̃rịma-drị̃rịma drị̃ gá,
ífẽ ꞌbã ịsụ́ kí patáŋá mídrị̂ ku.
28 Lẽ mí ịnị́ kí rụ́ bụ́kụ̃ ídri drị̂ agá rá;
lẽ úsĩ rụ́ la kí ꞌbá ãlá rĩ kí abe ku.
29 Wó ma ãzá ta ãzíla ma drị̃ cị;
Ãdróŋá, patáŋá mídrị̂ sĩ mí inga ma ụrụ gá.
30 Ma mụ Ãdróŋá rụ́ ịcụ́lé úngó sĩ;
ãzíla ma mụ ĩꞌdi rụ́ ꞌbãlé ãmbógó ru ãwãꞌdĩfô fẽŋá sĩ.
31 Ị́jọ́ ꞌdĩ la mụ ãyĩkõ fẽlé Úpí ní ndẽ mọ́nị̃gọ́ fẽjó ĩꞌdiní rĩ rá,
ndẽ mọ́nị̃gọ́ mbalépi lọ́lọ́ rĩ fẽjó ídétáŋá ru rĩ rá.
32 ꞌBá lẽmẽrí rĩ drĩ kí ị́jọ́ ꞌdĩ ndre, kí uꞌá ãyĩkõ sĩ;
ꞌbá Ãdróŋá ndrụ̃lépi rĩ kí ásị́ imbáŋá ịsụ́ rá,
33 ãꞌdusĩku Úpí la ꞌbá lẽmẽrí rĩ kí ꞌbã áwáŋá are rá,
ãzíla ãvĩ ị́jọ́ ꞌbá ĩꞌdi ãni mãbụ́sụ̃ rú rĩ kí drị̃ gá ku.
34 Ĩmi ꞌbá ꞌbụ̃ gá ãzíla ụ̃nọ́kụ́ gá ꞌdĩ, ĩmi ịcụ́ ĩꞌdi,
mĩrĩ kí ãko pírí ídri trũ alagá ꞌdĩ kí abe ꞌbã ịcụ́ kí ĩꞌdi,
35 ãꞌdusĩku Ãdróŋá la mụ Zị̃yọ́nị̃ palé rá
ãzíla ĩꞌdi táwụ̃nị̃ Yụ́dã drị́ ãmbogo ãmbogo rĩ kí sị rá.
ꞌDã ꞌbã ũngúkú gá, ꞌbá kí dó mụ rilé ꞌdãá ãzíla kí dó ãngũ ꞌdã ꞌdụ ĩꞌbã ãni la rú.
36 Ãtiꞌbo ĩꞌdidrị̂ ꞌbã anzị kí dó mụ ꞌdụlé la ĩꞌbaní ãwítã rú nĩ,
ãzíla ꞌbá rụ́ ĩꞌdidrị̂ lẽlépi rá kí mụ uꞌálé ala gá nĩ.