70
Ãdróŋá ĩꞌdi ꞌbá ãma palépi rĩ ꞌi
1 Ãdróŋá, mí amụ́ mbẽlẽ rú sĩ áma pajó;
Úpí mí amụ́ mbẽlẽ sĩ áma ãzãkojó.
2 Ífẽ ꞌbá áma ndrụ̃lépi sĩ lẽjó áma ꞌdịjó ꞌdĩ
ꞌbã ịsụ́ kí drị̃nzá ãzíla úŋmĩ la ꞌbã ꞌbe kí ru rá.
Ífẽ ꞌbá uꞌálépi ãyĩkõ sĩ mání adrájó rĩ sĩ rĩ
ꞌbã uja kí ru vúlé ãzíla ꞌbã ịsụ́ kí drị̃nzá.
3 Lẽ ꞌbá jọlépi la mâ sĩ, “Ãhá! Ãma ịsụ́ dó ị̃ndụ́ la ꞌbo” rĩ,
ꞌbã uja kí ru vúlé ãzíla ꞌbã ịsụ́ kí drị̃nzá.
4 Lẽ ꞌbá pírí ími ndrụ̃lépi rĩ
ꞌbã uꞌá kí ãyĩkõ sĩ ãzíla ũnũŋá sĩ;
ꞌbá patáŋá mídrị̂ lẽlépi rá rĩ ꞌbã jọ kí sáwã pírí sĩ,
“Ãma ịcụ́ kí Ãdróŋá ꞌi, Ãma ịcụ́ kí Ãdróŋá ꞌi!”
5 Wó ma ũkpó kóru ãzíla lẽmẽrí;
Ãdróŋá, mí amụ́ márụ́ ꞌdõlé mbẽlẽ rú.
Mi ꞌbá áma ãzãkolépi ãzíla áma unzelépi rĩ ꞌi,
Úpí, mí iza sáwã ku fô!