73
Ị́jọ́ Ãdróŋá ꞌbã lịlé pịrị rĩ
1 Ãndá-ãndá ru Ãdróŋá ĩꞌdi ꞌbá Ịsịrayị́lị̃ drị̂ ꞌbaní múké,
ꞌbá ásị́ múké rĩ ꞌbaní ĩꞌdi múké.
2 Wó mâ rú rĩ, má apá tí ásị́ nze sĩ ĩꞌdi drị̃ gá rá;
ãꞌị̃táŋá mádrị̂ apá tí aꞌdê sĩ
3 ãꞌdusĩku má acá ándrá ꞌbá ãfó ru rĩ kí ị́jọ́ sĩ ãjã sĩ
mání ndrejó la ꞌbá ũnzí rĩ kí málĩ ịsụ́ rĩ sĩ.
4 Drã ꞌbã ãzá ĩꞌbaní ꞌdáyụ;
ụrụꞌbá la kí ãlá rú ãzíla ũkpó ru.
5 Cị kí drị̃ ꞌbá ãzí rĩ ꞌbaní drị̃ cịjó rĩ áni ku;
ị́jọ́ ꞌbá ãzí rĩ kí ụrụlépi rĩ rụ ꞌbãngá kí ku.
6 Kí ãfó iꞌda tọndọlọ cécé ŋálíká sụ̃jó imbe gá ĩꞌdi indré tọndọlọ cé rĩ áni;
kí acị́ ãlí trũ tọndọlọ cécé bõngó sụ̃jó ụrụꞌbá gá rĩ áni;
7 kí ásị́ gâlé ị́jọ́ ũnzí la ãfũ nĩ,
ãzíla kí ị́jọ́ ũnzí itú úŋmĩ ĩꞌbadrị̂ agá sáwã pírí sĩ.
8 Kí ꞌbá kí gụ ãzíla kí ị́jọ́ ũnzí rĩ kí jọ;
ãfó ĩꞌbadrị̂ sĩ kí ị́jọ́ itú sĩ ꞌbá kí ĩkpãjó.
9 Kí ị́jọ́ ũnzíkãnã ri kí jọ Ãdróŋá ꞌbụ̃ gâlé rĩ ụrụꞌbá gá,
ãzíla kí ãzị́táŋá ũꞌbã ãfó sĩ ꞌbá ụ̃nọ́kụ́ gá ꞌdâ rĩ kí drị̃ gá pírí.
10 Ị́jọ́ ꞌdĩ sĩ ꞌbá Ãdróŋá drị̂ kí vâ kí ũngúkú ãtị̃
ásị́ pírí sĩ sĩ ị́jọ́ ĩꞌbã kí jọlé rĩ ãꞌị̃jó.
11 Kí jọ la, “Ãdróŋá icó ꞌbãngá ị́jọ́ ꞌdĩ kí nị̃lé ku;
Ãdróŋá ụrụgá ãndânĩ rĩ icó ꞌbãngá ị́jọ́ ꞌdĩ kí ị̃ndụ́ uválé ku.”
12 ꞌBá ũnzí rĩ kí bãsĩ cécé ꞌdĩ ꞌbã áni,
ásí kí ꞌbãngá sáwã pírí sĩ ị́jọ́ ãzí sĩ ku, málĩ ĩꞌbadrị̂ kí tụtụ̃.
13 Ãndá ãndá ru ámba dó mání áma ásị́ tã ãlá ru úyé!
Má ũjĩ áma drị́ sĩ iꞌdajó la ánga ị́jọ́ ãzí ũnzí la ku!
14 Ma cãndí Ịsụ́ Ị̃tụ̂rụ̃;
ála mání drị̃rịma fẽ ụ̃ꞌbụ́tị ãlu-ãlu sĩ.
15 Ádrĩ tá ị́jọ́ jọ ꞌbá ũnzí rĩ ꞌbã kí ị́jọ́ jọjó rĩ áni la,
ámbe tá nõ anzị ĩmidrị̂ kí mẹ́lẹ́ ꞌbo.
16 Má ụ̃ꞌbị̃ ị́jọ́ ũrãlé ị́jọ́ ꞌdĩ drị̃ gá íꞌdóŋá gá kpere ãsị̃ŋá gá,
wó vãŋá la mání ũkpó-ũkpó
17 kpere mání fi agâ ãngũ ãlá Ãdróŋá drị̂ agá.
ꞌDã ꞌbã vúlé gá ánị̃ dó ãꞌdu ị́jọ́ la mụ ru ngalé ꞌbá ị́jọ́ ũnzí ngalépi rĩ kí abe nĩ yã rĩ rá.
18 Ãndá ãndá ru Ãdróŋá mi mụ ꞌbá ꞌdĩ kí ꞌbãlé ãngũ ũré sĩ dịjó dị̃-dị̃ la gá
ãzíla mi kí fẽ ị̃lị̃kị̃lé rá.
19 Kí ị̃lị̃kị̃ sáwã were vúlé gá;
ụ̃rị̃ ãmbógó la la kí we pírí.
20 Kí cécé urobí ꞌbá ũbĩlépi ãvĩlépi sáwã angájó ụ́ꞌdụ́ gá rĩ sĩ rá rĩ áni;
Úpí, ídrĩ angá ụ̃ꞌbụ́tị sĩ ꞌbo,
mi gụ kí sĩ gụgụ̃.
21 Sáwã áma ásị́ ꞌbã adrujó ũcõgõ sĩ
ãzíla mání ãzá ịsụ́jó agá agá ru rĩ gá,
22 má aza cécé ãnãkpá ꞌbã azajó rĩ áni;
ávã ị́jọ́ mídrị̂ kí ku Ãdróŋá.
23 Ịsụ́ ma sáwã pírí sĩ uꞌá mí be,
írụ áma drị́ ãndá rĩ ꞌi.
24 Mi áma drị̃ ce ímbátáŋá mídrị̂ sĩ,
ãzíla ꞌdã ꞌbã ũngúkú gá mi dó áma aꞌị́ dị̃zã agá.
25 ꞌBá má ãni ꞌbụ̃ gâlé ndú la yụ pẽlú mi ꞌi
ãzíla ãko ãzí ụ̃nọ́kụ́ drị̃ gá ꞌdâ mání sĩ ásị́ ꞌbãjó drị̃ la gá ími drị̃ gâsĩ ãndânĩ la ꞌdáyụ.
26 Áma ụrụꞌbá kí áma ásị́ be kí icó ũkpó ãkõ ịsụ́lé rá,
wó Ãdróŋâ ĩꞌdi ũkpó mádrị́ gá rĩ ꞌi;
ĩꞌdi má ãni jãꞌdâ.
27 ꞌBá ími lẽlépi ku rĩ kí ị̃lị̃kị̃ rá;
mi ꞌbá ãꞌị̃táŋâ kóru rĩ kí ị̃lị̃kị̃ pírí.
28 Wó ĩꞌdi mání múké adrujó Ãdróŋá be ãni rú.
Áꞌbã Úpí ũkpó ꞌdị́pị ꞌi ãngũ mání sĩ apájó áma zị̃jó rĩ rú;
ị́jọ́ ꞌdĩ sĩ ma dó sĩ ãzị́ pírí míní ngalé rĩ kí ị́jọ́ ũlũ.