74
Ãdróŋá zịjó sĩ sụ́rụ́ pajó
1 Ãdróŋá, mí aꞌbe dó ãma yã íni ãꞌdu ị́jọ́ sĩ yã?
Ũmbã la dó ími rụ ꞌbá mídrị̂ ꞌbaní jãꞌdâ yã?
2 Mí ũrã drĩ ị́jọ́ ꞌbá mí ãni míní ĩgbãlé sáwã vúlêlé ru
míní ándrá kí anzéjó ĩꞌbã kí dó sĩ acájó sụ́rụ́ mîni la rú rĩ kí drị̃ gá.
Mí ũrã drĩ vâ ị́jọ́ ꞌbé Zị̃yọ́nị̃ míní uꞌájó ala gá rĩ ꞌbã drị̃ gá.
3 Ímụ ãzíla mí undré drĩ ãko pírí mẹ́rọ́ꞌbá ꞌbã kí andilé rĩ kî,
andi kí átã vâ ãko ãngũ mídrị́ ãlá rĩ gá rĩ kí ĩndĩ.
4 Mẹ́rọ́ꞌbá mídrị̂ uzá kí ándrá dó sĩ jó ími ị̃nzị̃jó rĩ agá,
usú kí bẽndérẽ ĩꞌbadrị̂ kí ꞌdãá sĩ iꞌdajó la ĩndẽ dó mi rá.
5 Kí indré cécé ꞌbá nekeŋá ingalépi ụrụgá
sĩ ife cãjó mị̃rị́ agá rĩ kí áni.
6 Ayú kí nóndõ kí kọ́lọ́ŋá abe sĩ kẹ̃jị́tị kí andijó
ãzíla ãko ãzí ãjẹ̃ rú idélé báwũ sĩ rĩ kí abe.
7 Ivé kí ãngũ mídrị́ ãlá rĩ ãcí sĩ rá,
iza kí ãngũ sĩ ími ị̃nzị̃jó rĩ rá.
8 Jọ kí kí ásị́ gâlé, “Ãma mụ kí ịꞌị́lé ãko ĩꞌbadrị̂ kí abe kpítã rá!”
Ivé kî dó sĩ ãngũ ándrá sĩ Ãdróŋá ị̃nzị̃jó ãngũ ꞌdã agá ꞌdãá ri kí pírí rá.
9 Ãndre ícétáŋá ãzí tálí ru la kí ku;
nábị̃ ãzí acelépi la ꞌdáyụ,
ãzíla ꞌbá ãzí ãma drĩdríŋĩ gá nị̃lépi la ũcõgõ la uꞌá ụ́ꞌdụ́ íngõpí yã la ꞌdáyụ.
10 Ãdróŋá, mẹ́rọ́ꞌbá ãmadrị̂ kí dó ími ide íngõpí yã?
Kí dó rụ́ mídrị̂ uꞌdá jãꞌdâ yã?
11 Ígã dó ãma ãzãkolé sĩ la ãꞌdu ị́jọ́ sĩ yã?
Mí anzé ími drị́ ũkpó trũ rĩ bõngó agâlé, mí ị̃lị̃kị̃ dó sĩ kí rá.
12 Wó Ãdróŋá, iꞌdóŋá gá mi Úpí ãmadrị̂ rú mi ꞌi;
ípa ãma pâlé ũꞌbí ru.
13 Ũkpõ mídrị́ ãmbógó rĩ sĩ, mí awa ándrá ị̃yị́ mĩrĩ drị̂ ꞌa rá
ãzíla mí aco ándrá ãnãkpá ãmbogo-ãmbogo ị̃yị́ mĩrĩ drị̂ agá rĩ kí rá.
14 Mí ịꞌị́ ándrá ãnãkpá ãmbógó Lẹ̃vị̃yãtánị̃ ꞌbã drị̃kã rá
ãzíla ífẽ ĩꞌdi nalé ãkónã rú ãnãkpá kõtórõ agá rĩ ꞌbaní.
15 Ífẽ ándrá kídí ꞌbaní wọ́rọ̃ŋá kí abe agbẹ́lé vũ gâlé rĩ sĩ mi ꞌi;
ífẽ ándrá ị̃yị́ sáwã pírí sĩ dịlépi dị̃-dị̃ rĩ ꞌbaní nzụlé rá.
16 Mí ũꞌbã ị̃tụ́ kí ị́nị́ be mi ꞌi;
ãzíla mí ũꞌbã ị̃tụ̂ kí ĩmbâ be ãngũ ĩꞌba drị̂ kí agá mi ꞌi.
17 Mí idé lõkókõrí ụ̃nọ́kụ́ drị̃ gá ꞌdâ rĩ kí mi ꞌi;
Íꞌbã áyi kí ílí be mi ꞌi.
18 Úpí, Mí agá drĩ ị́jọ́ mẹ́rọ́ꞌbá mídrị̂ gụ mi íngoní yã rĩ ꞌi,
ꞌBá azalépi azâ rĩ uꞌdá kí ími rụ́ íngõpí yã rĩ drị̃ gá ị́jọ́.
19 Mí aꞌbe jõ ꞌbá mídrị́ ũkpó kóru ꞌdĩ kí mẹ́rọ́ꞌbá ĩꞌbadrị̂ kí drị́ alé gá ku;
mí ãvĩjõ ị́jọ́ ꞌbá mídrị́ ĩcõcõŋãlé ꞌdĩ kí drị̃ gá ị́jọ́ ku fô!
20 Mí agá drĩ ị́jọ́ tị icíma míní ándrá icílé ãma abe rĩ ꞌbã ị́jọ́,
ãꞌdusĩku ụ̃nọ́kụ́ ꞌdõ ịnị-ịnị ꞌbá ũnzí rĩ ga kí ala gá tré-tré.
21 Ífẽ jõ ꞌbá ĩkpãlé ĩkpã-ĩkpã rĩ ꞌbã ịsụ́ kí drị̃nzá ku;
ífẽ ꞌbá lẽmẽrí ãzíla ãzãkoma lẽlépi rĩ ꞌbã ịcụ́ kí ími rụ́.
22 Ãdróŋá, mí angá ụrụgá,
Mí ãtị̃ ꞌbá mídrị̂ kí ũngúkú
Lẽ mí agá drĩ ị́jọ́ ꞌbá azalépi azâ rĩ ꞌbã kí ími uꞌdájó ị̃tụ̂rụ̃ rĩ ꞌi.
23 Mí ãvĩ jõ ị́jọ́ mẹ́rọ́ꞌbá mídrị̂ ꞌbã kí jọlé rĩ drị̃ gá ị́jọ́ ku.
Úzáŋá ĩꞌbã kí uzájó sĩ ị́jọ́ mídrị̂ gãjó rĩ ꞌbã ụ́ꞌdụ́kọ́ la tụtụ̃.