76
Ãdróŋá la sáwã pírí sĩ ãꞌdị́ ndẽ nĩ
1 Ụ́nị̃ Ãdróŋá ꞌi Yụ́dã gá rá;
rụ́ la ꞌbá Ịsịrayị́lị̃ drị̂ kí drĩdríŋĩ gá ãmbógó ru.
2 Lị́cọ́ ĩꞌdidrị̂ Yẹ̃rụ́sãlẹ́mụ̃ gá;
ĩꞌdi uꞌá ꞌbé Zị̃yọ́nị̃ drị̃ gá.
3 Zị̃yọ́nị̃ gâlé, anu ãko mẹ́rọ́ꞌbá ꞌbadrị́ ãꞌdị́ drị́ ꞌé kí gọ́bẹ́rẹ́ trũ ãzíla ménéŋá trũ rá.
4 Ãdróŋá, mi dị̃zã rú ꞌdĩ ꞌbã áni yã!
Dị̃zã mídrị̂ ãmbógó ru sáwã míní ãgõjó ãꞌdị́gá míní mẹ́rọ́ꞌbá mídrị̂ kí ndẽjó ꞌbé sị́ gâlé rĩ sĩ.
5 Ûpa ãko ãsĩkárĩ ĩꞌbadrị́ ásị́ ũkpó rĩ ꞌbadrị̂ kí pírí rá
ãzíla ũdrã kí dó rá;
ũkpõ ĩꞌbadrị̂ kí ãlị̃gọ̃ abe ãzị̂ kóru.
6 Ãdróŋá Yãkóꞌbõ drị̂, mi mụ uzálé kí drị̃ gá ꞌbo, fãrásĩ ĩꞌbadrị̂ kí ꞌbá gárĩ ãꞌdị́drị̂ kí ụ̃cẹ̃lépi rĩ kí abe ũdrã kí dó rá.
7 Wó mi ꞌi Úpí, ꞌbá pírí kí idé mí sĩ ụ̃rị̃ sĩ.
Ãꞌdi la icó pá tulé ími drị̃lẹ́ gá nĩ ũmbã mídrị̂ drĩ angá ꞌbo rĩ gá!
8 Ífẽ ị́jọ́ míní lịlẹ́ rĩ nị̃jó angájó ꞌbụ̃ gâlé;
ꞌbá ụ̃nọ́kụ́ gá rĩ idé kí ụ̃rị̃ sĩ ãzíla ĩyãŋã kí tú,
9 sáwã Ãdróŋá míní angájó ụrụgá sĩ ị́jọ́ lịjó,
sĩ ꞌbá pírí ụ̃nọ́kụ́ drị̃ gá ꞌdâ ĩkpãlé ĩkpã-ĩkpã rĩ kí pajó rĩ sĩ.
10 Ãndá-ãndá ru Ãdróŋá, ũmbã mídrị́ ꞌbá kí ụrụꞌbá gá rĩ la míní ị́cụ́ŋá ají rá;
mi ꞌbá ị́mbị́ acelépi adrã mídrị̂ agá rĩ kí tãmba mi ꞌi.
11 Ĩna ũyõ Úpí Ãdróŋá ĩmidrị̂ drị̃lẹ́ gá ãzíla
ĩnga jõ ãzị́ la kí rá;
sụ́rụ́ pírí ĩmi andre gá rĩ ꞌbã ají kí ãko fẽtáŋá ru rĩ kí ꞌBá ụ̃rị̃lé ụ̃rị̃-ụ̃rị̃ rĩ nî.
12 Ĩꞌdi ũpi anzị kí iri vụ̃rụ́ rá
ãzíla ĩꞌdi ụ̃rị̃ gbã ũpi ụ̃nọ́kụ́ drị̃ gá ꞌdĩ kí agá.