75
Ãdróŋá la ꞌbá kí ị́jọ́ lị pịrị nĩ
1 Ãma míní ãwãꞌdĩfô fẽ, Ãdróŋá, ãma míní ãwãꞌdĩfô fẽ;
ãꞌdusĩku mi ãma abe ãni rú,
ꞌbá kí ãngũ pírí gá ị́jọ́ ũlũ ị́jọ́ ũnĩ-ambamba míní ngalé ri kí drị̃ gá.
2 Ãdróŋá jọ, “Sáwã mání pẽlé pịrị rĩ gá,
Ma mụ ꞌbá kí ị́jọ́ lịlẹ́ pịrị.
3 Ụ̃nọ́kụ̂ drĩ ru aya ꞌbá ala gá rĩ kí abe ụ̃rị̃ sĩ rá,
ma ꞌbá ĩꞌdi ị̃ndụ́ ãrị̃lépi mgbe-mgbe rĩ ꞌi.
4 Ájọ ꞌbá ãfó ru rĩ ꞌbaní, ‘Ĩmi aꞌbe ãfó jã,’
ájọ ꞌbá ũnzí rĩ ꞌbaní, ‘Áfẽ ãzị́táŋá ꞌbá ị́jọ́ ũnzí ngalépi ꞌdã ꞌbaní sĩ ãfó aꞌbejó jã.’
5 Ĩmi idé ãfó ku
ĩjọ ị́jọ́ drị̃ ũnzĩ sĩ ku.”
6 ꞌBá ãzí ị̃tụ̂ ꞌbã agá gâlé ru, ị̃tụ̂ ꞌbã ꞌde agâlé ru,
átã vâ ụ́rụ̂lé ru jõku ándrálé ru ꞌbá ꞌbá ru rĩ ingalépi ụrụgá la ꞌdáyụ;
7 Wó Ãdróŋá la lú ꞌbá ꞌbã ị́jọ́ lị nĩ,
ĩꞌdi ꞌbá ãzí ri inga ụrụgá, ĩꞌdi ãzí rĩ isé vụ̃rụ́.
8 Úpí ꞌbã drị́ gá kópõ cí,
ũmbã Ãdróŋá drị̂ dra alagá cécé wáyĩnĩ ũká usalé ãkụ́kị́ sĩ rĩ áni kọ̃bụ́tọ̃ trũ;
ĩꞌdi ũsũ la kópõ agá rĩ sĩ vũ gá ãzíla ꞌbá ũnzí ụ̃nọ́kụ́ drị̃ gá ꞌdâ
rĩ kí pírí mvụ la kpere ĩzẽkí la gá.
9 Wó mâ rú rĩ, ma mụ ị́jọ́ míní ngalé rĩ kí vú nzelé jãꞌdâ;
ma mụ úngó ngolé Ãdróŋá Yãkóꞌbõ drị̂ ꞌbã rụ́ ịcụ́jó.
10 Ma mụ ũkpõ ꞌbá ũnzí rĩ ꞌbadrị̂ andilé rá
wó ma ũkpõ ꞌbá ãlá rĩ ꞌbadrị̂ itụ́ ụrụgá.