79
Patáŋá Sụ́rụ́ ꞌbã zịlé Ãdróŋá tị gá rĩ
1 Ãdróŋá, Sụ́rụ́ mẹ́rọ́ꞌbá ru rĩ afí kí ãngũ mídrị̂ agá ꞌbo;
Iza kí Jó mídrị́ ãlá rĩ ꞌbo,
fẽ kí Yẹ̃rụ́sãlẹ́mụ̃ acá dó ándrú ru, bõrõ la andi kí dó rá.
2 Aꞌbe kí ãtiꞌbo mídrị̂ kí ꞌbã ãvũ
acájó ãkónã rú ãriŋa ꞌbụ̃gá rĩ ꞌbanî,
fẽ kí ãtiꞌbo mídrị̂ kí ꞌbã ãvũ nalé ãnãkpá asé agá rĩ ꞌbanî.
3 Asu kí ꞌbá mídrị̂ kí ꞌbã ãrí cécé ị̃yị́ áni,
ãrí dị cécé ị̃yị́ áni Yẹ̃rụ́sãlẹ́mụ̃ agâ sĩ pírí
ꞌbá ãzí aꞌbelé ãvũ kí ị̃sị̃lépi la ꞌdáyụ.
4 Sụ́rụ́ ãmã jĩránĩ rú rĩ kí ãma uꞌdá uꞌdâ,
kí ãma gụgụ̃ ãzíla kí ãma ide ĩdẽ.
5 Úpí, mi dó adru ãmaní ũmbã sĩ kpere sáwã íngõpí?
Ũmbã mídrị̂ la dó ve ãmaní ãcí áni sáwã íngõpí?
6 Mí ũsũ ũmbã mídrị̂ sụ́rụ́
gãlépi ími ị̃nzị̃lépi úmgbé
rĩ kí drị̃ gá
ãzíla ũpĩ ími ị̃nzị̃lépi ku rĩ kí drị̃ gá,
7 ãꞌdusĩku ị̃lị̃kị̃ kí ũri Ịsịrayị́lị̃ drị̂ kí rá,
andi kí ãngũ ĩꞌdidrị̂ rá.
8 Ífẽ ãmaní drị̃rịma ị́jọ́ ũnzĩ ãma áyị́pịka ꞌbadrị̂ kí sĩ ku;
ãma ízákĩzã ꞌba afí míní gbõŋá ru fô!
Ásị́ ndrĩŋá mídrị̂ ꞌbã asị́ ãma drị̃ gá gbõrú
ãꞌdusĩku ásị́ ãmaní tị̃lé rĩ ukó dó rá.
9 Ãdróŋá, íko ãma ãzã ãzíla ípa ãma
dị̃zã ajíjó rụ́ mídrị̂ ní;
ípa ãma ãzíla ítrũ ị́jọ́ ũnzí ãmadrị̂ kí rá
dị̃zã ajíjó rụ́ mídrị̂ ní.
10 Ãdróŋá, mí aꞌbe ꞌbá sụ́rụ́ ãzí ꞌdĩ ꞌbadrị̂ kí sĩ ãma tị zịjó jọjọ́ la,
“Ãdróŋá la ĩꞌbadrị̂ dó íngõlé íni ku!”
Ífẽ ãndre drị̃rịma míní fẽlé sụ́rụ́ ãtiꞌbo mídrị̂ kí ãrí asulépi rĩ ꞌbaní rĩ ãma mịfị́ sĩ cé,
ĩꞌbaní ꞌbá mídrị̂ kí ãrí asujó rĩ sĩ.
11 Ífẽ áwáŋá ꞌbá Ịsịrayị́lị̃ rú rụlé mãbụ́sụ̃ gá rĩ ꞌbadrị̂ ꞌbã ca mí rụ̂lé rá fô;
ũkpó mídrị̂ sĩ
ípa ꞌbá mẹ́rọ́ꞌbá ꞌbã kí lẽlé ụꞌdị́lé rá ꞌdĩ kí rá.
12 Úpí, mí ũfẽ ãrígọ́tị ꞌbá ãmã jĩránĩ rú rĩ kí ụrụꞌbá gá pâlé ázị̂rị̃,
úꞌdáŋá ĩꞌbã kí ími uꞌdájó rĩ ꞌbã ị́jọ́ sĩ.
13 ꞌDã ꞌbã ũngúkú gá, ãma ꞌbá mídrị́ míní ucélé ꞌdĩ,
ãma dó sĩ míní ãwãꞌdĩfô fẽ jãꞌdâ;
ãzíla ími rụ́ ịcụ́ jãꞌdâ.