80
Ãdróŋá zịjó sĩ sụ́rụ́ Ịsịrayị́lị̃ drị̂ pajó
1 Mí are ãma, mi ꞌbá Ịsịrayị́lị̃ drị̂ kí tãmbalépi rĩ,
mi ꞌbá anzị ãfũlépi Yụ̃sụ́fụ̃ rụ́ rĩ kí drị̃ celépi cécé kãbĩlõ kí drĩ cejó rĩ áni rĩ;
mi ꞌbá rilépi úmvúke ũpĩ drị́ Kẹ̃rụ́bị̃ kí ꞌbã drĩdríŋĩ gá rĩ,
2 mí iꞌda ũkpõ mídrị̂ sụ́rụ́ Ịfụrayị́mụ̃ drị́, Bénzãmĩnĩ drị́ ãzíla Mãnásẽ drị̂ ꞌbaní rá.
Mí iꞌda ãmaní ũkpõ mídrị̂ ꞌi,
mí amụ́ ãma palé fô!
3 Ãdróŋá, mí uja ãma mí rụ́ vúlé,
mí iꞌda ãmaní ásị́ ị̃gbẹ̃ mídrị̂ ꞌi,
ãma dó sĩ ãmaní ãmã pa benĩ!
4 Úpí Ãdróŋá ũkpó ꞌdị́pị,
ími ꞌa la dó ve ũmbã sĩ ụ́ꞌdụ́
zịŋá ꞌbá mídrị̂ ꞌbã kí ími zịjó rĩ sĩ sáwã íngõpí yã?
5 Ífẽ ãmaní mị́ndrẹ ũsũlé íná naŋá kẹ̃jị́ gá,
ífẽ ãmaní ị̃yị́ mvụjó rĩ kẹ̃jị́ gá mị́ndrẹ mvụlé áyụ.
6 Ífẽ sụ́rụ́ ãmã jĩránĩ rú rĩ kí ãꞌdị́ ꞌdịjó sĩ ãngũ ãmadrị̂ pajó,
ãzíla mẹ́rọ́ꞌbá ãmadrị̂ ꞌbaní ãma idejó.
7 Úpí Ãdróŋá ũkpó ꞌdị́pị mí uja ãma mí rụ́ vúlé fô,
mí iꞌda ãmaní ásị́ ị̃gbẹ̃ mídrị̂ ꞌi,
ãma dó sĩ ãma pa benĩ!
8 Mí ají ándrá zãbíbũ ife angájó Mị̃sị́rị̃ gâlé;
mí adro sụ́rụ́ kí rá, ísa dó sĩ ĩꞌdi.
9 Mí idé dó ĩꞌdiní ãngũ;
ifê ꞌbã ízókí fi dó mgbi vụ̃rụ̂lé ãzíla aku dó ãngũ cí.
10 Ifê aku ꞌbé kí drị̃ índríkã ĩꞌdidrị̂ sĩ cí,
kénĩ ĩꞌdidrị̂ indré cécé márígó Ãdróŋá drị̂ áni.
11 Ifê ĩjũ kénĩ ĩꞌdidrị̂ kí kpere mĩrĩ Mẹ̃dẹ̃tẹ̃rẹ́nị̃yã drị̂ ꞌbã drị̃ gá
ãzíla iré bị́ ĩꞌdidrị́ ãrũlépi ãráŋá rĩ kí mĩrĩ Ũfũrátĩ ꞌbã drị̃ gá.
12 Ínũ dó úꞌdîꞌda bõrõ sĩ ifê andre cejó rĩ kí vũ gá
ꞌbá pírí alịlépi gẹ̃rị̃ tị gâsĩ rĩ ꞌbaní ãka la kí ũtĩjó ãꞌdu ị́jọ́ sĩ?
13 Ĩzõgó ásé agá rĩ kí ĩꞌdi atu vũ gá pá sĩ,
ãzíla ãnãkpá ásé agá rĩ kí dó pírí ĩꞌdi na.
14 Ãdróŋá ũkpó ꞌdị́pị, mí ajá tị ãma rụ́ fô!
Mí andré ãngũ ãmarụ́ angájó ꞌbụ̃ gâlé;
mí amụ́ sĩ ꞌbá mídrị̂ kí pajó!
15 Mí amụ́ sĩ zãbíbũ míní salé ími drị́ ãndá sĩ ꞌdĩ palé,
ngọ́tị́ŋá míní izólé míní rĩ palé.
16 Mẹ́rọ́ꞌbá ãmadrị̂ su kí zãbíbũ ꞌdĩ ãcí rá ãzíla ga kí ĩꞌdi vũ gá;
ífẽ ꞌbã ị̃lị̃kị̃ kí úzáŋá míní uzájó kí drị̃ gá rĩ sĩ rá!
17 Wó ímba sụ́rụ́ míní lẽlé ambamba rĩ ꞌbã tã,
ímba ngọ́tị́ŋá míní pẽlé rĩ ꞌbã tã!
18 ꞌDã ꞌbã ũngúkú gá, ãma icó dó míní ũngúkú ujalé áyụ ị̃dị́ ku;
ífẽ ãmaní ídri, ãma dó si ími rụ́ umve!
19 Úpí Ãdróŋá ũkpó ꞌdị́pị, mí ají ãma mí rụ́ ꞌdõlé vúlé,
mí iꞌda ãmaní ásị́ ị̃gbẹ̃ mídrị̂ ꞌi,
ãma dó sĩ patáŋá isụ́ benĩ!