82
Ãdróŋá ípa ꞌbá ũkpó kóru rĩ kí ꞌbá lẽmẽrí rĩ kí abe
1 Ãdróŋá ĩꞌdi drị̃lẹ́ ꞌbá pírí ũkpó trũ ru tralépi rĩ ꞌbadrị̂ ꞌi,
ĩꞌdi ãdroŋa ãzí rĩ kí drị̃ gá ị́jọ́ lị nĩ.
2 Lẽ ĩmi aꞌbe ị́jọ́ liŋá pịrị ku rĩ cã,
ĩmi aꞌbe sĩ fijó ꞌbá ị́jọ́ ũnzí ngalépi rĩ ꞌbaní rĩ cã.
3 Ĩtu pá ꞌbá lẽmẽrí rĩ ꞌbaní ĩmvú kí abe,
ĩmba hákĩ ꞌbá lẽmẽrí rĩ ꞌbadrị́ ꞌbá ĩkpãlé ĩkpã-ĩkpã rĩ kí abe rĩ tã.
4 Ĩpa ꞌbá ũkpó kó ru rĩ kí ꞌbá lẽmẽrí rĩ abe,
ĩmi apá kí ꞌbá ũnzí rĩ kí drị́ gárĩ sĩ.
5 Ãdroŋa ꞌdĩ nị̃ kí ị́jọ́ ãzí ku, vã kí ị́jọ́ ãluŋá la ku,
kí acị́ ị́nị́ agâ sĩ
ụ̃nọ́kụ̂ ị̃ndụ́ la ru aya ĩndĩ.
6 “Ájọ, ĩmi ãdroŋa kí,
ĩmi pírí anzị Ãdróŋá Ụrụgá Ãndânĩ rĩ ãni.
7 Wó ĩmĩ lú mụ drãlé cécé ꞌbá áni
ĩmĩ mụ uꞌdelé cécé ãmbogo ãzí rĩ kí áni.”
8 Ãdróŋá, mí angá ụrụgá, ílị ụ̃nọ́kụ̂ ꞌbã ị́jọ́,
ãꞌdusĩku sụ́rụ́ pírí kí ãko mí ãni la.