83
Ãdróŋá mí ĩyãŋã jõ tútú ku
1 Ãdróŋá, mí ĩyãŋã jõ tútú ku;
mí aꞌbejõ ãma yã ku, Ãdróŋá, mí adrujõ dríŋá ku!
2 Índre drĩ, mẹ́rọ́ꞌbá mídrị̂ angá kí dó ũmbã trũ ꞌbo,
ꞌdi kí ꞌbá ími ngụ̃lépi ũnzí ri kî.
3 Kí ị́jọ́ ũnzí itú ũní-ũní ru ꞌbá mídrị̂ kí ụrụꞌbá gá,
kí ị́jọ́ ũnzí itú ꞌbá míní tãmbalé mi ꞌi rĩ kí ụrụꞌbá gá.
4 Jọ kí, “Ĩmi amụ́, lẽ ãma ị̃lị̃kị̃ kí sụ́rụ́ ĩꞌbadrị̂ rá,
sụ́rụ́ Ịsịrayị́lị̃ drị̂ ꞌbã ị́jọ́ ꞌbã ãvĩ dó sĩ rá!”
5 Itú kí ị́jọ́ ásị́ ãlu sĩ;
icí kí tị ãlu sĩ ãꞌdị́ ꞌdịjó mí be:
6 ꞌBá Ídõmũ rú ãzíla Ịsụmayị́lị̃ rú;
ꞌbá Mụ̃wábụ̃ rú ãzíla Hãgị̃rị́tị̃ rú;
7 ꞌbá Gẽbálĩ rú, Ãmọ́rị̃ rú Ãmãlẹ́kị̃ rú
ãzíla Fị̃lị̃sị̃tị́yã rú rĩ kí ꞌbá Tụ́rọ̃ rú rĩ kí abe.
8 Sụ́rụ́ Ãsụ́rị̃yã drị̂ icí vâ tị ĩꞌba abe,
ũkpõ fẽjó anzị ãfũlépi Lọ́tị̃ rụ́ sụ́rụ́ Ãmọ́rị̃ ꞌbadrị́ Mụ̃wábụ̃ be rĩ ꞌbanî.
9 Mí idé kí ụrụꞌbá gá ị́jọ́ cécé ándrá míní idélé ꞌbá Mị̃dị́yánị̃ drị́,
ꞌbá Sĩsérã drị́ ãzíla Jãbínĩ drị̂ kí ụrụꞌbá gá ị̃yị́ Kísõnĩ gá rĩ áni.
10 Mí ị̃lị̃kị̃ ándrá kí Ẽndọ́rị̃ gá,
ãzíla kí ụrụꞌbá ŋma ándrá dó sĩ acájó wórõ rú sĩ ãngũ iŋmájó.
11 Ífẽ ꞌbá ãmbogo ĩꞌbadrị̂ ꞌbã ũdrã kí cécé Ũrébũ ꞌbadrị́ Zẽyébũ be rĩ áni,
ífẽ úpí anzị ĩꞌbadrị̂ ꞌba ũdrã kí cécé Zébã ꞌbadrị́ Zãlĩmúnã be rĩ áni,
12 ãꞌdusĩku jọ kí, “Ãꞌdụ kí ãngũ
Ãdróŋá drị́ ị̃rẹ́bị́ ru rĩ kí ãmaní.”
13 Ãdróŋá mádrị̂, mí iré kí cécé pụ́trụ́ ngalépi ãlụ́kụ́kụ̃ sĩ rĩ áni,
cécé ãná ꞌbã drẹ̃jị́kọ̃ ngalépi ãlụ́kụ́kụ̃ sĩ rĩ áni.
14 Ãcí ꞌbã mị̃rị́ ivéjó rĩ áni
jõku ãcí idraká ꞌbã ꞌbé kí sị́ ivéjó rĩ áni,
15 ị́jọ́ ꞌdĩ sĩ ídro dó kí ãlụ́kụ́kụ̃ sĩ,
ãzíla ígbã dó ụ̃rị̃ kí ásị́ gá lọ̃bị́yọŋá sĩ.
16 Ífẽ drị̃nzá ꞌbã rụ kí,
ị́jọ́ ꞌdĩ sĩ ꞌbá kí dó sĩ Úpí ími rụ́ ndrụ̃.
17 Lẽ ꞌba adru kí drị̃nzá sĩ ãzíla ụ̃sụ̃táŋá sĩ jãꞌdâ,
lẽ ꞌbã ũdrã kí ásị́ ị̃gbẹ̃ kóru.
18 Lẽ ꞌbã nị̃ kí mi lú Úpî rú mi ꞌi,
mi Ãdróŋá Ụrụgá Ãndânĩ ãko pírí ꞌbụ̃gá ãzíla ụ̃nọ́kụ́ drị̃ gá rĩ kí drị̃lẹ́ gá mi ꞌi.