9
Ãwãꞌdĩfô fẽjó Ãdróŋá ní ĩꞌdi ꞌbã ị́jọ́ lijó pịrị rĩ sĩ
1 Úpí ma mụ ími ịcụ́lé áma ásị́ pírí sĩ;
Ma mụ ị́jọ́ pírí míní idélé ụ̃sụ̃táŋá ru rĩ kí ũlũlé.
2 Ma mụ uꞌálé ãyĩkõ sĩ ãzíla ma mụ áma ũnũlé mî sĩ.
Ma mụ úngó ngolé sĩ ími rụ́ ịcụ́jó Úpí ụrụgá ãndânĩ rĩ.
3 Mẹ́rọ́ꞌbá mádrị̂ kí ru uja sĩ apájó vúlé,
kí uꞌde ãzíla kí ũdrã ími drị̃lẹ́ gá rá.
4 Ífẽ ị́jọ́ mádrị̂ ní pá tujó pịrị ꞌbo;
úmvúke mídrị́ ũpĩ drị̂ drị̃ gá, ílị ị́jọ́ áma drị̃ gá pịrị rĩ ꞌbo.
5 Mí uzá sụ́rụ́ kí drị̃ gá rá ãzíla mí ị̃lị̃kị̃ ꞌbá ị́jọ́ ũnzí idélépi rĩ kí ꞌbo,
mí ịnị́ kí rụ́ kpítã rá.
6 Mẹ́rọ́ꞌbá ãmadrị̂ ukó kí dó kpítã rá,
mí andi táwụ̃nị̃ ĩꞌbadrị̂ kí rá,
ãzíla kí ị́jọ́ ãvĩ dó cĩrĩkĩní.
7 Úpí la ụ̃pị̃ na jãꞌdâ,
ꞌbã úmvúke ĩꞌdidrị́ sĩ ị́jọ́ lịjó rĩ ꞌbo.
8 Ãdróŋá la ụ̃nọ́kụ̂ ꞌbã ị́jọ́ lị ị́jọ́ pịrị rĩ sĩ nĩ,
ĩꞌdi sụ́rụ́ kí drị̃ ce ị́jọ́ pịrị rĩ sĩ.
9 Úpí ĩꞌdi ꞌbá ꞌbá ĩkpãlé rĩ ꞌbã kí sĩ apájó ru zị̃jó rĩ ꞌi,
ĩꞌdi ãngũ sĩ ru zị̃jó sáwã ũcõgõ drị̂ agá rĩ ꞌi.
10 ꞌBá ími nĩlépi rá rĩ kí ásị́ ꞌbã ími drị̃ gá rá Úpí
ãꞌdusĩku mí aꞌbe ꞌbá ími ndrụ̃lépi rĩ kí ku.
11 Ĩngo úngó sĩ Úpí rilépi úmvúke drị̃ gá Zị̃yọ́nị̃ gá rĩ ịcụ́jó!
Ĩmi ũlũ sụ́rụ́ ꞌbaní ị́jọ́ pírí ĩꞌdi ꞌbã ngalé rĩ kî,
12 ãꞌdusĩku Ãdróŋá la ꞌbá ꞌbá ꞌbaní ụꞌdị́lé rĩ kí ãrígó tị ũfẽ rá,
ãvĩ ị́jọ́ áwáŋá ꞌbá ĩkpãlé ĩkpã rĩ kí awájó rĩ drị̃ gá ku.
13 Úpí mí adru mání asị́ ị̃gbẹ́ sĩ!
Índre cõcóŋá mẹ́rọ́ꞌbá mádrị̂ ꞌbã kí áma ĩcõcõŋãjó rĩ ꞌi, ípa ma drã agá rĩ sĩ rá Úpí
14 ma dó sĩ ími rụ́ ịcụ́ ũꞌbí kí agá
kẹ̃jị́tị Zị̃yọ́nị̃ drị̂ gá
ãzíla ma dó sĩ uꞌá ãyĩkõ sĩ míní áma pajó rĩ sĩ.
15 Sụ́rụ́ uꞌde kí ꞌbụ́ ĩꞌbaní galé ꞌbá ãzị́ ꞌba ní rĩ agá;
Mãtégõ ĩꞌbaní ꞌbãlé rĩ gbã kí ꞌbã pá vúŋá nĩ.
16 Úpí nze ru vú ị́jọ́ lịŋá pịrị rĩ sĩ,
ị́jọ́ ꞌbá ũnzí rĩ ꞌbã kí ngalé rĩ ꞌbã vúŋá la kí rụ nĩ.
17 ꞌBá ị́jọ́ ũnzí ngalépi rĩ kí fi ꞌbụ́ gá
sụ́rụ́ pírí Ãdróŋá ti gãlépi úmgbé rĩ abe.
18 Wó ꞌbá ãzãkoma lẽlépi rĩ kí ị́jọ́ ãvĩ sáwã pírí sĩ ku;
ásị́ ꞌbãŋá ꞌbá lẽmẽrí rĩ ꞌbadrị̂ icó drãlé cĩrĩkĩní ku.
19 Mí amụ́, Úpí! Ífẽ ꞌbá ꞌbã ndẽ kí mi ku;
mí ájí sụ́rụ́ kí ími drị̃lẹ́ gá sĩ ị́jọ́ lịjó kí drị̃ gá.
20 Úpí, ífẽ sụ́rụ́ kí ꞌbã ásị́ ꞌbã umvú kí ụ̃rị̃ sĩ;
ífẽ ꞌbã nị̃ kí rá kí ꞌbãngá lú ꞌbá.