8
Dị̃zã Ãdróŋá drị̂ kí ị̃nzị̃táŋá ꞌbá drị̂ be
1 Úpí, Úpí ãmadrị̂,
ími rụ́ ꞌbã kụŋá ꞌbã ãmbõgõ ụ̃nọ́kụ́ drị̃ gá ꞌdâ íngõpí yã!
Dị̃zã mídrị̂ alị ꞌbụ̃ kí drị̃ gâsĩ cákáꞌdá.
2 Ífẽ ũkpó anzị nírí ꞌbaní ũrekeŋá kí abe,
sĩ ími ịcụ́jó mẹ́rọ́ꞌbá mídrị̂ kí ị́jọ́ sĩ.
Kí mẹ́rọ́ꞌbá mídrị̂ kí fẽ ꞌbá
lẽlépi ãrígó tị ũfẽlépi rĩ kí abe ĩyãŋãlé tú.
3 Ádrĩ ãngũ ndre ị́nị́ sĩ ãko míní ũꞌbãlé ꞌbụ̃ gá,
ãzị́ ími drị́ ꞌbã ngalé rĩ kí drị̃ gá,
ĩmbá kí lẽlẽgó abe
mí ũꞌbã kí ãngũ ĩꞌbadrị̂ kí agá,
4 ꞌbá ĩꞌdi mgbã rĩ gá ãꞌdu míní sĩ ị́jọ́ ũrãjó drị̃ la gá,
míní sĩ ngọ́tị́ ꞌbádrị̂ tãmbajó?
5 Ãdróŋá, íꞌbã ꞌbá were ími vúlé gá,
mí ụ̃sụ̃ ĩꞌdi dị̃zã sĩ ãrútáŋá be.
6 Íꞌbã ĩꞌdi úpí ru ãzị́ míní ngalé ími drị́ sĩ ri kí drị̃lẹ́ gá;
ãzíla ãko pírí kí ĩꞌdi pálé gá,
7 Kãbĩlõ kí tị́ kí abe pírí,
ãnãkpá ásé agá ri kí,
8 ãriŋa ꞌbụ̃ gá rĩ kí,
Ị̃ꞌbị kí,
ãzíla ãko pírí ị̃yị́ wẽlépi rĩ kí abe.
9 Úpí, Úpí ãmadrị̂,
ími rụ́ ꞌbã kụŋá ꞌbã ãmbõgõ ụ̃nọ́kụ́ drị̃ gá ꞌdâ íngõ pí yã!