98
Ãdróŋá ĩꞌdi Úpí ụ̃nọ́kụ́ drị̂ ꞌi
1 Íngo úngó úꞌdí la Úpí nî,
ãꞌdusĩku idé ị́jọ́ ụ̃sụ̃táŋá ru la kí!
Ũkpó ĩꞌdidrị̂ sĩ ãzíla ãlã ĩꞌdidrị̂ sĩ
fẽ ꞌbá ĩꞌdidrị̂ ꞌbaní patáŋá.
2 Úpí iꞌda sụ́rụ́ ꞌbaní,
ꞌI ũkpó trũ sĩ ꞌbá kí pajó,
ãzíla sĩ kí ị́jọ́ lịjó pịrị.
3 Mba ị́jọ́ ĩꞌdi ꞌbã azịlé ꞌbá ĩꞌdidrị́ Ịsịrayị́lị̃ drị̂ ꞌbaní rĩ ꞌbã tã rá
lẽtáŋá ĩꞌdidrị́ ãmbógó rĩ sĩ.
Úndre patáŋá ĩꞌdidrị̂
ụ̃nọ́kụ́ drị̃ gá ꞌdâ pírí.
4 Ĩmi ꞌbá pírí ụ̃nọ́kụ́ drị̃ gá ꞌdĩ, ĩngo úngó ãyĩkõ sĩ ãzíla ụ́ꞌdụ́kọ́ ụrụgá sĩ Úpí nî,
ĩmi ịcụ́ ĩꞌdi úngó ãyĩkõ drị̂ kí sĩ.
5 Ĩngo úngó Úpí ní ụ̃ꞌdị́ sĩ,
ĩngo úngó ụ̃ꞌdị́ sĩ ãzíla ụ́ꞌdụ́kọ́ ũniyamba mba rĩ sĩ.
6 Ĩvu gũká kí jaligó be,
ĩmi uzá ãyĩkõ sĩ Úpí nî, ãꞌdusĩku ĩꞌdi úpí ꞌi.
7 Mĩrĩ ãmbogo rĩ kí ãzíla ãko alagá rĩ kí abe pírí ꞌbã ịcụ́ kí ĩꞌdi,
ụ̃nọ́kụ̂ ꞌbã ngo úngó ãko pírí uꞌálépi alagá rĩ kí abe.
8 Lẽ ị̃yị́ mĩrĩ rú rĩ ꞌbã sa kí drị́,
lẽ ꞌbé ꞌbã ngo kí úngó ãngũ ãlu gá ãyĩkõ sĩ,
9 lẽ ꞌbã ngo kí úngó Úpî drị̃lẹ́ gá,
ãꞌdusĩku ĩꞌdi amụ́ ị́jọ́ lịlé ụ̃nọ́kụ́ drị̃ gá nĩ.
Ĩꞌdi ị́jọ́ lị ãngũ drị̃ gá ị́jọ́ mgbã sĩ
ãzíla ĩꞌdi ꞌbá kí ị́jọ́ lị ị́jọ́ pịrị sĩ.