99
Ãdróŋá ĩꞌdi Úpí ndẽlépi rá rĩ
1 Úpî ĩꞌdi úpí ru nĩ, lẽ sụ́rụ́ ꞌbã yã kí yã yã;
ri úmvúke ũpĩ drị̂ drị̃ gá kẹ̃rụ́bị̃ kí drĩdríŋĩ gá; lẽ ụ̃nọ́kụ̂ ꞌbã aya ru aya-ayâ.
2 Úpî ĩꞌdi ãmbógó ru ãngũ Zị̃yọ́nị̃ drị̂ gá;
înga ĩꞌdi sụ́rụ́ pírí kí drị̃lẹ́ gá.
3 ꞌBá pírí ꞌbã ị̃nzị̃ kí rụ́ ĩꞌdidrị́ ãmbógó ụ̃rị̃-ụ̃rị̃ rú rĩ ꞌi!
Rụ́ ĩꞌdidrị̂ ĩꞌdi ãlápítí ru.
4 Mi úpí ũkpó trũ ị́jọ́ lịŋá mgbã rĩ lẽlépi rĩ ꞌi.
Mí ají ị́jọ́ lịŋá pịrị rĩ Ịsịrayị́lị̃ gá,
mí idé ị́jọ́ pịrị ãzíla mgbã rĩ
Yãkóꞌbõ gá.
5 Ĩmi ịcụ́ Úpí Ãdróŋá ãmadrị̂ ꞌi;
ãma ãvụ̃ kí ĩꞌdi drị̃lẹ́ gá,
ãꞌdusĩku ĩꞌdi ãlá ru.
6 Mụ́sã kí ándrá Ãrọ́nị̃ be ãtalo ĩꞌdidrị̂ kí agá ĩndĩ,
Sámụ̃wẹ̃lị̃ ándrá ꞌbá ĩꞌdi zịlépi ri kí ꞌbã ãzí;
zị kí ándrá Úpí ꞌi sĩ ãzãkoma ịsụ́jó
ãzíla Úpí umvi kí rá.
7 Jọ ándrá ị́jọ́ ĩꞌba abe angájó ụ̃rụ́ꞌbụ̃ ị́dị́ŋá ru rĩ agá;
mba kí ị́jọ́ ĩꞌdiní vú nzelé rĩ kí tã ãzị́táŋá ĩꞌdiní ándrá fẽlé ĩꞌbaní rĩ kí abe rá.
8 ÚpíÃdróŋá ãmadrị̂,
mí umvi ándrá kí rá;
mí iꞌda ándrá ꞌbá Ịsịrayị́lị̃ drị̂ ꞌbaní mi Ãdróŋá ꞌbá trũlépi ĩndĩ rĩ ꞌi,
wó ífẽ ándrá ĩꞌbaní drị̃rịma ị́jọ́ ũnzí ĩꞌbadrị̂ kí sĩ rá.
9 Ãma ịcụ́ kí Úpí Ãdróŋá ãmadrị̂ ꞌi
ãzíla ãma ị̃nzị̃ kí ĩꞌdi ꞌbé ĩꞌdidrị́ ãlá rĩ drị̃ gá,
ãꞌdusĩku Úpí Ãdróŋá ãmadrị̂ ĩꞌdi ãlá ru!