8
Coal Riem Batien Yaa Ayiiho
1-2 Yaaj me wuor Juog ne cohg kuohm Yijtepen akan gene kedea uyuog gene bang ngo keter. Ke wong cahng nu anahge nu, e naa kaa anaa thub nyoge ke yug giih ajohr me reje ne cohg rog yaa ayiiho giih anaa Jeruucalem. Noono ugoohd thoohdh gene oogo Jeruucalem ukeedh gene ke bang wudh geedh Camaarya. Anahg jo oohr ge naa anaa adoohng Jeruucalem.
3 Abea Coal, ngaa anaa adoohng waay nyoge bange nye kaa anahg Yijtepen, adhal ke yug giih me reje rog yaa ayiiho. Yug giih reje anaa adeehje yi cwihnye ne cohg adhaahr ucaahdhe caahdho e ngo wen miehr giih yaa ayiiho e daahd gen. Noono e kwaad ngaa ayiih lum Juog maa ayoade now, dhe cuow kedea dhaago e ngo kedhe kii karkoohn.
Puohny Pihlihb Camaarya
4 Yaa anaa akeedho ke bang Camaarya ge ake caahdho e ge puohny lum Juog ke yihdh geedhe.
5 Pihlihb ge anaa kwany ke nyoge abiihjberiow ne kony jo oohr, ngo anaa acidho geen Camaarya. Yi geen nu ngo arubo ke nying Ngad Boadh nyoge gihn akwany Juoge.
6 Nyoge me thoohdh ge abeehn bang Pihlihb ne lihng giih puohnye. Wudh gen acub gene ne lihng giih arobe ne cohg bang gihn, bang Pihlihb alihngo yihr gen ke coon kejea giih me gaahy nyoge ge yuge yugo. Kedea awaahn ni giih nu na yuge ge aniid gene ke nying gen.
7 Pihlihb nyoge maa adwaany kedea maa ngoohde ge athiehdhe. Atiihb ukeehg ge arieme oogo yi koohm nyoge. Noono ugoohd gene oogo e ge ungoan bang gihn ariem Pihlihbe ge oogo.
8 Ubeehn yaa yi geew umihn cwihny gene keter.
9 Yi geen ni thiow ngad yiehdhe moogo anudo me nyinge Cimoane. Atahre kea e ngaa me teeg. Yi nihn nu e Cimoane anaa ke theehdho ke nyoge kedea ugaahy gene yi giih tiihye.
10 Yaa anaa yi geen ni cang cuow kedea maahn ge anaa abeehn ne cub wudh gen rog giih yug Cimoane. Noono urub gene kob gene, “Juog gihn duohng ke ngude e ne meehg Cimoane yug kwaad giih nu.”
11 Adiehr muon nyoge ge anaa acwaahng kedea wudh gen anaa acub gene rog giihe noon ni bang gihn ge atiihye ke ka me bange baahr.
12 Abea naa abeehn nyoge ne lihng puohny mar Pihlihb, naa apuohnye nyoge ke dhe yoohn mag Juoge nyoge ne yaae kedea naa arube ke nying Jeacuu Kriihjto, e lum Pihlihb ayiih gene yiiho. Maa abeehn Pihlihbe umuoje gen ke luogwahy, cuow kedea maahn cang.
13 Cimoane thiow, e anahg ngad yiehdhe, amuoj ke luogwahy naa adoohnge ne ngaa maa ayiiho. Noono ucaahdhe caahdho ke batien Pihlihb bang gihn en thiow agaahy yi kwaad giih teeg naa ayug Pihlihbe.
14 Batien gihn nu e dhog awahnh Jeruucalem bang jo oohr kejea yaa Camaarya thiow lum Juog ayiih gene. E Piihter keehd Joon ge ake oohro bang gen.
15-17 Naa awahnh Piihtere maa Joon yi geen ngo e alihng gene lihngo kejea Wahy Juog poohd kuu abeehn wudh yaa ayiiho keehd maa anaa amuoj Pihlihbe gen ke luogwahy ke teeg Jeacuu Ruohdh. Naa angahy gene ngo e Wahy Juog kuu abeehn wudh yaa ni e cing gen acub gene ke wudh gen cang maa akwaj gene Juog beere Wahy Juog cube cubo. Noono maa abeehn Wahy Juoge wudh gen.
18 Naa aniid Cimoane ngo e Wahy Juog abeehn wudh yaa ayiiho naa apiehl jo oohre cing gen wudh gen, e ngiihny ge atume ke cubo yihr Piihter maa Joon kobe,
19 “Cubu kwaad tee gihru noono yihra beere kwaad ngaa cuba cinga wiihe, e Wahy Juog yoade yoado thiow.”
20-21 Maa abeehr Piihtere ngo yihre kea, “Kadhi ke ngiihnyi noono, Juog yih be wiie! Yih dhiile kaa kihmo. Ngaa e naa akob ngo yihri kejea Wahy Juog ke ngeewo ke ngiihny. Yih abeehdo e yih kuu anahg ngad wan kuu umodho. Gihn me beer me cahgi ke yoado tooro, bang gihn Juog cwihnye angol rihi bang gihn apari ngo kejea tee gihre ngeewi ngeewo ke ngiihny. Gihn me cahgi ke yoado bange tooro.
22-23 Yih aniida arumo ne ngad anyoohne me thoohdh! Kea noono maan anyoohne giihi! Kway Juog beere lubo wiie ke piny yihri.”
24 E Cimoane ake rubo yihr Piihter kea, “Cedhree! Kwahyi ke nyinga yihr Juog beere giih nu arobi ge be tiihy Juog riha.”
25 Yaa ayiiho ge na puohny Piihtere maa Joone puohnyo batien gihn nu ayug ree nu. Ge apuohny gene kejea caahdh gene kaa dhe yoohn anyoadh Jeacuue. Naa athum waahdh gene ne do Jeruucalem, e ge acaahdho e ge puohny Ciig Beer yihr nyoge ke bang yihdh miehy akaahn gene.
Pihlihb Lum Jeacuu Apuohnye Yihr Wajiihr Gihr Cuudaahn
26 Cahng ni e wuohnjuog ake rubo yihr Pihlihb kea, “Gwiir rihi ucidhi e yih kaahn yoohn aay Jeruucalem ne ci te bur Gaja.”
27 Noono ugwiir Pihlihbe ree upahdhe yooh. Wajiihr me duohng gihr dhaahr Cuudaahn anaa yi yoohn nu ne do Cuudaahn naa athume ke yug giih kweehr yihr Juog Jeruucalem. Anahg wajiihr ngad mag ngiihny yi dhaahr me dhaago e naa anahg ruohdh yi paajo. Anaa abeehn Jeruucalem ne yug giih kweehr yihr Juog.
28 Kaa anaa acaahdh arbieng cieny gihre caahdho, e ngo anaa ke kwaahno yi kitaab gihn agweed Yicaaya agamloohngjuog.
29 E Wahy Juog ake rubo yihr Pihlihb kejea, “Lay tieni! Cidhi ucaahdhi ke buud arbieng ca.”
30 Gihn nu e Pihlihb tiene alaye layo udoohde arabya, ulihnge wajiihr e ngo ukwaahno yi kitaab gihn agweed Yicaaya agamloohngjuog ni. Maa apeehny Pihlihbe ngo kobe, “Giih nu kwaani awaahn ni yi lum yihdh gen romi kaa ngeyo beer mee ne?”
31 Maa abeehre ngo yihr Pihlihb kobe, “Yihdh gen roma ke ngeyo ke naa diih nea padh ngaa moogo e ne rob giih yihdh gen yihra.” Maa arob Pihlihbe ngo yihr wajiihr kejea yihdh gen rome kaa kwaano yihre. Noono e Pihlihb acuohne cuohno bange yaa arabya beere ge ucaahdho tiehd.
32 Anahg ngol gihn e naa anaa akwaan wajiihre kwaano,
“Ngaa me wa kwaad roomo me piey ne naah.
Wa kwaad roomo me be yuog ka giihdh yiehy ree oogo.
Dhee kuu akuong ne kweg ke lalo.
33 Kwaad deeh ajohr me duohng atiihj ree
kedea ngo aroaj wiih adiehje.
Ne nyoge me reje wiih piny
me kaal wiih raahy yaa anahg ngo?
Be ngaa me kaal wiih raahy gen!
Ngo anahg gene ke naah ajohr.”
34 E wajiihr Pihlihbe apeehnye peehnyo kobe, “Teed ngo yihra, giih ni agweed agamloohngjuoge ge rubo kaa nying ngaa? Beehda ke nying ngud mare ne wale ke nying ngaa moogo?”
35 Pihlihb arubo yihr wajiihr ke nying Ciig Beer ge rubo ke nying Jeacuu Ngad Boadh nyoge. Athubo ke rob e thobe kaa ngol gihn anaa akwaan wajiihre kwaano. Arobe kea ngol gihn nu rubo kaa nying Jeacuu ge ulog beehno cahng moogo ke batien agamloohngjuog.
36-37 Naa awahdh gene buud kar piih e wajiihr ake rubo yihr Pihlihb kobe, “Giih ateedi ke nying Jeacuu ge ayiiha. Cwihnya acuba ne wuor ngo. Muoj wiiha ke piih luogwahy.” Maa abeehr Pihlihbe ngo yihre kea, “Piih luogwahy ge uwoja wiihi nea yih ayiiho ke cwihnyi cang.” Maa aduoge ngo kea, “Ngo ayiiha ke cwihnya cang kejea Jeacuu Ngad Boadh nyoge beehda Waahd Juog ke ngude.”
38 Ubeehn wajiihre maa arobe ngo yihr ngaa doang arabya gihr ciehnye doango kejea mage yaa arabya ucuunge. Noono ucidh Pihlihbe maa wajiihre yihdh piih uwoje piih wiihe ne cub luogwahy yihre.
39 Naa abeehn gene oogo yihdh piih, e Wahy Juog Pihlihb akaabe kaabo ukedhe ngo ka me kuu acahg wajiihre ke niido keehdo. Ubeehn wajiihre ubare maalo keehd waahdhe e cwihnye med kwaade tooro.
40 Batien gihn nu e Pihlihb ree ayoade ke ka me cuohn naa Ajotoj. Uaay Pihlihbe ne ci Cejearya, e caahdhe e ngo puohny Ciig Beer yihr nyoge ke bang yihdh geedhe giih toohnge yihdh gen.