5
Jun tqanil kye xjal qꞌinin
1 Kybꞌiꞌntzin jaꞌlin, ayeqiꞌy qꞌinin: Chi oqꞌa, ex chi ẍchꞌiꞌn, quꞌn ktzajil jun kawbꞌil kujxix kyibꞌaja.
2 Ikytziꞌn, ajo kyqꞌinimila ma qꞌayj, ex ikyxjo, a kyxbꞌaliꞌn tbꞌanilx ma bꞌaj tuꞌn pokꞌ.
3 Ajo qꞌanpwaq ex saqpwaq kꞌuꞌn kyuꞌn, ma chꞌiy xul kyiꞌj, ex axsin qꞌolte kyqaniljiꞌy te yuchꞌil kyeꞌy, ex k-okil meltzꞌaj kyiꞌja tzeꞌnku jun qꞌaqꞌ te kawbꞌil kujxix kyibꞌaja. Ikytziꞌn, ma chi ok ten chmolte kyqꞌinimila; tzunx ok kyuꞌn tzma tzaluꞌn. ¿Me mitzin bꞌiꞌn kyuꞌn, qa chꞌix tikyꞌ twutz txꞌotxꞌ?
4 Nchi qanbꞌin kyaqꞌnila kyiꞌja, tuꞌnjo mi ẍi ex kychjoꞌn, tej tjaw kyawala. Ex ma chi bꞌijtey tuꞌn Dios, a tAjaw Tkyaqil.
5 Atzin kyeꞌ tzaluꞌn twutz txꞌotxꞌ, ma kyli jun kyeꞌ kychwinqil toj tbꞌanilx, ex tzeꞌnku kyaja, ikyqetzinjiꞌy tzeꞌnku jun ma nimxix wakx ma bꞌant, tuꞌn tkubꞌ bꞌyet.
6 Ex ikytziꞌn kyuꞌn kyiꞌjqe ntiꞌ kypaj, nchi kux kyjpuꞌn toj tze, ex atku maj nchi kubꞌ kybꞌyoꞌn, me mi ẍi ok meltzꞌaj kyiꞌja. Noqx kubꞌ kyyoꞌnx kyibꞌ.
Tenxsin qkꞌuꞌj tuꞌn qayoꞌn tajbꞌil qAjaw, ajxi tul
7 Atzin kyetza, werman, qetzin kyeꞌ kykꞌuꞌj tuꞌn kyayoꞌn tajbꞌil qMan Dios, tzmaxi aj tul qAjaw, ikytziꞌn tzeꞌnku jun aqꞌnil twutz txꞌotxꞌ, il tiꞌj tuꞌn tayoꞌn ajxi tul jbꞌalil. Ajxi takꞌ ttxꞌotxꞌ aꞌlexsin at tkꞌuꞌjjo tuꞌn tayoꞌn, tuꞌn tlonte tbꞌanil tawal.
8 Ikytzin kyejiꞌy tuꞌn tten kykꞌuꞌja tuꞌn kyayoꞌn, ex chi weꞌkuxixa toj kynimbꞌila, quꞌn chꞌix tul te qAjaw.
9 Ikytzin quꞌn, werman, mina tzꞌok kyqꞌojlin kyibꞌa, tuꞌn mi chi okiy toj kawbꞌil. Ikytziꞌn, ate Dios, a Kawil, nyakuj nqꞌolbꞌin toj tjpel ja, quꞌn chꞌix tul twutz txꞌotxꞌ.
10 Ayiꞌy werman, kynaꞌnqetzinjiꞌy aye yolil Tyol Dios ojtxe, tuꞌn kyok te jun yekꞌbꞌil qe jaꞌlin. Jniꞌxsin sikyꞌx kyiꞌj, me ma ten kykꞌuꞌj toj tkyaqil.
11 Ex ikyxjo qe jaꞌlin, kyꞌiwlinqoxixqe, qa ma qo weꞌ twutz tkyaqiljo kkyꞌelix quꞌn. O tzꞌok kybꞌiꞌn tiꞌj tkꞌuꞌj Job, tuꞌn tayoꞌn tkyaqil tajbꞌil qMan, ex ma tzꞌok kybꞌiꞌn tzeꞌnx tene tuꞌn tAjaw Tkyaqil tuꞌn tklet, tbꞌajlinxitziꞌn sikyꞌx tuꞌn. Ikytziꞌn, tbꞌanilx te qAjaw, ex nimx tqꞌaqꞌbꞌil tkꞌuꞌj qiꞌj.
Qo yolin twutzxix, ex mi kubꞌ qewin
12 Me atzin jaꞌlin, toj tkyaqil, ilxix tiꞌj tuꞌn qyolin toj ttxolil. Mi tzaj qqꞌolbꞌin tbꞌi kyaꞌj, ex tbꞌi txꞌotxꞌ, ex mix aꞌl tbꞌi juntl, tuꞌn qqꞌmante qa twutzx jun qyol. Qalaꞌ, qa twutzxtaq jun tiꞌ, ex twutzx qyoltz; ex qa nya twutzx, exsinx minaxtz, tuꞌntzin mi qo tzaj tkawin qMan Dios.
Qpaꞌnktz qil ex qo naꞌn Dios kyukꞌa qerman
13 Qa at jun kyxola ma tzaj jun bꞌis tiꞌj, bꞌaꞌn tuꞌn tnaꞌn Dios. Ex qa at jun at ttzaljbꞌil tukꞌa, bꞌaꞌn tuꞌn tbꞌitzin bꞌitz te nimsbꞌil tbꞌi qMan Dios.
14 Ex qa at jun ma yabꞌte kyxola, bꞌaꞌn tuꞌn kytzaj ttxkoꞌn nejinel kyxol Ttanim Dios, tuꞌn kynaꞌn Dios tiꞌj, ex tuꞌn tkyij kysuꞌn chꞌin aseyt tiꞌj tplajjo yabꞌ toj tbꞌi qAjaw.
15 Me ajtzin kynaꞌn Dios tukꞌa kynimbꞌil, oktzin kweꞌbꞌil yabꞌ, exsin a qAjaw kꞌwel qꞌaninte. Ex qa at til o tbꞌinche, ok kꞌwel najsin tuꞌn Dios.
16 Tuꞌnpetziꞌn, kypaꞌnktz kyila jun tukꞌa juntl, ex chi naꞌn Diosa jun tiꞌj juntl, tuꞌntzin tul Dios kyeꞌy. Quꞌn a tnaꞌj Diosjo, a bꞌaꞌn nbꞌete toj tumil, kbꞌantil nimku tuꞌn.
17 Kaꞌntzin tejiy yolil Tyol Dios ojtxe, a Elías: Xjalx tzeꞌnku qe xjalqo. Me atziꞌn teꞌ t-xi tqanin toj tnaꞌj Dios, tuꞌn mi tzꞌetza jbꞌal tibꞌaj txꞌotxꞌ, ex mix etze jbꞌal toj oxe abꞌqꞌe tukꞌa nikyꞌjin.
18 Tbꞌajlinxitziꞌn ikyjo, aqꞌe majl naꞌl Dios, tuꞌntzin ttzaj jbꞌal; bꞌeꞌxsin tzaj qꞌoꞌn jbꞌaltz tibꞌaj txꞌotxꞌ, tuꞌn ttzaj tawal.
Qqꞌonx jun tumil te onbꞌil tuꞌn tja weꞌks erman
19 Ayiꞌy werman, qa at jun o tzꞌel txalpaj tiꞌjjo tumil twutzxix, il tiꞌj tuꞌn ttzaj onit, tuꞌn tajtz meltzꞌaj.
20 Bꞌiꞌnku kyuꞌn qa at jun kyeꞌ kxel onil tiꞌjjo ma txiꞌ toj bꞌe nya wen, kkletil tanmin xjal tuꞌn, ex mi kyim tukꞌa til. Atzin jniꞌ til kꞌwel najsin ikyjo tuꞌn Dios.