Tnejil Tuꞌj Pegr
Pegr tbꞌi jun tsanjil Jesús, a kubꞌ tzꞌibꞌin te uꞌj lo, a xi smaꞌn kye nimil kysipin kyibꞌ toj txꞌotxꞌ te Asia Menor, quꞌn otaq chi okx toj joybꞌil ex yajbꞌil noq tuꞌn tpajjo kynimbꞌil. Nimxix nqꞌuqbꞌin Pegr kykꞌuꞌjjo nimil, ex ntzaj tnaꞌn kye tzeꞌn ẍi klete tuꞌn Dios; exsin tzaj tqꞌoꞌn jun qꞌuqꞌbꞌil kykꞌuꞌj noq tuꞌnjo tkyimlin ex tjawlintz anqꞌin Crist. Ex atzin qꞌuqbꞌil kykꞌuꞌjjo, a tulil qAjaw tkabꞌ majin qꞌilkye, tuꞌn kyxiꞌ toj kyaꞌj najal tukꞌa te jun majx. Ayetzin nimil luꞌn, quꞌn n-ikyꞌx yajbꞌil kyuꞌn noq tuꞌn tpaj Jesucrist, ex at kyoklin tiꞌjjo tqoptzꞌajiyil, aj tul juntl majl (4:13; 5:1).
Toj tkyaqiljo yol tojjo uꞌj luꞌn, ntzaj t-xnaqꞌtzin Pegr, tuꞌn t-xi qiꞌn jun qchwinqil tbꞌanil tuꞌn tok te jun yekbꞌil kywutz txqantl, tzeꞌnkuxjo tbꞌanil txokbꞌil ma tzaj tqꞌoꞌn Dios qe. Ayetzin nimil bꞌaꞌn tuꞌn tkyij kytzaqpiꞌn a jniꞌ nkubꞌ kybꞌinchin nya wen, tej naꞌmxtaq kynimin tiꞌj qAjaw; exsin kxel kyiꞌntz jun kychwinqil saqxix wen, tuꞌntzintla ntiꞌ jun yolbꞌil kyiꞌj kyuꞌnxjal nya nimil. Ex nxi tqꞌoꞌn Pegr tumil kye junjun chꞌuq xjal toj Ttanim Dios, a tzeꞌnku kye aqꞌnil, ex kye chmilbꞌaj, ex kye tij xjal ex kye kuꞌxin. Ex at juntl tumil, qa wen tuꞌn kykubꞌ qnimin aj kawil. Tibꞌaj tkyaqiljo lo, ntzaj tnaꞌn tuꞌn tkubꞌ qbꞌinchin tkyaqil tukꞌa qkꞌuꞌjbꞌil qxol.
1
Jun qꞌolbꞌil tuꞌn Pegr
1 Ayiꞌn Pegr jun tsanjil Jesucrist; nxi ntzꞌibꞌinjiꞌy uꞌj luꞌn kyeꞌy, a ayiꞌy kysipin kyibꞌa tuꞌn tpaj kynimbꞌila, ex ma chi oka te bꞌetin xjal toj txꞌotxꞌ te Ponto, Galacia, Capadocia, Asia ex Bitinia.
2 Ayiꞌy o chi jaw skꞌoꞌn tuꞌn qMan Dios, a tzeꞌnkuxjo t-xim attaq te tnejil, noq tuꞌn kysaqixa tuꞌn Xewbꞌaj Xjan, tuꞌntzintla tkubꞌ kynimiꞌn, ex tuꞌn kyoka tzꞌaqle tuꞌn tchkyꞌel Jesucrist. Noqit nim t-xtalbꞌil ex tnukꞌbꞌil kyibꞌaja toj tkyaqil.
Ajo t-xilin kolbꞌil
3 Qo nimsin tbꞌi tDios ex tTata qAjaw Jesucrist, quꞌn noq tuꞌn tqꞌaqꞌbꞌil tkꞌuꞌj, tzaj tqꞌoꞌn tumil tuꞌn qitzꞌje tkabꞌ majin, noq tuꞌn tjawlintz anqꞌin Jesucrist kyxol kyimnin. A tzaj qꞌoꞌnte nim qꞌuqbꞌil qkꞌuꞌjjo toj qchwinqil tzaluꞌn twutz txꞌotxꞌ,
4 ex a ktzajil qꞌoꞌnte jun qetzbꞌil te jun majx, a kꞌuꞌn tuꞌn Dios toj kyaꞌj, tuꞌntzintla mi xitje, ex tuꞌn mi yaje, ex tuꞌn mi molje.
5 Ex noq tuꞌn kynimbꞌila tiꞌj Dios, aku Dios nklon kyeꞌy tukꞌa tkyaqil tipin, tuꞌntzintla tlajetjo kolbꞌil, a bꞌantnin tuꞌn, ex ktzajil tyekꞌin, aj tpon bꞌaj tqꞌijil.
6 Tuꞌnpetziꞌn, nimx nchi tzalaja, exla qa il tiꞌj tuꞌn tikyꞌx yajbꞌil kyuꞌn toj jteꞌbꞌin qꞌij.
7 Ajo n-ikyꞌx kyuꞌn jaꞌlin, tzeꞌnku jun qꞌaqꞌ te saqsbꞌil kynimbꞌila, ikyxjo tzeꞌnku qꞌanpwaq il tiꞌj tuꞌn tsaqix tuꞌn qꞌaqꞌ. Me atzin kyinimbꞌila nimxixtl toklin tzeꞌnku qꞌanpwaq, quꞌn atzin qꞌanpwaq knajil, me atzin kynimbꞌila kyjel teꞌ te jun majx. Ikytzin kyejiꞌy kynimbꞌil tzeꞌnku te qꞌanpwaq, aj tsaqix tuꞌn qꞌaqꞌ; qa ma chi weꞌy toj tkyaqiljo n-ikyꞌx kyuꞌn, axte Dios k-yolil wen kyiꞌja, ex kjawil tnimsin kybꞌiy, ex ktzajil tqꞌoꞌn nim kyokliꞌn, aj tul Jesucrist juntl maj.
8 Exla qa naꞌm kylontiy, me ma qe kykꞌuꞌja tiꞌj; exla qa ntiꞌ tzaluꞌn twutz txꞌotxꞌ tuꞌn kykaꞌyiꞌn tiꞌj jaꞌlin, me at kynimbꞌila tiꞌj, ex nim nchi tzalaja tukꞌa jun t-xilin tzaljbꞌil, a ntiꞌ tumil tuꞌn tbꞌant kyqꞌmaꞌntey tkyaqil,
9 quꞌn nkykꞌmoꞌnjiꞌy ajo t-xilin kynimbꞌila, a kolbꞌil te jun majx.
10 Kyojjo qꞌij ojtxe, aye yolil Tyol Dios, aye i kꞌmoꞌnte Tyol, nim i xpichꞌin tiꞌj, ex i jyoꞌn tiꞌjjo t-xilin kolbꞌil, a tuꞌntaq xi tqꞌoꞌn Dios kyeꞌy tuꞌn t-xtalbꞌil.
11 Nimx i xpichꞌin tiꞌj, tuꞌn tel kynikyꞌ te, ankye ex jtojtzin bꞌajjo a otaq tzaj tqꞌmaꞌn T-xew Crist, a Xewbꞌaj Xjan, toj kyanmin, tej t-xi tqꞌmaꞌn qa iltaq tiꞌj tuꞌn tikyꞌx yajbꞌil tuꞌn Crist, ex yajxi tuꞌn tjaw nimsit tbꞌi, tbꞌajlinxiꞌ yajlajtz.
12 Me mix kanine kynabꞌl tuꞌn tel kynikyꞌ tiꞌjjo t-xilin lo, quꞌn tzaj tqꞌmaꞌn Dios kye, qa nya te kyex nchi ajbꞌinetaq toj kyaqꞌin, qalaꞌ te qe jaꞌlin, quꞌn i yolin tiꞌj a naꞌmtaq tel kynikyꞌ tiꞌj. Me atzin jaꞌlin, ayetzin kyeꞌ ma tzꞌel kynikyꞌa tiꞌj, kyuꞌnjo aye nchi yolin tiꞌjjo Tbꞌanil Tqanil kolbꞌil, noq tuꞌn Xewbꞌaj Xjan, a tzaj smaꞌn toj kyaꞌj. Nimxix t-xilinjo lo; majqexpe kye angel kyaj tuꞌn tel kynikyꞌ te.
Jun txokbꞌil tuꞌn Dios tuꞌn qok xjanxix toj tkyaqil
13 Tuꞌnpetziꞌn, kyximinkuxixsiꞌn wen alkye kꞌwel kybꞌinchiꞌn. Kytzyumtzin kyibꞌa, ex kyinxsin jun kychwinqila tzꞌaqle. Qexsin kykꞌuꞌja tiꞌjjo a ktzajil tqꞌoꞌn Dios tuꞌn t-xtalbꞌil, aj tul Jesucrist juntl maj.
14 Kyniminkuy Dios tzeꞌnqeku kꞌwal te kytata: Mi txi kyqꞌoꞌn kyibꞌa tojjo kyachbꞌila, a attaq, tej naꞌmtaq tel kynikyꞌa te Dios.
15 Qalaꞌ, chi bꞌet-xixa toj jun tumil xjanxix toj kychwinqila, quꞌn ate Dios, a xtxkon kyeꞌy, tuꞌn kyxi lipeꞌy tiꞌj, xjanxix teꞌ.
16 Ikytziꞌn tzeꞌnku ntqꞌmaꞌn toj Tuꞌjil Tyol Dios: Chi okxa xjan, quꞌn xjanqin weꞌch.
17 Ex qa ma tzꞌok kyqꞌoꞌn Dios te kyMaꞌn, kynaꞌntziꞌn qa kchi okilxjal toj xjelbꞌil tuꞌn, a mi n-ok tkaꞌyin kytenxjal, qalaꞌ kkawil jikyinxix wen. Tuꞌnpetziꞌn, chi bꞌettzintza toj tchewil Dios tkyaqil qꞌij, quꞌn ma chi oka te jun bꞌetin xjal tzaluꞌn twutz txꞌotxꞌ, noq tuꞌn tpaj kynimbꞌila tiꞌj Crist.
18 Quꞌn ate Dios ma klon kyeꞌy tojjo kychwinqila, a ntiꞌtaq tajbꞌin, a tzeꞌnku tzaj kyyekꞌin ojtxe kyxeꞌchila. Quꞌn bꞌiꞌnxix kyuꞌn, qa a chojbꞌil tejo kolbꞌil mix chjete tukꞌa jun tiꞌ, a kbꞌajil, tzeꞌnku qꞌanpwaq mo saqpwaq;
19 qalaꞌ tukꞌa tchkyꞌel Crist, a tbꞌanilxix te jun majx, a xi qꞌoyit te chojbꞌil qil twutz Dios, tzeꞌnku jun tal tal rit te oyaj twutz qMan, a tzꞌaqle, ex ntiꞌ tkyꞌi.
20 Quꞌn ate Crist jaw tskꞌoꞌn Dios, tuꞌn tok te chojbꞌil qil, a naꞌmxtaq tkubꞌ tbꞌinchin tkyaqil tchꞌiysbꞌin. Me tzmax tzaluꞌn, a chꞌix tjapin bꞌaj tqꞌijil, ma kubꞌ tyekꞌin tibꞌ, noq tuꞌn kyel wena.
21 Quꞌn noq tuꞌn Crist, o chi nimiꞌn tiꞌj Dios, a jatz anqꞌin kyxol kyimnin, ex ma jaw nimsin tuꞌn Dios, tuꞌntzintla ajo kynimbꞌila ex qꞌuqbꞌil kykꞌuꞌja tuꞌn tten tiꞌj Dios.
22 Atzin jaꞌlin, noq tuꞌn ma kubꞌ kyniminjiꞌy Tbꞌanil Tqanil, ma chi saqixa tuꞌn, tuꞌntzintla ttenxix kykꞌuꞌja kyiꞌj txqantl nimil. Tuꞌnpetziꞌn, kykꞌuꞌjlimtzin kyibꞌtza nimxix jun tukꞌa juntl, tukꞌa tkyaqil kyanmiꞌn.
23 Quꞌn ma chi itzꞌjiꞌy tkabꞌ majin, nya tuꞌn jun kytatiy tzaluꞌn twutz txꞌotxꞌ, a kkyimil; qalaꞌ tuꞌn Tyol Dios, a itzꞌ, ex ktenbꞌil te jun majx.
24 Quꞌn ikytzin ntqꞌmaꞌn toj Tuꞌjil Tyol Dios:
Tkyaqilxjal ikyxjo tzeꞌnku tal kꞌul.
Ex ajo kybꞌinchbꞌin ikyxjo tzeꞌnku t-xmakil kꞌul.
Quꞌn atzin te kꞌul ktzqijil,
ex atzin t-xmakil k-elil tzꞌaq.
25 Me metzin teꞌ Tyol qAjaw ktenbꞌil teꞌ te jun majx.
Ex atzin yol lo, a Tbꞌanil Tqanil kolbꞌil, a nyolajtz kyxola.