17
Kepoyun simakay te menenanap mebolot
1 Penga niyan, migpedapag kanak se sebad anghil tapay nengibing te lipong, aw minikagi, “Taking ka kanak, aw ipekità ko kamno se pelumun te Timanem diyà te kepoyun ontò nedengeg eg-ogpà kidoen te medita wayeg.
2 Limayok se kedita te selotan te keneyonan kandin, aw nelasing se kedita te otaw te keneyonan pineokit te bino imboyo din kandan.”
3 Penga niyan, doen impekità te Espiritu Santo kanak, aw inibing a te anghil doton te kebigtilan. Kinità ko se bayi simakay te melalag menenanap mebolot. Doen medita ngadan egtompuyus te Timanem insolat kidoen te lawa te menenanap sìyan, aw doen pito olo din aw sempolò se seka din.
4 Migdagom se bayi te melalag ontò meelagà aw iling te selotan. Doen palas din ininang te bolawan, aw bato meelagà, aw menge pirlas. Inewidan din se tabò ininang te bolawan, aw nepenò iyan te inang din medaet.
5 Kidoen te kilay din, insolat se ngadan doen kedegdagan in-eles, kagi din, “Babilonya, lonsod nedengeg, eglekatan te kedita te kepoyun aw kedita te medaet kidoen te keneyonan.”
6 Kinità ko heman te nelasing den se bayi sìyan, so ininem din se dakel dipanog te menge sakop te Timanem inimetayan din tandà te pegsalig dan diyà ki Jesus.
Pegkità ko kandin, ontò a nepela.
7 Meneng minikagi se anghil, “Ikà egkepela, so indanan ta den te kedegdagan tepad te bayi seini, aw tepad te menenanap mebolot sinekayan din doen pito olo aw sempolò se seka.
8 Sìyan menenanap mebolot kinità no, doen pedowan din kedengan, meneng nematay den. Meneng te eked kenamay, meantay aw lomowà lekat te awang kidoen te tanà wedad temanan te kedalem. Aw lomowà iyan, iagbel iyan doton te kilot amon ipelumun. Mepela se kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se insolat te wedà pa inangi se keneyonan. Mepela dan so kinità dan se sìyan menenanap mebolot, aw nematay iyan, meneng meantay pa.
9 “Keilangan biyasa se otaw amon mekelabet kani. Se pito olo te menenanap mebolot, yan se pito bontod eg-ogpaan te bayi sìyan.
10 Se pito olo te menenanap mebolot, yan heman se pito selotan. Nematay den se lima kandan, aw doen sebad limowan seini, aw doen pa sebad wedà pa lowan. Aw lomowan se ikepito selotan, mesagda se peglowan din te eked kenamay.
11 Se menenanap mebolot, sìyan doen pedowan din kedengan meneng nematay den, yan se ikewalo selotan, meneng doma iyan te pito ketondogan din. Ipelumun sikandin kwani kidoen te kilot.
12 “Se sempolò seka kinità no, yan se sempolò selotan wedà pa lowan. Meneng isawol dan selotan amon lomowan dan doma te menenanap mebolot te eked kenamay, sebad olò oras.
13 Megsebad se aneng-aneng te sìyan sempolò selotan, aw megpesakop dan diyà te menenanap mebolot, aw tomolò dan te ipunù din kandan.
14 Penga niyan, megbolaw dan te Karniro. Meneng dàgen din dan, so sikandin se Pengolo diyà te kedita te pengolo, aw sikandin se Selotan eglowan diyà te kedita te selotan. Se kedita te sakop te Karniro, yan se otaw tinawal te Timanem, aw pinemallì din, aw egkeseligan dan.”
15 Minikagi heman se anghil, “Se wayeg kinità no inogpaan te kepoyun, yan se medita kemolò te otaw eked kebilang lekat te medita lonsod, aw medita kemolò se kagi dan.
16 Se sempolò selotan pinolingunan te sempolò seka kinità no, meopal dan te kepoyun. Meopal heman kandin se menenanap mebolot. Yan se doun te meglompak dan kandin, aw mengabat dan te penenaktun din, aw komaen dan te onod din, aw sonogen dan sikandin.
17 Yan se inangen dan kandin, so begayan dan te Timanem te ibeg amon tomanen dan se lalang din. Yan se doun te megsebad dan te pedowan aw megpesakop dan diyà te menenanap mebolot amon megtelaban dan kenyan lamig metoman se tapay impakang te Timanem.
18 Se bayi kinità no, yan se lonsod nedengeg eglowan diyà te kedita te selotan te keneyonan.”