18
Pegkebaet te Babilonya
1 Penga niyan, kinità ko se sebad anghil timenà lekat te langit. Melangkaw se gulal din, aw migkelowa se kedakel te keneyonan tandà te keanyag din.
2 Timawal sikandin te ontò dakel se kagi din, “Ontò den nebàtan se Babilonya, lonsod nedengeg. Neinang den iyan ogpeanan te bosaw. Nelegeb iyan te kedita te enito. Nelegeb iyan te kedita te manok ontò medaet.
3 Neinang iyan iling kenyan so neboyo se kedita te otaw te keneyonan amon makop dan diyà te medaet inang din egkeopalan te Timanem. Limayok se kedita te selotan te keneyonan kandin. Migkeyaman heman se kedita te tindiro te keneyonan bineyadan din te kepulukan din amon metoman se medaet ibeg din.”
4 Penga niyan, doen doma dinineg ko minikagi kidoen te langit, “Kedita niyo migpesakop diyà kanak, kesayo kaw lekat te ogpeanan sìyan. Eked a keibeg aw makop kaw diyà te salà te bayi sìyan, amon eked kaw heman detengi te kededàtan domateng kandin.
5 Simpana ilodok se kedakel te salà din, mapet den te langit, so ontò den dakel. Wedà pegwedadi te Timanem se salà din ontò medaet.
6 Se ininang din diyà te doma otaw, yan heman se inangen kandin. Se pegpemilang din te doma, dobli se pegpemilang domateng kandin. Se keopal din kenyo, dobli heman se keopal te Timanem kandin.
7 So migpelangkaw-langkaw sikandin aw tinoman din se medaet ibeg din, yan heman se kebegat te pelumun domateng kandin, so elegen sikandin aw melano. Mig-aneng-aneng sikandin te iling sikandin te selotan, kenà iling te balo. Eden din aw eked palos sikandin kelano.
8 Meneng yan se doun te dalem te sebad se aldaw, detengan sikandin te kededàtan, so ipelumun sikandin pineokit te mesakit, aw kelano, aw bayil. Mesonog heman sikandin te apoy, so ipelumun sikandin te Timanem metolos Pengolo.”
9 Aw kitaen se ebel te pegsonog kandin, megkelag aw megmatay se kedita te selotan limayok kandin aw timoman te kedita te ibeg din medaet.
10 Megpekediyò dan kidoen amon eked dan kesàbi te pelumun domateng kandin, aw mikagi dan, “Ontò mekelelayò se Babilonya lonsod nedengeg, so dalem te sebad oras, nesàban iyan te pelumun.”
11 Megkelag aw melano heman se kedita te tindiro tandà te pegbaet kenyan, so wedad den mayad te ibeligyà dan,
12 menge bolawan, aw selapì, aw bato meelagà, aw pirlas, aw tila mepotì, aw meelagà tila te selotan, aw sida, aw tila melalag, aw tabla mèpiya nadeg, aw medita kemolò te ibeligyà dan ininang lekat te tangkò te elefanti, aw meelagà tabla, aw tombaga, aw kinis, aw bato marmol.
13 Wedad heman mayad te ibeligyà dan, menge kaningag aw menge doma kemolò te enagay, aw metinadeg sonogen, aw sìyan bebolong iningedanan mira, aw litek metinadeg, aw bino, aw lana, aw arina, aw trigo, aw baka, aw karniro, aw kodà, aw keriton, aw allang, aw pengkey otaw wedad ontong.
14 Minikagi dan heman diyà te bayi impolingun diyà te lonsod te Babilonya, “Nebàtan den se kedita te egkeibegan nikaw. Nebàtan den se kedita te mèpiya kànen no aw kedònan no, aw eked iyan palos todà kitai.”
15 Se kedita te otaw migkeyaman pineokit te pegpemeligyà dan te menge meelagà kidoen, megpekediyò dan te lonsod sìyan amon eked dan kesàbi te kededàtan. Megkelag aw melano dan.
16 Mikagi dan, “Ontò mekelelayò se lonsod nedengeg. Nenaol se otaw kidoen te mèpiya sapot, aw tila te selotan, aw melalag. Migpalas dan heman te bolawan, aw bato meelagà, aw menge pirlas.
17 Meneng dalem te sebad oras, nebàtan se kedakel te keyemanan dan.”
Migpekediyò heman se otaw egpengibing te bapor, aw menge otaw simakay te bapor, aw menge gormiti, aw kedita te otaw egpengibing te karga diyà te bapor.
18 Pegkità dan te ebel lekat te pegkesonog te lonsod sìyan, timawal dan, “Wedad palos lonsod labi pa nedengeg diyà te lonsod sìyan.”
19 Imbodbod dan se napò te tanà diyà te olo dan tandà te lano dan. Migkelag dan aw timawal dan, “Ontò mekelelayò se lonsod nedengeg, so migkeyaman se kedita te tig-apò te bapor nengibing te keyemanan doton kenyan. Nebàtan se kedita niyan dalem te sebad olò oras.”
20 Keilangan meluba kaw tege langit, so nebàtan den iyan. Keilangan meluba kaw menge sakop te Timanem, aw sogounun i Cristo, aw telekeliwat te kagi te Timanem, so impelumun den te Timanem se lonsod sìyan tandà te pegpemilang niyan kenyo.
21 Penga niyan, inabat te anghil se bato iling te kedakel te dakel gilingan, aw indagdag din kidoen te dagat. Minikagi sikandin, “Iling kenyan, nebàtan den heman se lonsod te Babilonya nedengeg, so eked palos todà kitai.
22 Eked den palos dinegi se daging te pegkablit te alpa, aw kagi te otaw megdelangan, aw daging te seluli aw bodyong. Eked den palos kitai kidoen se otaw biyasa meg-inang te pengkey eden. Eked den palos dinegi kidoen se daging te gilingan.
23 Wedad den palos menemtem te solò kidoen. Wedad den heman meg-inang te peipid kidoen. Impelumun se tege Babilonya so doen menge otaw egpemeligyà kidoen migpelangkaw-langkaw, aw doen mig-akal te kedita te otaw pineokit te pegboyo dan kandan.
24 Impelumun se tege Babilonya so sikandan se nengimatay te menge telekeliwat te kagi te Timanem, aw menge sakop din, aw kedita te otaw binonò kidoen te keneyonan.”