11
Láazarota mukukä bétana nokhuame
1 Senu yoreme Láazaro ti téhuaka júnaköri kökorey, Betaniapo jometaka, María éntok Marta ä ákorohua pueblopo.
2 María, Láazaro kökoremta huaayi, ïri ínel jü Señortat juka perfuumeta át töak, éntok ä chonimmey guókpo ä huaachak.
3 Láazarota huaayim Jesústau nokta bíttuak, ínel jiamta:
—Señor, jü em nákëu kökore.
4 Jesús éntok ä jíkkajaka ínel jiaahua:
—Ï kökoa kaa áy kókko béchïbo, ál‑la juka Diosta looria át bíttunakë béchïbo, éntok két ä Üusibet ä bíttunakë béchïbo.
5 Jesús éntok Martata nákkey, éntok ä huayihua, éntok Láazarota.
6 Të íkäi jíkkajaka, ä kökorë bétana, júchi guoy táapo áma taahuak, ä aneïpo.
7 Huanäi chúkula jume ä discíipulommeu ínel jiaahua:
—Jánte jum Judea buiärau bíchaa.
8 Huanäi jume ä discíipulom ínel áu jiaahua:
—Maestro, én jume judíom enchi jariay, tetammey enchi mamaasu báreka. Entok, ¿júchë áman huée báare?
9 Jesús ínel am yómmiak:
—¿Jachu jü taahuari kaa dooce horam jípure? Huä taahuapo hueramame kaibu tëitinake, bueïtuk ímï ániapo machiriay bitcha;
10 të hua tukaapo hueramame tëitinake, bueïtuk jü machiria kaa át aika.
11 Íkäi noksuka, chúkula ínel ámeu jiaahua:
—Huä itom amigo Láazaro kótche; tëne áman huéiye ä búsa báreka.
12 Huanäi jume ä discíipulom ínel jiaahua:
—Señor, kóchëtek, yún éenake.
13 Jesús ínel jiaahua, Láazarota mukila bétana. Të bempo kócheka jimyorehuamta bétana ä nokä téiyey.
14 Huanäi Jesús huitti ínel ámeu jiaahua:
—Láazaro béja muukuk.
15 Enchim béchïbone al‑leiya, kaa áman itom anekä béchïbo, enchim nee súalnakë béchïbo. Të ámante áu kannake.
16 Huanäi hua Toomas, Guoguörï téame, ínel jiaahua huame áamak discíipulommehui:
—Ítapo kétte áamak kannake, áamak kókko béchïbo.
Jesús jü júchi jíabitehuame éntok jíapsihuame
17 Jesús áman yepsaka tejhuahuak: Láazaro béja naiki taahuarey, mäataka.
18 Betania pueblo éntok kaa mékka Jerusaléniu taahuay, jíba tua batte báij kiloometropo.
19 Juebena judíom ámeu yáij‑latukay Martatau éntok Maríatahui, am yánti jíapsi joa báreka, bem ábachi mukukä béchïbo.
20 Huanäi Marta Jesústa áman huë tíay ä jíkkajaka, ä nankiseka yeu siika; María éntok jóapo taahuak.
21 Huanäi Marta Jesústau ínel jiaahua:
—Señor, enchi ím aney ín ábachi kaa muk éiyey.
22 Të énne két jüneiya, sïmeta Diostau em aahuäu, Dios enchi ä máknake.
23 Jesús éntok ínel ä yómmiak:
—Em ábachi jíabitenake.
24 Marta éntok ínel áu jiaahua:
—Ínapo jüneiya ä jíabitenakëu júnak sïmem jíabiteyo, huaka taahuata yúmako.
25 Jesús éntok ínel áu jiaahua:
—Ínapone jü yore jíabitetuame éntok jü jíapsihuamta yore mákame. Huä nee súaleme mukilataka júne júchi jíapsinake.
26 Éntok sïme hua jiápsaka nee súaleme jíbapo béchïbo kaibu muknake. ¿Jachë íkäi súale?
27 —Jeehui, Señor —ti áu jiaahua—. Ínapo ä súale, enchi Cristotukähui, jü Diosta Üusi ím ániau kóm yebij‑lame.
Jesús Láazarota mäaripo huéeka buaanak
28 Marta éntok íkäi noksuka áman sika, juka Maríata ä huayhua núnnuk, éhuil ínel áu jíaka:
—Jü Maestro ím aane; entok enchi núnnu.
29 Áapo íkäi jíkkajaka, bamsipo kíkteka áman áu siika.
30 Jesús ketune kee huam ili pueblou kibakey, Martata ä nankekäpo ketune aaney.
31 Huanäi jume judíom jóapo áamak aneka ä sirok aniaïhui, Maríata bamsipo yeu ä sik, akim ä guojaasek, ínel jíaka: “Áman siika, ä mäariu buanseka.”
32 María jum Jesústa anëu yepsaka, ä bíchaka, guókpo áu tónommea kíktek, ínel jíaka:
—Señor, enchi ím aney, ín ábachi kaa muk éiyey.
33 Jesús ä buanay ä bíchaka, éntok két huame judíom áamak kateïhuim buaname bíchaka, jíapsi sóokteka espíritupo áu yoyoak, tüisi siroksi.
34 Huanäi ínel jiaahua:
—¿Jáksem ä maäak?
Bempo éntok ínel áu jiaahua:
—Señor, äbe sika ä bitcha.
35 Huanäi Jesús buaanak.
36 Huanäi jume judíom ínel jiaahua:
—¡Akem ä bitcha, tepa ä nákkey!
37 Huate éntok áme násuk aneme ínel jiaahuay:
—¿Jachu ïri kara jita yáuhuai, Láazarota kaa múknakë béchïbo, jáchin juka líptita ä pujtetuakä bénasi?
Láazarota mukilata jíabitetuak
38 Jesús, ä jiápsipo júchi tüisi siroksi éaka, ä mäariu bíchaa siika. Téta guójöriatukay; ï guójöria éntok téta buëurukuy páttiaritukay.
39 Jesús ínel jiaahua:
—Juka tétatem mékka oóre.
Marta, jü mukukamta huaayi, ínel áu jiaahua:
—Señor, béja chïcha juuba, béja naiki taahuare mukilataka.
40 Jesús ínel áu jiaahua:
—¿Jachune kaa enchi téjhuaala, ä súalëtek, Diosta looria enchi bínnake tíaka?
41 Huanärim tétata mékka oórek, juka mukilata áy páttiatukaïhui. Huanäi Jesús, téhuekau jikau remteka, ínel jiaahua:
—In Átchay, enchine baysauhue enchi nee jíkkajä tíaka.
42 Ínapone jüneiya, jíba enchi nee jijikkajähui; tëne ínëli jiaahuak huaka génte juebenaraata ino chíkola aneme béchïbo, enchi nee äbo bíttuakäu bétana am súalnakë béchïbo.
43 Íkäi noksuka, kusisi cháchayek:
—Láazaro, ¡pakunë yeu huéiye!
44 Huanäi jü mukilatukäihui yeu siika, mámpo éntok guókpo sánkommea súmataka. Ä pújbahua éntok sánkommea bïtiatukay. Jesús éntok ámeu ínel jiaahua:
—Akem ä búttia, ä huéenakë béchïbo.
Noktam náu yáuhuak, Jesústa mëbáreka
(Mt. 26:1-5; Mr. 14:1-2; Lc. 22:1-2)
45 Huanäi juebena judíom Maríatamak ambáreka áma yáij‑latukay. Huanärim Jesústa yáakäu bíchaka ä súsualek.
46 Të huate éntok jume pariserommeu sájaka, Jesústa yáakäu am téjhuak.
47 Huanäi jume sacerdotem tiöpopo chë nésahueme éntok jume pariseerom juka conciliotam náu núnuka, ínel jiaahua:
—¿Jáchisute annake? Bueïtuk ï yoreme juebena señaalim johua.
48 Kía ínëli itom ä tójak, sïme ä súsualnake. Huanäi jume romaanom äbo yájaka juka itom tiöpo tátabnakë, éntokim huaka itom nación luutianake.
49 Huanäi jü Caifás ámemak joome, huäri huásuktiriat sumo sacerdotetukai, huanäi ínel ámeu jiaahua:
—Emem kaita jüneria,
50 éntokem kaa jüneiya, ito béchïbo jita chë türiakähui, huépü yoremta itom pueblota béchïbo muknakëhui, të kaa sïme naciónta kókkonakëhui.
51 Kaa ä éäpo íkäi nookak, Jesústa bétana, ál‑la huäri huásuktiriat áapo sumo sacerdotetukä béchïbo, profetisaruak hua naciónta béchïbo Jesústa muknakëïhui,
52 éntok kaa kía naciónta béchïbo jíbba, két huame Diosta üusim chíbejtilam lópola náu am rúktia béchïbo.
53 Júnëli huäri taahuarit naateka náhuim nokta yáuhuak, ä mëtebo báreka.
54 Huäri béchïbo Jesús béja kara machisi jume judíom násuk naa huéiyey, ál‑la mékka bíchaa siika, senu buiärau see päria, náapo, hua pueblo Efraín téähui. Huämi taahuak, jume ä discíipulommaki.
55 Éntok béja kaa jaikika bëyey, judíom pascua pajkota yúmanakëhui. Huanärim juebénaka buere joära Jerusaléniu jikau sájjak, kee pascua pajkota yúmayo emo báksia báreka.
56 Huanärim juka Jesústa jariay. Jum tiöpopo aneka, ínëlim emo nátemajey:
—¿Jáchisem éiya? ¿Jachu kaa äbo pajkou yebijnake jäni?
57 Huanäi huame tiöpopo chë nésahueme éntok huame pariseerom át nésahuek, hua jábe júne ä jüneriame, ják ä anëhui, yeu ä buís sáyhuak, ä pereesote béchïbo.