13
Jesús ä discíipulom guók báksiak
1 Senu taahuari bëyey, kabara jísobahuaka pájcuata yúmaseïhui. Jesús jüneiyay, tiempota áa béchïbo yúmalatukaïhui ím ániapo yeu ä huéenakëihui, ä Áchaybeu bíchaa. Ä átteahuam ím ániapo aneme jíba am nákkek, ä mukëpo tájti.
2 Huanäi tukaapo am jïbuäy, jü diablo Judasta jiápsipo kibak‑latukay, Jesústa ä nénkinakë béchïbo. Ïri Judas Iscariote, Símonta üusitukay.
3 Jesús jüneiyay ä Áchayhua sïmeta ä mámpo ä tóij‑latukaïhui, éntok Diosta bétana áu hueïhui, éntok Diostau bíchaa áu huéenakëihui.
4 Júnëli kíkteka, jume súppem béppa huéeme áu úhuak. Toallam éntok nüka, am huikojtek.
5 Huanäi buere puraatopo bäam yeu töaka ä discíipulom guók báksia táytek, éntok jume toallam ä huikosakäbey am huaachak.
6 Huanäi Jesús jü Símon Perotau rúktek; Peero éntok ínel áu jiaahua:
—Señor, ¿jache empo nee guók báksia báare?
7 Jesús éntok ínel ä yómmiak:
—Jü ín jóäbet empo kaa át jüneiya én läuti; të chúkula ál‑lë át jüneenake.
8 Peero éntok ínel áu jiaahua:
—Katë nee guók báksianake, jauhuey junne.
Jesús éntok ínel ä yómmiak:
—Kaa nee enchi guók báksiak, kaitë ínomak jípunake.
9 Huanäi jü Símon Peero ínel áu jiaahua:
—Señor, ä junëlitunakey, kaa ín guókim jíbba, ín mámmam éntok ín kóba júne báksia.
10 Të Jesús ínel áu jiaahua:
—Jü bemélasi baksiari kaa júchi báksiana, jume guókim jíbba, bueïtuk béja baksiari. Eme éntok béja báksiari, të kaa sïme.
11 Bueïtuk jüneiyay jábeta ä nénkinakëihui; huäri béchïbo: “Kaa sïme báksiari”, ti áu jiaahuak.
12 Júnëli, chúkula am guók báksiasuka, júchi ä súppem nüka, mesau rúktek. Huanäi ínel ámeu jiaahua:
—¿Jachu eme jüneiya jita ín enchimmeu yáakähui?
13 Eme nee Maeströ tíiya, éntokem nee Señor tíiya. Tüisem ínel jiaahua, bueïtuk enchim jiauläpo, ínapone ájäria.
14 Të ínapo Señortaka éntok Maestrotaka júne enchim guók báksiak, eme kétchi náu emo guók báksiapo yúmala.
15 Bueïtuk ejemplotane enchim mákkak, ín enchimmeu ayuka bénasi enchim két náu ä jonákë béchïbo.
16 Tua lútüriapone ínel enchimmeu jiaahua: Huä sáyhuame kaa ä teko béppa chë yörihua; éntok hua jákun bíttuahuakame júne kaa chë yörihua áman ä bíttuakamta béppa.
17 Íkärem jüneriätek, al‑leakem jíapsinake ä joäteko.
18 ’Kanne sïmem bétana nooka. Bueïtuk ínapone jüneiya jábem ín yeu púalatukähui. Të úttea huaka jïojteta ínel jíamta chúpnakë béchïbo: “Huä páanim ínomak buäyeme nee béj‑reka áu tóboktiak.”
19 Én naatekane enchim ä téjhua, kee jee huéenakemta chúpeyo, béja ä chúpey enchim ä súalnakë béchïbo ín ájäriatukähui.
20 Tua lútüriapone ínel enchimmeu jiaahua: Huä ín jákun bíttuari mabetakame, nee mabeta; hua nee mabetakame éntok, huaka nee äbo bíttuakamta két mabeta.
Jesús Judasta ä nénkinakeu bétana nookak
(Mt. 26:20-25; Mr. 14:17-21; Lc. 22:21-23)
21 Jesús íkäi noksuka, ä jiápsipo tüisi sirokay. Huanäi huitti ínel jiaahua:
—Tua lútüriapone ínel enchimmeu jiaahua, senu enchim násuk aneme nee nénkinake.
22 Huanäi huame ä discíipulom emo naa bíchaka taahuak, kaa jünéaka jábeta bétana ínel ä jíähui.
23 Senu disciipulo, Jesústa chë nákeïhui, áa náapo káteka chákala bökay.
24 Íähui señam yáuhuak, jü Simmom Peero, ä temaij ïaaka ä jábétukaïhui huaka áa bétana ä nokaïhui.
25 Huanäi áapo, Jesústau jëla rúkteka, ínel áu jiaahua:
—Señor, ¿jábesa jüri em áa bétana nokähui?
26 Jesús éntok ínel ä yómmiak:
—Huä jábeta páanim kómoniaka ín ä miknakeu, huäri ájäria.
Huanäi jume páanim kómoniaka, Judas Iscarioteta, Símonta üusi, am miikak.
27 Huanäi sep Satanás ä jiápsipo kibakek. Jesús éntok ínel áu jiaahua:
—Juka em yáa bárëu, bamsekë ä yáuhua.
28 Të huame mesau jokame katim jünéaka taahuak, jita béchïbo Judastau ínel ä jíakähui.
29 Bueïtuk huate ínel éiyay: Judasta tómi bóosata jípurë béchïbo, Jesús ínel áu jiaahua: “Pajkopo itom huáatianakeuë jínnu mátchi”, éntok: “Poloobeme mikpo yúmala”, tim éiyay.
30 Áapo jume páanim buäsuka siika. Huanäi éntok béja tukaaritukay.
Jü bemela nésauri
31 Huanäi Judasta yeu simsuk, Jesús ínel jiaahua:
—Én buéresi úttilna, jü Yoremta Üusi ti téhuaakame, éntok Dios Átchay áa béchïbo úttilna.
32 Jü Dios áapörik béchïbo úttilhuätek, áapo Dios kéchä úttilnake, ä éäpo; éntok läuti ä úttilnake.
33 In usiälam, ketunene kaa bínhua enchimmak annake. Nechem jariunake, të jume judíommeu ín jíä bénasi, enchimmeune két ínel jiaahua: Huam ín huëu bíchaa, eme karem áman kaate.
34 Bemela nésautane enchim mákka: Emóem nákke. Nee enchim nákëpo bénasi, emem két nánancha emo náknake.
35 Ímïrim sïmetaka enchimmet jüneenake, ín enchim majtialatukä bétana, nanabeu éaka enchim emo nákeyo.
Jesús juka Perota kaa áu ä täya tíanakeu bétana nookak
(Mt. 26:31-35; Mr. 14:27-31; Lc. 22:31-34)
36 Huanäi jü Símon Peero ínel áu jiaahua:
—Señor, ¿jákusë huée báare?
Jesús éntok ínel ä yómmiak:
—Áman ín huëu bíchaa, empo kara ínomak huéiye ëni; të chúkula arë ino sáu huéenake.
37 Peero éntok ínel áu jiaahua:
—Señor, ¿jatchiakasune kara emo sáu huéiye ëni? ¡In jíapsi muknakey júnene ára ä tójja, emo béchïbo!
38 Jesús éntok ínel ä yómmiak:
—¿Jachë em jíapsi ä muknakey júne ára ä tójja, ino béchïbo? Tua lútüriapone ínel emou jiaahua, juka totorörata kee jee kuseyo, baisë kaa nee emo täya tíanake.