18
Kʉmʉlaabha ʉMʉlʉngʉ sita kulita
1 UYeesu akhabhabhʉʉzya abhalandati bhaakwe ɨshɨkholanyo kʉbhamanyɨzya kʉtɨ, bhamʉlaabhaje ʉMʉlʉngʉ insiku zyonti, sita kulita.
2 Akhabhabhʉʉzya akhatɨ, “Álɨɨpo umulonganyi mʉ nhaaya yimo we atakhamwogopaga ʉMʉlʉngʉ, khabhɨlɨ atakhasajɨlaga abhantʉ.
3 Mʉ nhaaya yɨnɨɨyo, álɨɨpo ʉmwantanda ʉmʉfwɨle ʉmo. Akhabhalaga akhinji kʉkwakwe kʉlaabha kʉtɨ amwavwe, akhatɨnjɨ, ‘Ufumwe ʉwaamʉlo, ʉmʉlʉgʉ waanɨ aleshe kʉnjɨmvwa.’
4 “Insiku inyinji zɨkhashɨla, umulonganyi ʉla akhajendelelaga kʉkhaana kʉmwavwa ʉmʉfwɨle ʉla. Pe kʉwʉmalɨlɨshɨlo, akhayɨsɨɨbha mʉ mwoyo waakwe akhatɨ, ‘She poope ɨntakʉmwogopa ʉMʉlʉngʉ, awe kʉsaajɨla abhantʉ,
5 ɨleelo kʉnongwa ye ʉmʉfwɨle ʉnʉ akʉnjɨmvwa nhaani, ishi intifumwe ʉwaamʉlo kʉmwavwa, ɨnga aleshe kʉnjɨmvwa winza!’ ”
6 Pe ʉMwene akhatɨ, “Mʉmanyɨlaje kwa mulonganyi ʉla umubhiibhi, she áyamʉʉye kʉbhomba!
7 Ishi, ʉMʉlʉngʉ atangakhola kʉbhabhombela akhinza abhasaabhʉlwa bhaakwe bhe bhakʉmʉlamba shamʉsanya na shawusiku? Angakhaabha kʉbhaavwa?
8 Ɨnkʉbhabhʉʉzya kʉtɨ, ʉMʉlʉngʉ atɨbhabhombele nalʉbhɨlo zye zɨbhakhondeeye kʉbhabhombela. Ishi ʉMwana wa Muntu we akʉgalʉkha mʉ nsɨ, akhayɨbhalola abhantʉ bhe bhamwitishile?”
Ɨshɨkholanyo ɨsha Mufalisaayi nʉ mʉsonshezya nsonho
9 Pe uYeesu akhabhabhʉʉzya kʉ vɨkholanyo abhantʉ bhe bhakhayɨlolaga kʉtɨ bhakhondeeye pamiiso ga Mʉlʉngʉ na kʉshoolanya abhamwabho, akhatɨ,
10 “Abhantʉ bhabhɨlɨ bhábhalile kupuuta mwi linga ilyi Nyumba iMfinjile, ʉmo áamɨle Mufalisaayi, ʉwamwabho áamɨle mʉsonshezya nsonho.
11 “UMufalisaayi ʉla akhɨmɨɨlɨla, akhapuuta ishinuunu akhatɨ, ‘We Mʉlʉngʉ, inkukusalifwa, kʉnongwa ye ɨne ɨntalɨ anza bhantʉ abhanjɨ, bhe bhakʉfwʉla kʉ njeele, abhabhomba mbiibhi, abhabhembu, poope anzʉ mʉsonshezya nsonho ʉnʉ!
12 Ɨne inkuyiima kulya kʉ mʉlʉngʉ khabhɨlɨ, kʉnongwa ɨya kupuuta. Khabhɨlɨ inkukufumwizya imfinjile ɨshɨgada sheeka mʉ vɨgada ishumi mu vintu vwanɨ vwonti.’
13 “Ɨleelo ʉmʉsonshezya nsonho ʉla áyɨmɨlɨɨye ukutali, ásʉlamɨɨye paasɨ, atakhalɨnjɨzya poope kwenya kʉmwanya, akhayɨkhomaga-khomaga pa shifubha shaakwe, akhatɨnjɨ, ‘We Mʉlʉngʉ, ʉndolele ishisa, ɨne ne mʉbhomba mbiibhi!’ ”
14 Pe uYeesu akhatɨ, “Ɨnkʉbhabhʉʉzya kʉtɨ, ʉmʉsonshezya nsonho akhagalʉkha kʉkhaaya, abhaziliilwe uwugolosu. Ɨleelo ʉwamwabho ʉla, atakhabhaazɨlwa uwugolosu! Kʉnongwa ye umuntu wowonti we akʉyɨzʉvwa, ʉMʉlʉngʉ akhayimwisya. Ɨleelo umuntu we akuyiisya, ʉMʉlʉngʉ akhayɨmʉzʉvwa.”
UYeesu akʉbhasaya abhaana abhansi
(Mataayi 19:13-15; Maalika 10:13-16)
15 Isiku limo, abhantʉ bhakhamʉletelaga uYeesu abhaana abhansi, kʉtɨ abhabhɨɨshe ɨnyoobhe yaakwe abhasaye. Ɨleelo abhalandati bhaakwe we bhaalola shɨnɨɨsho, bhakhabhakhajɨla bhe bhakhabhaleetaga abhaana bhaala.
16 Pe uYeesu akhabhabhɨlɨshɨla abhaana kʉtɨ bhabhale kʉkwakwe, akhatɨ, “Bhaleshe abhaana abhansi ɨbho bhɨnze kʉkwanɨ, lashi mutabhadindaje! Kʉnongwa ye ʉwʉmwene wa Mʉlʉngʉ wa bhantʉ bhe bhalɨ anza bhaana ɨbha.
17 Nalyoli ɨnkʉbhabhʉʉzya, umuntu wowonti we atakʉwʉposheela ʉwʉmwene wa Mʉlʉngʉ anzʉ mwana umunsi, atangakhola kwinjila mʉ wʉmwene wʉnʉʉwo.”
Ʉmʉpɨtɨ ʉmo we áamɨle wu dumbwe
(Mataayi 19:16-30; Maalika 10:17-31)
18 Ʉmʉpɨtɨ ʉmo akhamʉbhʉzɨɨlɨzya uYeesu akhatɨ, “We Mumanyizyi uMwinza, ɨmbombe lyoni ilyinza ɨnga akhabhalɨlo khe khakwɨnza ɨnhawaaje uwuumi ʉwa wiila?”
19 UYeesu akhamwamʉla akhatɨ, “Khooni khe ʉkʉmbʉʉzya kʉtɨ ne mwinza? Atalɨɨpo we mwinza, lyoli ʉMʉlʉngʉ mwene!
20 Bhʉlɨ, uzimanyile ɨndajɨzyo zye zɨkʉtɨ, ‘Utakhabhembushe, ʉtakhaagoje, utakhiibhe, utakhaafumwe uwukeeti ʉwɨ lenga, umushindikhaje uyise waakho nu nyina waakho.’”
21 Ʉweene akhatɨ, “Ɨndajɨzyo zyonti zɨnɨɨzyo, inzilemile kufuma kʉ waana waanɨ.”
22 UYeesu we ayɨmvwa ganaago, akhamʉbhʉʉzya akhatɨ, “Ubhuliliilwe na khantʉ kheeka. Bhalaga ʉkazye ivintu vwonti vwe ʉlɨ navwo, ɨnhela zye waapata, ʉbhagabhɨle abhapɨɨna. Ɨnga wabhomba shɨnɨɨsho, ʉtɨyɨbhɨɨshɨle ɨshʉʉma kʉmwanya. Pe ʉyɨnze, ʉndandate.”
23 Ʉmʉpɨtɨ ʉla, we ayɨmvwa ganaago, akhasʉngama nhaani, kʉnongwa ye áamɨle nɨ shʉʉma ishinji.
24 UYeesu we amʉlola kʉtɨ asʉngama, akhatɨ, “Abhantʉ bhe bhakʉsʉʉbhɨla uwudumbwe we bhalɨ nawo, yɨkhayɨbha papala nhaani kwinjila mʉ wʉmwene ʉwa Mʉlʉngʉ!
25 Papupuusu ɨngamɨla kwinjila mu khaazi akha lusindaani, na kʉtɨ udumbwe ayinjile mʉ wʉmwene wa Mʉlʉngʉ!”
26 Abhantʉ bhe bhímvwizye ganaago, bhakhatɨ, “Ishi, ɨnga she zɨlɨ shɨnɨɨsho, wu naanu we angawaaga uwuposhi?”
27 UYeesu akhabhabhʉʉzya akhatɨ, “Zye abhantʉ bhakʉpootwa kʉbhomba kʉ makha gaabho, kwa Mʉlʉngʉ zɨkʉbhombekha.”
28 Pe uPeeteli akhamʉbhʉʉzya uYeesu akhatɨ, “Yeenya, ɨtwe tuvileshile ivintu vwonti, tukulandatile ɨwe!”
29 UYeesu akhatɨ, “Nalyoli ɨnkʉbhabhʉʉzya kʉtɨ, umuntu wowonti we ayileshile inyumba, awe ʉmʉshɨ, awe abhakhambakʉ, awe abhapaafi, awe abhaana, kʉnongwa ya wʉmwene wa Mʉlʉngʉ,
30 wʉnʉʉyo we akʉposheela ivwinji kʉshɨla vwe avileshile. Khabhɨlɨ akhabhalɨlo khe khakwɨnza, akhayɨposheela uwuumi ʉwa wiila na wiila.”
UYeesu akʉkʉwa akha wʉtatʉ ɨzya kufwa na kʉzyʉkha kwakwe
(Mataayi 20:17-19; Maalika 10:32-34)
31 UYeesu akhabheega abhalandati bhaakwe ishumi na bhabhɨlɨ, akhabhala nabho pambalɨ, pe akhabhabhʉʉzya akhatɨ, “Yeenyi, tʉkʉzʉbha kʉbhala ku Yelusaleemu. Kʉnʉʉkwo, zyonti zye abhakuwi bhásimbile kʉ zya Mwana wa Muntu, zɨtɨbhombeshe.
32 Akhayɨtwalwa kʉ bhantʉ bhe te Bhayahuudi. Ɨpo bhakhayɨmʉshoolanya na kumuliga, na kʉmʉswɨla amatɨ.
33 Khabhɨlɨ bhakhayɨmʉkhoma nɨ sambogo na kʉmʉgoga, isiku ɨlya wʉtatʉ, akhayɨzyʉkha.”
34 Abhalandati bhaakwe bhatakhazyaganya angazyeka zye akhabhabhʉzyaga. Bháfisiilwe kʉtɨ amazwi ganaaga kwe kʉtɨ bhʉlɨ, bhatámanyile kʉtɨ akʉlonga khantʉ khooni.
UYeesu akʉmʉponɨa umuntu we afuuye amiiso
(Mataayi 20:29-34; Maalika 10:46-52)
35 UYeesu na bhalandati bhaakwe we bhalɨ papɨɨpɨ nɨ nhaaya ɨya mu Yeeliko, umuntu ʉmo we áfuuye amiiso áyɨkhaaye pambalɨ pɨ dala, akhalaabhaga ɨnhela.
36 We ayɨmvwa abhantʉ abhinji bhakʉshɨla, akhabhʉzɨɨlɨzya akhatɨ, “Kʉlɨ khooni?”
37 Bhakhamʉbhʉʉzya bhakhatɨ, “UYeesu ʉwa ku Naazaleti akʉshɨla.”
38 Pe akhabhɨlɨshɨla nhaani akhatɨ, “We Yeesu, ʉwa shɨkholo sha mwene uDaudi, ʉndolele ishisa!”
39 Abhantʉ bhe bháamɨle pɨlongolela pa Yeesu, bhakhamʉkhajɨla kʉtɨ apʉʉme. Ɨleelo ʉweene akhonjezya kʉmʉbhɨlɨshɨla nhaani akhatɨ, “We Mwana ʉwa shɨkholo sha mwene uDaudi, ʉndolele ishisa!”
40 UYeesu akhɨmɨɨlɨla, akhalajɨzya kʉtɨ bhamʉleete kʉkwakwe. Umufwe amiiso ʉla we asejeelela pɨlongolela yaakwe, uYeesu akhamʉbhʉzɨɨlɨzya akhatɨ,
41 “Ʉkwanza ɨnkʉbhombele lyoni?” Akhatɨ, “We Mwene, ɨnkʉlaabha ʉmponɨe ɨnande kʉlola.”
42 UYeesu akhamʉbhʉʉzya akhatɨ, “Ishi ʉyande kʉlola! Ʉlwɨtɨkho lwakho lwakʉponɨa.”
43 Akhabhalɨlo khanaakho we áfuuye amiiso ʉla akhalola, pe akhamʉlandata uYeesu kumo akʉmʉpaala ʉMʉlʉngʉ. Abhantʉ bhonti we bhazɨlola zɨnɨɨzyo, bhoope bhakhamʉpaala ʉMʉlʉngʉ.